MARCH FAVORITES | مفضلاتي لشهر مارش

  بسم الله الرحمن الرحيم  

كيف حاااالكم مررررررة وحشتوني🤩 كيفكم و كيف نهاية السنة معاكم والإختبارات ؟؟ إن شاءالله الكل ينجح بأعلى الدرجات يارب و تاخدوا الإجازة الكبييييرة 🙏🏼 !! 

اليوم التدوينة حتكون خفيفة لطيفة عليكم وحأتكلم فيها على مفضلاتي لشهر مارش😎  فبدون ما أطول عليكم يلا نبدأ !!

  ١- مسلسل زهرة الثالوث  

بصراحة حاليّا ما بأتفرج مسلسل تركي الا مسلسل زهرة الثالوث وقّفت كل شي و طحت عليه من أسبوع وياااااا الله قد إيش هادا المسلسل حلو وأجوائه غييييير💘 .. سرلي تقريبا ٨ سنين أتفرج تركي بشكل متواصل فسرت أعرف إيش المسلسل الحلو وإيش الي لا ومن الإعلان أعرف هل المسلسل قوي أو ضعيف☺️ .. دا المسلسل من المسلسلات الي من يوم ماشفت أول حلقة وأنا خلاااص أخد عقلي وقلبي وكل شي😘 .. الممثلين رهيبين وبعضهم أعرفهم من مسلسلات ثانية والأبطال أول مرررة أشوووفهم ولكن تمثييييلهم يجنن وقوي نروح لقصة المسلسل باختصار : البطلة بتلعب دور ريّان بنت جدا طيبة جدا ومسالمة وفي نفس الوقت مؤمنة بالله و مؤمنة بأحلامها💗وهي من عائلة تشاد أوغلو دايما ريان تحس نفسها مخنوقة و نفسها تسير حرة بسبب تعذيب جدّها لها ودايما يعاملها بشكل مختلف عن باقية أحفاده .. نروح للبطل يلعب دور ميران💙 في المسلسل ، ميران من عائلة اصلان بيه ومن يوم ماكان صغير جدّته كانت تغرس فيه روح الإنتقام من عائلة تشاد أوغلو بسبب إنهم هم السبب في موت أم و أبو ميران .. فيوم من الأيام يكون ميران ماشي في الطريق الصباح بسيارته ويصادف ريان في طريقة فيعرف إنها من عائلة تشاد أوغلو
 ومن يومها ريان حياتها تنقلب .. هل للأسوأ أو للأحسن حتشوفوا لمن تتفرجوا المسلسل

 للآن قصة التّار الي بين عيلة تشاد أوغلو وأصلان بيه مهي معروفة .

شخصية ميران شخصية فيها روح الإنتقام والغضب عشان أهله الي ماتوا وهو صغير وفي نفس الوقت فيه جانب جدا طيب وحنون بذّات لمّن يتعلق الموضوع بريّان😍.. ميران وريان بإختصار أنحطوا في قصة إنتقام هم مالهم ذنب فيها لكن بسبب أهلهم تتغير حياتهم وعيشوا حياة مفروضة عليهم .

المسلسل جدا جمييييل لساعه دوبه ٤ حلقات😀 يعني المسلسل جديد ولكن من أقوى المسلسلات دي الفترة وإن شاء الله يفضل قوي وتفضل الأحداث قوية علطول وما تتغير .. أنصحكم تتفرجوة وصدقوني ما حتندموا👌🏽.. الي عندهم إختبارات خلّصوا من إختباراتكم وبعدين أتفرجوه عشان تركزوا في الدراسة والي مخلّص دراسة لا تفوّتوه مررررة حلوووو المسلسل .

