BEST YOUTUBE CHANNELS | أحلى قنوات اليوتيوب الي دائما أتابعها ؟

  بسم الله الرحمن الرحيم  

السلام عليكم بناااااات كيف حااااالكم 💘 إيييييش أخباركم اليوم أنا جياكم بتدوينة قنوات اليوتيوب الي ما أفوتلهم فيديو واحد كل فيديوهاتهم أتابعها من جد من أحلى القنوات الي أتفرجتها وحيكون في كثير قنوات عربية و سعودية فيلا بدون ما أطول عليكم خلونا نبدأ لإنو القنوات كثييييير😆👌🏽... قبل ما أبدأ أبغا أقلكم إنو أسماء القنوات موجودة في الصور الي رح أحطها لكل يوتيوبر ...

  JENNA MARBLES  

جينا ماربلز الكوين حقت اليوتيوب أحبهااااااااااااا💗 من أكثر قنوات اليوتيوب الأجنبية الي أموت فيها محتواها زمان يمكن قبل ٦ سنين كان مختلف عن دحين كل سنة تتطور وتسير أفكارها جميييييلة ليش أحبها🤩 ؟؟ لإنها ما تتصنع وباين إنها تسوي فيديوهاتها من قلب وعلى طبيعتها ١٠٠ ٪ أحترم الناس القليلين الي زيها😄.. كل أربعاء أستنى الفيديو الي حتنزله .. وعلاقتها مع حبيبها جوليان سولوميتا مرررة تعجبني مرررة أحبهم مع بعض ما شاء الله أحس من يوم ما عرفته قبل يمكن ٦ سنين سارت فيديوهاتها غير وأحلى مررررررة رهيبة جينا ماربلز .. نمط فيديوهاتها ممتع ومهو محدد فكل شي تحط يدها ههههههه يعني تحب تغامر بالأفكار وتعمل أشياء غريبة .. لو تبغوا تنبسطوا أتفرجولها .

  JEFFREE STAR  

جيفري ستار هادا الآدمي بعيدا عن إنو أنا أحب ماركته أو براند الميك أب حقته مررررة أحبها هههه💘🤩 .. إلا إني كنت زمان أبدا مني متقبلته الين ما أعطيته فرصة و بصراحة أنصدمت من تعبه وشغله على قناته فيديوهاته فيها أفكار مختلفة ولكن متمحورة حولين البيوتي والميك أب .. يعمل ريفيوهات لماركات ميك أب معينة والي يعجبني فيه إنو صريح ويدي في الوجه الي يعجبه يعجبه والي ما يعجبه يقول ما عجبني بكل ثقة أبدا ما يجامل👌🏽.. وأكثر الفيديوهات الي أحبها لمن ينزّل كوليكشن جديد لماركته ويعمل فيديو يعرض فيه الكوليكشن لأول مرررة قبل ماينزُل في السوق ما تتخيلو قد إيش أنبسط وأتحمس مررررة أتحمس وأعاير المنبه وأجلس أترقب الفيديو هههههههه🤣🤩.. الي يحب الميك أب ويبغى قناة بيوتي ما ينمل منها يتفرج لجيفري شخصيته غريبة وفي نفس الوقت مرحة .. جدا أحب قناته .

  SHANE DAWSON  

شين دوسن من اليوتيوبرز الي أسّسوا اليوتيوب في بداياته👆🏽😌 مثل جينا ماربلز لكن زمان ما كان ياخذ
 حقه ولا كانت أفكاره زي الآن👌🏽😍 .
 تقريبا في سنة ٢٠١٨ سار يعمل أفكار فيديوهات تجنن ... من الأفكار مثلا انو يحاول في يوم يعيش حياة بنت فقدت بصرها زي كدة أفكار غريبة ومرررة تشد وتحمس وتخليكم تبغوا تتفرجوا .. كمان في نفس الفترة سار يعمل فيديوهات وثائقية أو دوكيومينتاري💘.. تقريبا السنة الي فاتت كانت السنة الي قدر شين يوصّل فيها صوته للعالم ويثبت نفسه ... من جد إنسان مبدع وأفكاره إبداعية وأحس لو فضل كدة حيسير ملك اليوتيوب🙏🏼 وبصراحة يستاهل .

