MY HAIR CARE ROUTINE | !! عنايتي بشعري

  بسم الله الرحمن الرحيم  

السلام عليكم بنات كيفكم مرررررة وحشتوني💗 !!!!! اليوم التدوينة نااااااار وشراااااار🤣 وكثير تجيني أسئلة عن العناية بالشعر وكيف نعتني بشعرنا اذا نحنا عندنا تساقط والشعر بيطيح ؟؟؟؟ أنا حأكلمكم بم إني درست تخصص صحي وأعرف دكاترة في مجال الجلدية فأقدر أعطيكم المفيد ... بس أوّل شي أبغا أقلكم إنو أنا شخصيا في عيلتي عندنا التساقط الوراثي او الصلع الوراثي موجود في العيلة وأنا شخصيا عندي لخبطة في الهرمونات بتأدي إنو إحتمالية تساقط شعري كبيرة ف كيف بأحافظ نوعا ما على شعري بشكل علمي وغير مبالغ فيه ؟؟؟😀 ..

ان شاء الله هادي التدوينة حتفيد كل الي يعانوا من التساقط الوراثي أو الصلع الوراثي فبدون ما أطول عليكم يلا نبدأ 

هادي المنتجات غالبا هي الي أستخدمها في العناية بشعري ناقصة منتج واحد حأوريكم هو لمن تكمّلوا التدوينة لانه أهم منتج ! وبنات في التدوينة هادي حأتكلم معاكم حتى على الأدوات الي أستخدمها لمن أعمل شعري بالفير أو الكيرلينق واند فخلّونا نبدأ دحين بمنتج منتج .

  ١- MINOXIDIL SOLUTION 2% OR 5%  

أول شي قبل ما أتكلم عن أي منتج لاازم تعرفوا إنو لاااازم تعملوا تحليل دم وتشيكوا على أكثر من شي قبل ما تتخذوا أي قرار يخص الشعر أولا : مخزون الحديد FERRITIN ، ثانيا : فيتامين دال VIT D ، ثالثا : إختبار الغدة الدرقية TFT ،

رابعا : الزنك ZINC .

هادي العناصر لاااازم تنشاف 😉 ويفضّل تطلبوها من دكتور الجلدية يعملكم هيا عشان يتابع معاكم النتايج ويشوف ايش الي زايد وإيش الي ناقص عن الطبيعي ولو كان في أي خلل يعطيكم مكملات بجرعات محددة ولفترة محددة فلا تاخدو المكملات أو فيتامينات من نفسكم لاااازم تتابعوا دكتور جلدية.

ويابنات أهم شي إلي عندها حالة مرضية تأدي للخبطة الهرمونات وإنو الشعر يتساقط لازم تحلوها وتعالجوها لإنو الهرمونات لو كانت متلخبطة للنساء بالتحديد حتأدي لتساقط الشعر فلازم نحل المشكلة الاساسية قبل ما نحل مشكلة التساقط لو حلينا المشكلة الأساسية التساقط حيوقف 😉 ولو ما وقف ديك الساعة نبدأ بعلاجات الشعر .

...................................................................

نروح لهادا المنتج الي يسمى بالإسم العلمي (مينوكسيديل) ، المينوكسيديل هو الحل الوحيد والعلاج الوحيد لتساقط الشعر

العلاج الثاني هو زراعة الشعر مافي حل ثالث فلا أحد يضحك😓 عليكم ويقلكم الخلطة الفلانية توقف التساقط والزيت الفلاني حيخلي الشعر غزييييييير لإنو كل هادا كذب مافي زيت ح يحل مشكلة التساقط الوراثي ولا في زيت حيخلي شعرك في يوم وليلة غزير، البنات وبم فبهم أنا كثير بنشوف حسابات مشاهير وغير مشاهير في الإنستقرام تجبلك زيوت تجارية وفيتامينات تجارية وتقلك بهادي الحبوب أو الزيوت حيوقف التساقط وكل هادا كذب🤐 .

لازم بنات نكون أذكياء شوية قبل ما ناخد أي معلومة 🙏🏼 ولازم نبحث ونقرأ علشان ما نصدق أي كلام ينكتب .

..................................................................

مادة المينوكسيديل هي مادة دوائية تجي غالبا على هيئة محلول بخاخ ، والمينوكسيديل يجي بتركيزين إما ٢٪ او ٥٪ 

٢٪ للنساء و ٥ ٪ للرجال ولكن هادا الكلام كان زمان الدراسات الجديدة أثبتت إنو النساء يقدروا يستخدموا ٥٪ بدون أي مشاكل وطبعا ٥٪ حيعطي مفعول أسرع🌸 .

المفروض أي أحد عنده تساقط وراثي وفراغات في الشعر سواء كان نساء أو رجال يستخدموا المينوكسيديل مدى الحياة بدون إنقطاع لإنو أول ما حتوقفوا العلاج بشهر أو شهرين الشعر الي طلع حيطيح وحيبقى الشعر الأساسي وحيروح كل الشعر الي طلع من البخاخ فلازم يستخدم مدى الحياة👌🏽 .