  ٢- مكياج و عناية 

  THE ALIEN PALETTE  

الإيليان باليت من جيفري كوزماتيكس👽💗  أشتريتها في البلاك فرايدي للسنة الي فاتت ٢٠١٨ و من يومها و أنا طاااايحة فيها كل العزايم والمناسبات الي رحتها من داك اليوم وأنا بأستخدم فيها هادي الباليت .. ما كنت أفكر نفسي إنو رح أحب الألوان الكول تون أو الألوان الباردة لكن من جد دي الباليت طلّعتني من الكومفيرت زون حقتي👌🏽 وخلّتني أجرّب ألوان أكثر ما كنت أتخيل نفسي أستخدمها للأمانة ما جربت كل الدرجات..  بس الي جرّبتهم عجبوني مررررة رهيبين وسهلين في الدمج اللون الوحيد الي كان صعب دمجه هو اللون البنفسجي غير كدة الألوان تجنن من جد هادي الباليت أكيد حأجلس أستخدمها أكثر لإني جدا متحمسة أجرب الألوان الي لسة ما جرّبتها🤩🙏🏼 ... عموما هادي الباليت أنصحكم فيها أشتريتها أونلاين من موقع جيفري كوزماتيكس الرسمي ب ٥٢ دولار يعني تقريبا ١٩٥ ريال سعودي .

  SUPREME FROST IN HYPOTHERMIA  

هايلايت السوبريم فروست من جيفري كوزماتيكس إسم الدرجة هايبوثيرميا🌸👌🏽 .. أول شي أبغا أتكلم عن تركيبة السوبريم فروست مرررة تجنن ناااعمة والهايلات يبان كإنو مبلول عالبشرة دي الدرجة بالتحديد أستخدمها على الجفن المتحرك كآيشادو .. الطريقة اني أحط أول شي على جفن العين المتحرّك غراء للقليتر من توفيسد وبعد كدة أحط هادا الهايلايت فوقه لإنو هادا الهايلايت مليان قليتر ناااعم فيحتاج غراء تحته😀 .. كل الي يشوفني حاطته على عيني كشادو يقلي إيش الشادو الي حاطته وهو هايلايت😂 .. مع الإضاءة يعطي لمعة رهيييبة للعين وإنعكاس حلو أحيانا يبان على موف وأحيانا يبان على أزرق شوية حسب الإضاءة مررررة حلو لكن الي ما تحب القليتر والهايلايت القوي لاتقرّب جنبه لإنو هادا الهايلايت صاارخ🤩 يعني شوية كفاية وبصراحة ما أستخدمه الا في العزايم أو المناسبات الكبيرة .. كمان أستخدمه فوق أي هايلايت على خدودي .. يعني أحط أول شي أي هايلايت أنا أحبه من أي ماركة وفوقه أحط شوية مررة من هادا الهايلايت بنات يعطي لمعة رهيييبة مررة حلو😄 ممكن القليتر شوية يتناثر بذّات لمن أستخدمه كهايلايت عالخدود ولكن ثباته حلو

 يعني يفضل جالس من أول السهرة لآخرها يناسب البشرات الحنطية و مافوق حيكون غامق عالبشرات البيضاء وبرضو للإحتياط إنتو شوفو مراجعات عنه عاليوتيوب على مختلف البشرات قبل ما تشتروا .. سعره من موقع جيفري ستار كوزماتيكس ٣٢ دولار يعني ١٢٠ ريال سعودي .

  SAGITTARIUS VELOUR LIQUID LIPSTICK   

ما حيكون في  تدوينة مفضلات بدون واحد عالأقل من المات ليكويد ليبستيك من جيفري ستار كوزماتيكس😉 هادي الدرجة ليميتيد إيديشن نزلت في كوليكشن الهوليداي لسنة ٢٠١٦💁🏻‍♀️  ولكن أنا أشتريها من بيوتي لش في البلاك فرايدي الي فات وللآن موجودة الدرجة في بيوتي لش .. الحمدلله لحّقت عليها من جد دا الليكويد ليبستيك عاش معايا لحظات حلوة فسرت أتفاءل لمن أحطه ههههه🤣 لون الدرجة موف مايل للرمادي شوية فكّرته حيكون فاتح عليا ولكن الدرجة طلعت مرررة حلوة تنفع على كل البشرات .. أنا بشرتي حنطية ميديوم تان وطلعت حلوة وناعمة عليا ... حلوة مرة دي الدرجة لكل يوم من يوم ما أشتريت الدرجة دي وأنا ما أحط غيرها الثبات عادي يعني تجلس زي ٣ ساعات لكن كمان لو حطيتو تحته مُحدد حيثبت أكثر مع الأكل أكيد حيخف اللون ولكن أرواج جيفري المطفية مرررة مريحة😇، أشتريته زي ماقلتلكم من موقع بيوتي لش وكان سعره ١٨ دولار يعني ٦٨ ريال .