  LYAN MAKEUP  

ليان ناصر من أكثر الميك أب أرتيست السعوديات الي أحب شغلهم😘🙏🏼  أحس ما شاء الله تبارك الرحمن يدها زي السحر خفيفة و تشتغل على إبراز الملامح مكياجها يحلّي .. في كثير ميك أب ارتيست يحولوا الملامح لدرجة إنو ما تعرفي نفسك انا ليان تبرز الكلامح بشكل طبيعي أنا عن نفسي أحب أكون أنا ولكن ملامحي تكون أحلى وبارزة عشان كدة مررررة عجبني شغل ليان ويارب في يوم من الأيام تعملّي مكياجي يااااااارب😍💘.
شوفوا قناتها تجنن تدخلوا عالم تاني وإنتوا تتفرجوا فيديوهاتها وما شاء الله إختياراتها للمودلز موفقة و دايما
 مكاجها رهيب على كل المودلز .

  IRAHAFALG  

قناة البلوقر رهف من الرياض أتابعها من زمااااان ومررررة أحبها😍💘 كنت مشتركة في قناتها عاليوتيوب لكن وقتها ماكانت مركزة عاليوتيوب بسبب دراستها و كدة الين ما تقريبا على السنة الي فاتت أو الي قبلها سرت ألاقي نفسي أحب أتابعها أكثر وأكثر وما شاء الله عليها غير باقية اليوتيوبرز السعوديات التانيين ماشاءالله سارت ماخدة موضوع اليوتيوب بجدية أكثر وسار عندها جدول ماشية عليه وسارت قناتها متجددة 😘👌🏽 ودايما تنزل فيديوهات وأفكار جديدة تحمسسسسسسس ... من جد سرت متعلقة برهف من فيديو لفيديو ولمن أخلص فيديوهاتها أروح على إنستقرامها أروّق على ستورياتها مررررة أحبها🤩 أحب جوّها أحب طريقتها في الكلام و عفويتها وإصرارها و حبها للجمال والفاشن وعلى قد مهي مضغوطة في الجامعة والدراسة ما تقصر أبدا في تنزيل الفيديوهات ... مهي زي اليوتيوبرز والبلوقرز الي لمن يوصلوا لمرحلة معينة يسيبوا كل شي وينزلوا فيديو كل ٦شهور هادا اذا نزلوا فيديو من أساسو ..الي يعجبني في رهف إنو رغم إنشغالاتها وظروف الحياة تحاول توفق بين شغفها وهوايتها ودراستها فما تقصر لا على متابعينها ولا على دراستها أنا جدا أحترم فيها هادا الشي .. غير إنو فيديوهاتها متنوعة مو بس فاشن كمان تعمل فيديوهات مفضلات وبيوتي وفلوقات وروتينها المسائي والنهاري وغيره 💘💗..
فأفكارها متنوعة وأنا مرة تانية أقلك يارهف أنا مررررة أحترمك ويارب أقابلك لمن تجي جدة .
ما حتندموا أبدا.. أشتركوا في قناتها من جد تجنن الآن قناة رهف من أكثر القنوات العربية الي أتابعها
وأعيد فيديوهاتها كل ما أطفش ..

  KATHLEEN LIGHTS  

كاثلين لايتس غنية عن التعريف أمووووووووت فيها أحب شخصيتها 😀🤩👌🏽 مررررررة كيوت ومرحة تجنن عفوية وأحسها طييييبة لأبعد درجة وحريصة جدا إنو ما تزعل متابعينها قناتها تهتم بالجمال والعناية
 أحب ريفيوهاتها وكل شي تقدمه من جد
 جميلة من برة ومن جوّة لاااااازم😎💘 تشتركوا في قناتها .