الفرق متى حيبان ؟؟؟ حيبان الفرق من ٦ شهور - سنة أنا دايما أقول إنو الشعر زي النبات🤩لازم نسقيه ونهتم فيه عشان يكبر وهادا ياخد وقت .

طريقة الإستخدام😆: نبخ البخاخ بشكل موضعي على الفراغات بالفروه وعدد مجموع البخات يكون من ٦-٨ بخات وبعدين نفرك الفروة ونحاول نعمل مساج للمنتج في المناطق الي فيها فراغات .

من الأعراض السلبية الي ممكن تسير : ١- تحسّس فروة الراس وهادا دايما يسير أول ما تستخدمو المنتج يحصل تحسس وحكة في الفروة لكن بمجرد ما تتعودوا حيروح التحسس .

٢- تساقط الشعر بزيادة أول ٣ شهور من الإستخدام مرررة عادي ممكن تنفجعوا😳 اول ٣ شهور من زيادة التساقط لاتخافوا لإنو الفكرة إنو الدوا بيطيّح الشعر الي مفروض يطيح والشعر الضعيف وبعد كدة حيطلعلكم شعر جديد وقوي وحتلاقوا انو التساقط وقّف .

٣- الشعر يزيت أو يدهّن بسرعة فكل ٣ ايام لازم تحمموا شعركم لو دهّن خلال ال٣ أيام الحل الوحيد وصديقكم الوحيد الشامبو الجاف .

لا تحمموا شعركم كل يوم لإنو ترويش الشعر كل يوم حيضعف الشعرة وحتقطع الشعر
 فمرتين أو ثلاثة أيام في الأسبوع تحمموا فيها شعركم كفاية وباقية الأيام حمّموا جسمكم فقط بدون الشعر .

٤- زيادة الشعر في الوجه .. حتكون ملحوظة أكثر مع ال٥٪ 

 أنا عن نفسي أشوف شرنو يزيد شعر وجهي وأشيله ولا إنو يطيح شعري😎 وأوصل لمرحة ما أقدر أرجّع شعري زي زمان .. فالي بأسويه عن نفسي إنو كل أسبوع أنظف وجهي بموس فلامينجو الخاص بالوجه وبس لاتطلعلي حبوب ولا وجهي يتحسس والحمدلله .

................................................................

تجربتي مع المينوكسيديل بدأت أستخدمه في أكتوبر ٢٠١٦ بوصفة دكتور مع فيتامينات للشعر جلست أستخدمه مدة سنة ووقفته وجلست أستخدم الفيتامينات فقط  فطاح الشعر الي طلع وعلى بداية سنة ٢٠١٨ بدأت أشوف إنو بانت فراغات كثير في شعري والتساقط بدأ يزيد 

فمن وقتها أستخدمت مرة ثانية المينوكسيديل وباقيلي شهرين وأكمل سنة👌🏽على إستخدامي المينوكسيديل كنت في البداية أستخدم ٢٪ وبعدين سرت أستخدم ٥٪ طبعا جلست تقريبا ٦ شهور ما شفت فرق كبير وبعدين بدأت الفراغات تتملى التساقط  قل ما أقلكم إنو راح التساقط ١٠٠٪ ولكن خف ودا شي كويس وطبعا حأجلس أستخدمه علطول .

  ٢- فيتامينات الشعر  

نجي للفيتامينات الخاصة بالشعر أنا عن نفسي كنت آخذ فيتامين دال وزينك😍 والآن وقفتهم لإنو خلاص كملت الكورس وما سرت أحتاجهم فلازم زي ماقلتلكم تحلّلو دم وتشوفوا العناصر الي ذكرتها قبل في التدوينة لإنها جدا مهمة ولازم تكون في المستوى الطبيعي ...
مع الفيتامينات الضرورية كنت آخذ فيتامينات خاصة بالشعر أعطاني هي الدكتور ومرررة ناسبتني 

ولكن علشاني أستخدمتها تقريبا سنتين جسمي أتعود عليها وماسرت أشوف منها فرق زي زمان فجرّبت

 فيتامينات تانية الي هي (البريورين إن) آخذ حبة مرتين في اليوم ما زودتلي الشعر في جسمي والحمدلله شفت فرق وطبعا آخذها مع إستخدامي للمينوكسيديل👆🏽 لإنو هو الأساس والفيتامينات الخاصة بالشعر عنصر مساعد فقط .

مو أي فيتامينات تجيب نتيجة والبعض ممكن يحتوي على مادة البيوتين المهمة للشعر بكمية عالية فتطلّع حبوب في الوجه☹️

عشان كدة أختاروا فيتامينات شعر مزبوطة ويفضّل تكون بوصفة دكتور أو بتوصية من دكتور

لا تسمعوا لكلام اي أحد في الإنستقرام الآن نحنا سرنا في زمن الكل يتكلم والمشكلة إنو يتكلمو في شي مو تخصصهم أبدا وبعيد عنهم تماااااما😡يعني تكون فقط عندها متابعين كثير تقوم تعطي لنفسها الأحقية إنو تتكلم في أي شي والمشكلة البنات مساكين يصدقوا ، حراااااااام الي بيسير ..... مو أي أحد يتكلم أتكلمي في مجالك ..