  (MAYBELLINE BROWDRAMA (TRANSPARENT  

مسكرة الحواجب الشفافة من ميبيلين😎 هادي أول مسكرة حواجب أستخدمها في حياتي ما قيد جرّبت ماركات تانية وبصراحة حبيتها ما تخلي الحواجب مخشّبة أو جامدة في الملمس .. بالعكس تغطّي الحواجب بلطف وما تحسوها أبدا ولا كإنكم حاطين حاجة وتثبّت الحواجب بشكل حلو غير مبالغ فيه😆 أشتريتها من صيدلية النهدي .

  (TARTE SHAPE TAPE CONCEALER IN (TAN DEEP SAND  

من يوم ما أشتريت هادا الكونسيلر من تارت وأنا أستخدمه مرررة كثير😍 .. أكثر شي أستخدمه بدال الفاونديشن فقط على الأماكن الي تحتاج تغطية زي مثلا آثار الحبوب ، والتصبغات أحيانا من جد أكون مافيا أحط أساس وأبغا بشرتي تتنفس فأستخدم بس كونسيلر .. ما أستخدمه كثير تحت العين .. لسة للآن بأحاول أستخدمه بأكثر من طريقة ولكن عموما مرررة حبيته هادي الدرجة نفس لون بشرتي بالضبط فيبغالي أجيب واحد تاني آفتح بدرجة لأماكن الهايلايت والتنوير وبس والله الكونسيلر هادا بطل وأتوقع اني لقيتله بديل أرخص حأتكلم عنه😎😙🤫
 بالتفصيل في تدوينة لحالها.. سعر الكونسيلر من سيفورا ب ١١٥ ريال سعودي .

  (BATH AND BODY LOTION IN (JAPANESE CHERRY BLOSSOM  

هادا اللوشن دوبي إلي بدأت أسخدمه هادا الشهر أنا أبدا ما أحب إحساس الكريمات الي تخلي اليد مدهنة وما تمتصها البشرة بسرعة ، فقبل فترة بسيطة مرة جرّبت هادا اللوشن من باث أند بودي🥰 طبعا هادي الريحة بالتحديد عندي منها عطور وعندي منها الشمعة فيعني عندي كل المجموعة مررررة أحب الجيبانيز شيري بلوسوم مررررة الريحة تسطل من الجمال🤤المهم لمن أستخدمت اللوشن أمتصته البشرة سريع طبعا اللوشنات عموما تجي أخف من الكريمات فبسرعة زي ماقلتلكم تمتصها البشرة يعطي ريحة تجنن تفضل في جسمي كل اليوم🌸 وعاد لو بخّيتوا على جسمكم من العطر فوق اللوشن حيفضل فترة أطول وحتثبت الريحة أكثر أنصحكم بيه يجنن مررررة .

 RANDOM |  APPLE EARPODS

سمّاعات أبل الإير بودز🥰 من جد غيّرت حياتي كنت مرررة أتضايق من السماعات الي بسلك فكنت أبغا سماعات صغيرة بدون سلك أشيلها معايا كل مكان😌 .. فماما جابتلي هادي هدية الله يخليها ليا يارب🙏🏼  ويخليلكم أمهاتكم وأهلكم يارب ومن يومها و أنا مرررة حابّتها مشكلتها الوحيدة إنو أحيانا لمن أكون بأعمل رياضة و يحتاج إني أكون نايمة على ظهري دايما تطيح من إذني ياريت لو كان لها زي المسكة بحيث إن ما تطيح من الإذن ..لكن غير كدة مرررة حبيتها سعرها مبالغ فيه الصراحة تقريبا كانت ب ٨٠٠ ريال والأماكن عندنا التسعيرات مختلفة😳 مو كلهم سعر واحد مع الأسف .
...............................................
و بس حبيباتي هادي كانت مفضلاتي الفترة الي فاتت وأنا حطيتها في شهر مارش😀 أتمنى التدوينة تكون عجبتكم لا تنسو تضيفوني عالإنستقرام : THATBEAUTYANGEL
وإن شاءالله أشوفكم في تدوينة جديدة مع السلااااااااامة🙏🏼 .

Leave a Comment Makeup