  SUMAIA HAREB  

سمية حارب من الإمارات و ياجمال الإمارات و أهلها يا الله قد إيش هادي الإنسانة راقية و متواضعة جدا💗🌸 الي يعجبني فيها إنو محتواها و طريقة عرضها للفيديوهات مرييييحة مرررة أحب ستايل فيديوهاتها برضو قناتها تهتم بالعناية والجمال والريفيوهات😘🙏🏼 .. ملتزمة بالفيديوهات ما شاءالله عليها ما تقطع اليوتيوب في كثير قنوات عربية لبنات عربيات مشتركة فيها ونسيت إني مشتركة لإنهم ماينزلوا الا نادرا يعني في السنة مرة .. أما سمية الله يعطيها العافية دايما فيديوهاتها متجددة وماشية💘.

  LYDIA  

قناة البلوقر البريطانية ليديا للأمانة ما أتابعها كثير 😀، ولكن أتابعها في الأوقات الي أبغا آخد فيها إلهام للترتيب والتنظيم بيتها ماشاء الله مرتتتتتتتتتب مرة يعجبني ديكورها للبيت مرررة كلاسي بإختصار يعجبني ترتيبها وتنظيمها لبيتها😘🙏🏼وكمان أحب ملابسها أنييييييقة لأبعد درجة فيديوهاتها تعتمد على الفلوقات والتنظيم وأحيانا مفضلات يعني أحسها تركز على الفاشن واللايف ستايل💗 .

  DALYA  

داليا من البلوقرز السعوديات الي بدأت من فترة اليوتيوب و أنا مررررة أنبسطتلها🌸
داليا من يوم ماشفت مدونتها وأنا طايحة في غرام تصويرها وجوها ورقانها وشخصيتها وكمان حبها للقهوة😘👌🏽 .. داليا أم وأكيد مضغوطة مع أولادها الله يحفظلها هما ، ولكن مع ذلك الي يعجبني فيها إنها ما تستسلم للضغوطات سارت تشتغل أكثر على اليوتيوب وعلى مدونتها😀🤩 حسب مقدرتها كمان داليا عندها بزنسها الخاص الله يوفقها يارب نوع فيديوهاتها لايف ستايل أكثر يعني ما تهتم بنوع معين ودا الي عجبني فيها أحيانا تنزل فلوقز وأحيانا مشتريات وأنا عارفة إنو قناة داليا حتكبر أكثر وأكثر لإنها تستاهل الدعم و أنا حأفضل دايما أدعمها وأتابع شغلها😃.

  TATI  

تاتي هي الإنسانة الصريحة والواعية تديني الزبدة من ناحية الميك أب والعناية😍🙏🏼 والي دايما أروح لفيديوهاتها لمن أكون أبغى آخذ فكرة إيش الي يستاهل أروح أشتريه وإيش الي لأ ..أحب نصايحها أحسها أختي الكبيرة الي أرجع لفيديوهاتها لمن ابغا المشورة في الميك أب هههههه😇👌🏽 .. تاتي من الناس الي أحب فيها مصداقيتها ١٠٠٪ ما تكذب في ريفيوهاتها ولا تاخد فلوس من براندات ولا عندها أكواد بإسمها يعني بإختصار ما يهمها الفلوس يهمها سمعتها ومصداقيتها🙏🏼... عندها براند خاص فيها HALO BEAUTY أنا شخصيا أبغا أجرب من ماركتها وحأقلكم رايي أكيد ..
بإختصار فيديوهاتها مفييييدة في مجال العناية والجمال وتعطي نصائح ذهب من جد ما تلعب كلامها محسوب مررررة أحبها إنسانة فااااااااااهمة🥰.

