بسم الله الرحمن الرحيم
أهلا بنات كيف حااااالكم اليوم التدوينة إن شاء الله حتكون عن رأيي في ماركة جيفري ستار كوزماتيكس 💗 وليش أنا قرّرت أكتب عن هادا الموضوع هنا في المدونة بعد ما أتكلمت عليه بالتفصيل في حسابي بالإنستقرام ..
التدوينة إن شاء الله حتكون خفيفة وقصيرة جدًا😄 وأتمنى إنو أي أحد يختلف عني أنا أحترم آراء الجميع طالما كانت في حدود الأدب وهادا في النهاية رأيي الشخصي👌🏽😀 .. فيلا نبدأ !!
جيفري ستار قبل تقريبا ١٠ سنين كان شخص عادي جدًا ما عندو فلوس أبدا 😶 بعد كدة دخل مجال الغناء وجلس فيه فترة بعدين ترك هذا المجال وأخذ كل الفلوس الي عنده وعمل ٣ أو ٤ أرواج مطفية ووقتها كان كل أمله إنو تنجح ماركته لإنو ما كان عنده إلا هاذي الأرواج وفجأة لقى إنو أخيرا بدأو الناس تشتري أرواجه 👌🏽 وسار عليها إقبال وبدأت الشركة تكبر وتكبر لين ما سار نجاحها كبير جدًا وطبعا جيفري سار عنده أعمال تانية بيدخّل منها فلوس بجانب ماركة الميك أب حقته ..
جيفري عنده كمان يوتيوب شانيل عملها في نفس الفترة الي بدأ فيها ماركة المكياج ، قناته في اليوتيوب قناة تهتم بالبيوتي والجمال 💙😉... مع مرور السنين بدأو الناس تتكلم عليه ويطلعوله فيديوهات له قديمة أتهموه فيها بالعنصرية وكلام تاني كثير .. كمان الكثير كانت ضده علشان ميوله الجنسية فزادوا ديك الفترة ال HATERS ... حتى اليوتيوبرز الي في نفس مجاله كانوا يستغلّوه لأغراضهم الشخصية وعلشان ينشهروا وينعرفوا وهمّا من وراه يتكلموا عليه ☹️ وطبعا كل هادا أنكشف السنة الي فاتت ٢٠١٨ كل أحد بان على حقيقته..
فساروا الناس بعد ماعرفوا الحقيقة أصبحوا يساندوا جيفري بعد ماكان كل السنين الي فاتت مكروه😓 ...
طيب ليش أنا بأقول هادا الكلام ؟؟
زمان أنا كنت أشوف ماركة جيفري ستار وأشوف فيديوهات جيفري في اليوتيوب تطلعلي في كل مكان وما كنت أفتحها ولا كنت مشتركة في قناته وكنت راااافضة إني أشتري من ماركته أو أعطي الماركة فرصة ليش 😳 ؟؟ علشان ميوله الجنسية مخالفة تعاليم ديننا الإسلامية و هادا صحيح أكيد و طبعا أنا للآن ضده في هادي النقطة👆🏽 ولكن من جهة أخرى لمن جيت أفكر مع نفسي قلت إنو أنا لمن بأروح سيفورا أو لمن أشتري ميك أب بأشتريه وأنا مني عارفة مين ورا الماركة .. زي مثلا ماركة تووفيسد الي كنت أموت فيها بالذات في بداياتي بالميك أب جلست أشتري منها سنين والمالك حقها طلع نفس حكاية جيفري من ناحية الميول الجنسية 😳 وأغلب الناس بما فيهم أنا ما ندري بدا الشي ... فقررت إنو بعد كدة بغض النظر عن مالك الشركة و بغض النظر عن كل من وراء الشركة من ماضي أو ميول أو غيره أنا أبدا ما حأحكم عن أي ماركة بسبب صاحبها 😶 ، وإنما حأحكم عن الماركة لإنها في النهاية ميك أب فحأحكم على الماركات حسب الميك أب وجودة الميك أب لإنو أنا بم إني بيوتي بلوقر لازم أكون عادلة مع كل الماركات وأعامل كل الماركات بالمثل بدون عنصرية 🙏🏼 ... أنا هنا مو علشان أقيم الناس وأحاسبهم في رب يحاسبهم مو أنا ....😇
علشان كدة ماركة جيفري ستار من الماركات الي حتلاقوني أشتري منها وأتكلم عليها كثير زيها زي غيرها ..
تعرفوا بنات أنا لمن أعطيت الماركة دي فرصة عرفت إنها كجودة أحسن من مليون ماركة موجودة في السوق الأرواج تجنن والشدوهات تجنن و طبعا أكيد في منتجات ما ناسبتني ولكن عموما الماركة أغلب منتجاتها تجنن😍 ..
في النهاية هادا الموقف علمني إنو أنا حتى لو كنت أختلف مع الشخص لأي سبب كان ، ديني ، إجتماعي ، سلوكي أيًا كان الجانب هادا الشي أبدا ما حيأثر على الميك أب لإنو في النهاية ميك أب وفي كثير شركات نحنا بندعمها وما نعرف ماضيها فعلى إيش نفكر في التفاصيل الي محد يقدر يحلها الا الله 🙏🏼 خلونا نركز في الميك أب فقط و نسيب الباقي على الله
💗💗💗💗💗
💗💗💗💗💗
ان شاءالله مدونتي حتكون مدونة تضم كل الماركات وكل شركات الميك أب بدون أي عنصرية وأنا جدا متحمسة إني أجرب معاكم ماركات أكثر وأقلكم تجاربي بكل صدق كمان مررة متحمسة أقلكم عن تجاربي مع منتجات ماركة جيفري ستار😃 هادا كان كل شي أتمنى التدوينة تعجبكم شفتوا كيف قلتلكم حتكون خفيفة 😆 يارب تكون عجبتكم وإنشاء الله أشوفكم في التدوينة الجيّة .
0 التعليقات:
إرسال تعليق