أنتبهوا يا بنات لا تاخدو أي كلام يتقال أدرسوا الكلام قبل ما تصدقوه .

ومرة ثانية أقول الفيتامينات الخاصة بالشعر لاااااااا تفيد إذا الأساس خربان صلّحو الأساس أول ،

والفيتامينات الخاصة بالشعر لا تفيد لحالها لازم تكون مع المينوكسيديل لانو المينوكسيديل هو الأساس ،

في السوق موجود الكثير من الفيتامينات التجارية فأنتبهوا خدوا فيتامينات بوصفة دكتور .

  ٣- زيوت الشعر  

زيت جوز الهند🥥 أستخدمه على شعري من المنتصف وليس على الفروة فكل الزيوت ما أخليهم يلامسوا الفروة علشان أغلب الزيوت تقفّل مسام الفروة😶

والزيوت لاتفيد الا للترطيب ، زيت جوز الهند جدا مفيد للترطيب يخلي الشعر ناااااعم أستخدمه كل أسبوعين على شعري أخليه تقريبا ساعة قبل الإستحمام وبعد كدة أحمم شعري .

زيت الأرقان🥰 أستخدمه في الأيام العادية لمن يكون شعري جاف أقوم أحط كم نقطة على يدي وأمرّره 

على الأماكن الجافة وكمان أطراف الشعر من تحت😌 زيت الأرقان أحسن زيت للترطيب ويعطي لمعة رهيبة 

أحب زيت الأرقان من ماركة ماسينيسا بس اذا كان غالي عليكم عندكم بديل تاني من آيهرب
 في شركات كثير تبيع زيت الأرقان الطبيعي وبسعر رخيص .

كمان أستخدم كم نقطة من زيت الأرقان بعد الفير أو الإستشوار يعطي شعري لمعة ويمنع الشعر من

 النفشة الي تجي مع الرطوبة يهدي الشعرات المتطايرة هههههه🤣 بس طبعا لا تكترو علشان هو في النهاية زيت حطّوا

 نقطتين بالكثير لكامل الشعر .

  ٤- حماية من حرارة الإستشوار  

هادا الجل أو الكريم سرلي أستخدمه سنين من شركة بيد هيد🥰 قبل الفير أو الإستشوار أحط منه شوية
 على شعري الجاف وما أخليه يلمس الفروة طبعا.
فايدته إنو يمنع نفشة الشعر من الرطوبة😀
أشتريه أونلاين ومؤخرا سرت أشوف منتجات بيد هيد في سنتربوينت .

  ٥- أدوات تصفيف الشعر وترطيبه  

حبيت  أوريكم الفير الي أستخدمه سرلي تقريبا ٤ سنين هو والكيرلينق واند
الفير أشتريته من بوتس من شركة براون🥰 أكيد دحين في أنواع تانية أحسن بس أنا عندي هادا ومرتاحة عليه .
الكيرلينق واند أشتريتها من إكسترا مررررة رهيبة ما أعرف إيش ماركتها بس تفي بالغرض ورهيبة ورخيصة
وحرارتها تجنن😇 كمان أنصحكم فيها .

  ٦- تعطير الشعر  

أشتريت هادا العطر للشعر من باث أند بودي كراميل😆 طبعا في عطور كثيييرة للشعر بس هادا عجبني لإنو يجلس فترة على شعري وريحته خفيفة ما تعور الراس وينفع للإستخدام اليومي مرررررة حبيته☺️ أستخدمه بعد الإستحمام على
شعري الجاف وكمان أستخدمه في أي وقت أحس شعري يحتاج إنتعاش فيه .
آخر شي مفيد جدّا للشعر هو الأكل الصحي المتّزن وشرب الموووووية مرة ضروري شرب الموية سواء كان للشعر أو البشرة ،
كمان بنات لازم تعرفوا إنو الشعر يبغاله صبر أنا للآن في أيام شعري بيتساقط لمن أهمله ويرجع تاني يسير أحسن أهم حاجة تكونو بصحة و بدون أمراض وأساسكم مزبوط وإن شاء الله المينوكسيديل حيفيدكم ممكن الشعر ما يرجع زي زمان ولكن حيكون أفضل من قبل .
🌸🌸🌸🌸🌸🌸🌸🌸🌸🌸🌸🌸

وبكدة حبيباتي أكون وصلت لنهاية التدوينة من زمان كنت أبغا أنزلها وكنت خايفة أكون نسيت شي ان شاء الله أكون أفدتكم وأتمنى التدوينة تكون عجبتكم وخفيفة عليكم مرررررررة شكرا لكم وإن شاء الله أشوفكم يوم الإثنين في تدوينة جديدة
مع السلامة😍 .

3 comments CARE PRODUCT, HAIR CARE