  التلفاز ١١ 

قناة التلفاز ١١ ما أتابع في هادي القناة الا شي واحد فقط هو
توب ٥ 🥰👌🏽 بنات توب فايف يجنننننننن من تقديم صهيب قدس غالبا أنصحكم تتابعوا القناة وتتفرجوا بالتحديد توب ٥ وإن شاءالله حتدعولي😘💘.

  BODMON ZAID  

قناة بودمون زيد للبنت دي الكتكوتة إسمها لايبة قناتها تهتم بالميك أب والعناية 💗😍 البنت دي أنا أحس إني نسسسخة منها من ناحية علاقتها😀 مع أمها وأبوها وأخوانها في فيديوهاتها تطلّع أهلها وأخوانها ومن جد أحس حياتي زي حياتها تحب البيت وتحب تكون لااااصقة مع أمها وأخوانها ههههههه وتفضّل تجلس في البيت عن إنها تخرج مع صحباتها هههه زيي مرررة تعجبني فيديوهاتها تنزّل كمان فلوقات ..زمان كانت فلوقاتها في نفس هادي القناة لكن الآن خلّت هادي القناة للميك أب والعناية فقط وعملت قناة تانية فقط للفلوقات .. كمان أحيانا تعطي نصايح في الفيتنيس والرياضة والدايت في رمضان لإنها مسلمة مرررة يناس عليها🥰 حتعجبكم قناتها .

  LAIBA ZAID  

وهادي قناة لايبة الخاصة بالفلوقات تجننننننننن القناة🤩💘ما أضيع ولا فلوق أحبهاااا هنا حتشوفوا علاقتها
مع أهلها مزبوووووط .. شوفو يمكن أنا الآن مجمعة زي ٨ فلوقات لسة ما أتفرجتهم أبغا أروق عليهم😂🙏🏼 .

  KALYN  

قناة كايلين هادي البنت أنا نفسي أعيش معاها أسبوع بس هههههه🤩 عارفة نفسي لو عشت معاها حأسير منظمة وحأنجز وحأحقق كل أحلامي بعد الله أكيد🙏🏼 .. قناتها قناة لايف ستايل فيها فلوقات وفيديوهات جمال وعناية وفيديوهات فاشن وتنظيم للحياة .. أحسها مرررررتبة يعني كل شي محسوب في يومها متى تصحى متى تعمِل رياضتها متى تاكل متى تشتغل متى تنام ومتى تنبسط💗... تعطيني طاقة إنو لااااازم أقوم أسوي شي مفيد في حياتي من جد كل ما أكون محبطة وأحس نفسي مامنّي فايدة أتفرج فيديوهاتها وأول ما أوقف الفيديو أقول لنفسي شهد قومي أتحركي أنجزي غيري من نفسك وغيري العالم هههههه تحفزني إني أتغير ويكون ليا هدف في الحياة إنسانة رهيييبة وفيديوهاتها ممممممتعة حتدمنوا فيديوهاتها أنا عارفة .

  THE SAUDI REPORTERS  

قناة سعودي ريبورترز للأخوين التوأم عبد العزيز وعبد الله من أكثر القنوات الي تفتح النفس أفكارهم متجددة و غير عن باقي القنوات روحهم حلوة مرررة ما أقدر أحدد قناتهم إيش نوعها💙 بس يمكن يكون نوعها إنترتينمينت أو تسلية و متعة أفكارهم تجنن وما تطفش ومهي مكررة يعني قناتهم فريدة من نوعها عن باقي القنوات أنصحكم تتابعوهم .

  رنا الغامدي  

قناة رنا الغامدي كنت مشتركة فيها من زماااااااان من أيام ما كانت فيديوهاتها بدون ما تطلع صوتها بعد كدة أتزوجت وسارت تصور يومياتها وحياتها كزوجة كمان سارت تطلع صوتها وجودة الفيديوهات ساااارت تجنن احسها تتعب في التصوير وكدة مرررررة أحب يومياتها🥰🌸 لمن أبغا أتفرج على شي جديد علطول أروح لقناتها
 بدون تفكييير👌🏽 .

  JAY SAJER  

قناة الجوهرة ساجر من القنوات الي كنت برضو مشتركة فيها من البدايات الجوهرة من الناس الملهمة ليا وكتبت عنها تدوينة زماان😄💙 أحس فيديوهاتها مرررة جميييلة مع إنها ما سارت تنزّل زي زمان كثير و لكن برضو أنا أشوف إنو الجوهرة من الناس المميزين والملهمين تصور😍💘 فلوقات ونصايح بيوتي وعناية كمان عندها قناة خاصة
بسفرياتها لاااازم تتابعوها تجنن دي البنت😀 .

  BAYANOLA92  

قناة بيان من أكثر القنوات المميزة الي عندي الي يعجبني في بيان إنها ما تتكلف في الفيديوهات🥰💗تطلع على طبيعتها تجلس و تتكلم على الكتب و تعملّهم ريفيوهات أحب نظرتها و طريقة إختيارها للكتب صح إنو إختيارتها غير عني وعشان كدة أحب أشوف رأيها دايما أحس هادي البنت مثقفة وواعية وناضجة😉💙 ومررررة حبوبة قناتها تجنن بذات إذا تحبو الكتب لازم تشتركوا في قناة بياااان .

  A CHIC THING  

من أحلى قنوات الطبخ الي أتابعها😀🌸 الفيديوهات ما تعدي ال دقيقتين سريعة وجودة الفيديوهات تجننننن التصوير هايكواليتي والطبخات لزيزة وسريعة لاااااازم تشوفوا القناة وتشتركوا فيها💘 .

  VANILLA CANNELLE  

الأختين روعة والجوهرة قنااااااتهم رهيييبة وكيوووووت يحبوا يصوروا يومياتهم في فلوقات حللللوة💗 يصوروا يومياتهم في الجامعة وغيرة يحبو الرسم والفيديو قيمز مرررة فيديوهاتهم تفتح النفس أحبهم سرلهم فترة ماينزلوا زي زمان بس برضو يستحقوا المتابعة💘😀 .

  NOUF BEAUTY  

نوووف مرة أحب قناتها من الإسم باين إنها قناة تعتمد على الجمال والعناية بس كمان تصور فلوقز مرررة أحب أفكارها ما حتملوا من قناتها و ما شاءالله عليها تنزّل فيديوهات داااايما تجنن قناتها تستاهل المليون متابع🤩💙 أتمنى إنها ما توقف وتكمل زي ما هيا كدة قناتها رهيييبة أنا فخورة ببنات بلدي واللللله .

  THAT RED LIP  

ذات ريد ليب أو البلوقر أسماء غنية عن التعريف مرررة أحبها كنت أتابع مدونتها وأول ما عرفت إنها بدأت في اليوتيوب قلت لازم أشترك في قناتها تعتمد القناة على الفلوقز غالبا😘😍 وبرضو تصور مشترياتها وغيره بس أكثر شي يعجبني في فيديوهاتها التصوير وطريقة عرضها للمحتوى عندها ستايل خاص فيها 

تحب الفاشن وكمان الجمال والعناية قناتها تستاهل .

  MIRANDA SINGS  

قناة ميراندا سينقز قناة من غير أي هدف ههههههههه🤣🌸 ... ميراندا سينقز شخصية كوميدية تلعب هادي الشخصية اليوتيوبر كوليين بالينجر و كوليين أنشهرت بشخصية ميراندا ... الشخصية مررررة كوميدية وتضحك لمن أكون متضايقة وأبغا جرعة سعادة أشوف قناة ميراندا تخليني أنسى همومي ههههههههههه😂 .

  KENDALL ALFRED  

قناة كيندال ألفريد تهتم بالبيوتي والعناية أحب ريفيوهاتها جدا لإنها صرررريحة تقول رايها بدون ما تجامل مرررة أحب قناتها أكثر شي احبه فيها مصداقيتها😘💘 تعمل ريفيوهات للميك أب الجديد في السوق أحب فيديوهاتها وأحاول دايما أتابع الناس الصريحين معايا ومايلعبوا في ريفيوهاتهم🤩💗 .

  HANEEN'S PASSION  

قناة حنين تهتم بالفاشن والبيوتي واللايف ستايل👌🏽😘 في تنوع في قناتها وتصويرها يجيب السعااادة يبغالي يوم كدة أروق على فيديوهاتها مررررة أفكار فيديوهاتها تعجبني مرة تانية أقول أنا منبهرة من بنات بلدي قد إيش هم مبدعييييين ويارب من تقدم لتقدم وحنين من الناس المبدعين الي أنا أحبهم .

  JULIEN SOLOMITA  

تتذكّروا لمّن فوق قلتلكم إنو أنا مرررة أحب علاقة جينا ماربلز مع حبيبها جوليان سولوميتا😍💘.. هادي القناة الخاصة بجوليان علشان أتابع الإثنين جينا وجوليان أحس إنو سرت متعلقة بيهم جوليان يصور فلوقز ويوميات وتصويره إحترافي وهو أصلا مهووس بالتصوير مررررة أحب فيديوهاته بعد ما أخلص من قناة جينا أروح جري على قناة جوليان قناته تجنن💗 .

  MAHER MOSLY   

قناة ماهر موصلي أحلى قناة بإختصار لمراجعة المسلسلات والأفلام الأجنبية ماشاءالله عليه يحب الأفلام والمسلسلات ويتابع كثير ومتجدد ف الي يحب الافلام والمسلسلات لااااازم يتابع قناته حاليا عامل فيديوهات تلخيص لسيزونات قيم أوف ثرونز كلها عشان الي حابب يعرف الزبدة ويتابع الجزء الثامن علطول 💘🌸...
لازم تتابعوا قناته رهييييييبة فيها ريفيوهات ومراجعات تجنن .

  NICOLE GUERRIERO  

نروح للقمر والعسل نيكول قوريرو مرررررررة أحبها الإنسانة دي عايشة في عالمها مع الميك أب بعيدة عن الدراما والكلام الفاضي 🙏🏼🤩 ودا الي يعجبني فيها نزلّت مع اناستازيا هايلايت يجنن وبإختصار ما تلعب في الميك أب😘 تعرف هي إيش تحب وإيش ما تحب قناتها تعتمد عالجمال والتوتوريالز وكمان عندها سلسلة فلوقز يجننو الي يتابعني من زمان يعرف إني أحب نيكوووووول مرة تابعوها😀.

  JACLYN HILL  

جاكلين هيل الكويييييييين من جد مرررة تعجبني عندها تكنيك في الميك أب 👌🏽😍 متحمسة على ماركتها الخاصة فيها ... جاكلين هيل معروفة في مجال البيوتي والجمال مررررة أحبها عفوية و كدة كلها طاقة هايبر ههههه😃 أحيانا عفويتها الناس يفهموها بطريقة غير .. مررررة أحبها وأحب أشوف رايها ومفضلاتها في الميك أب ما تقول على
 شي حلو ويطلع مو حلو أبدا .

  HAMIYET AKPINAR  

قناة هامييّت مررررة تعجبني هي ميك أب أرتيست تركية دايما تسوي ميك أب للمشاهير الصراحة مو دايما تعجبني اللوكات الي تعملها بس بم إني أتفرج تركي من زمان و نوعا مّا.. أعرف الممثّلات أغلبهم فكدة أحب أشوف هي كيف تسويلهم
 الميك أب حقهم😇💗 .
وبس يا حبايبي هادي كانت أحلى قنوات اليوتيوب عندي لو تبغو جزء ثاني قولولي لإنو لسة عندي قنوات كثير بس هادي القنوات للأمانة هي الأكثر الي دايما أتابعها💙 أشوفكم إن شاءالله في تدوينة جديدة ومع السلامة .

2 comments LIFESTYLE