بسم الله الرحمن الرحيم
السلام عليكم بنات كيف حالكم حبيباتي وحشتوني قد البحر🥰💗 سنة 2019 من السنين الي حصلتلي فيها كثير أحداث مصيرية في حياتي وكانت في النازل والطالع مافي وسط 😓 لكن الحمدلله على كل حال وأنا بأحاول قد ما أقدر إني أخلي باقي السنة بم إنو الآن راح النص وباقيلنا النص الثاني أبغا دي السنة تكون حلوة وغير إن شاءالله ربي🤩 يكون كاتبلي باقية السنة خير عليا وعليكم يارب ...
بعيدًا عن الأحداث الّي سارت معايا .. سنة 2019 مليانة بالدراما والمشاكل بالذات في اليوتيوب😳 أنا دايما ما أحب أتكلم في الحاجات السلبية الي بتسير في الدنيا عموما وأحب إنو مدونتي تكون مكان إيجابي ومحفّز للجميع بس من جد ما أقدر أتجاهل مشكلة براند أو ماركة اليوتيوبر جاكلين المعروفة بجاكلين هيل سابقًا ليش 👆🏽؟؟ علشاني ما أبغا يسير فيكم زي الي سار مع الناس ولا تجرّبوا من الماركة الا بعد ما تتزبط كل المشاكل الي حاصلة مع البراند😶 فخلينا ندخل في الموضوع وأقلكم كل الي حاصل مع جاكلين كوزماتيكس ...
يوم 23-5-2019 جاكلين نزّلت فيديو عاليوتيوب أعلنت فيه عن ماركة المكياج حقتها وإنو أول شيء حتنزله في البراند حقتها أرواج نود أو أرواج درجات اللحمي والبني💘 .. طبعا أنا داك اليوم مثلي مثل أغلب الناس الّي أتحمسوا معاها ويتابعوها من زمان .. قلنا إنو نبغا ندعم البراند ونشتري من عندها ففي يوم انطلاق الماركة بالضبط يوم 30-5-2019 يعني قبل ١٧ يوم من الآن أطلقت جاكلين الأرواج وبدأت تبيع الأرواج أونلاين في موقع الرسمي للماركة أو البراند 😍🙏🏼 وأنا داك اليوم كنت معايرة المنبه وأول ما نزلت الأرواج أشتريت وهادي صورة من رسالة التأكيد الي جاتني .
وطبعا بم إني عايشة في السعودية الطلبية لو كانت عن طريق أراميكس تاخد تقريبًا أسبوعين عشان توصلني يعني إن شاء الله على اليوم أو بعده حتوصلني والله يستر من الي حأشوفو ههههه😓 .. في هادي الفترة الي هي الأسبوعين الي فاتو الأجانب بالذات الي في أمريكا وصلتهم شحناتهم علطول وبدؤوا يستخدموا أرواجها البعض القليل الي كانوا مبسوطين من الأرواج لكن الأغلب كانوا جدًا مستائين من الأرواج😳 وهنا طبعا الناس ماسكتوا بدؤوا يصوّروا الأرواج والمشاكل الي كانت تظهر منها ..
في يوم من الأيام جات بنت إسمها Veronica رسلت لجاكلين على تويتر إنو ترا الروج الي اشتريته من عندك الي درجته إسمها Decaf طالعة منو حاجات زي دائرية مكوّرة صغيرة هل هادا الشي طبيعي أو لأ😓😳 ؟؟ والبنت قبل يومين كانت برضو مصوّرة على تويتر إنها مبسوطة من الأرواج لانو طبعا كانت دوبها واصلتها فالبنت مسكينة كانت مبسوطة ومتحمسة وصوّرت سواتشات للدرجات وكدة لكن طبعا بعد يومين من إستخدام الأرواج رسلت البنت لجاكلين إنها شايفة حاجات مهي طبيعية بتطلع من الـأرواج زي كإنها قطع دائرية بلاستيكية 😓..
بعد كدة جاكلين ردت على Veronica بطريقة دفشة وطريقة وقحة إنو كيف إنتي تقولي إنو أرواجي فيها مشكلة وإنتي قبل يومين كنتي مبسوطة بيها وإنو بعد يومين جيا تتكلمي وتقوليلي أرواجي بتطلع منها حاجات غريبة وقالتلها إنو واضح إنو الحاجات الي طلعت بسبب إنك أستخدمتيها وسارت مهي فريش من المصنع زي لمن وصلتك أو إنّك أستخدمتيها فوق أرواج تانية أو كانت شفايفك ناشفة أو غيره 😳😳..
طبعًا أغلب الناس أستاؤوا من رد جاكلين عالبنت وأغلبهم دافعوا على البنت وقالوا إنو ترا مو بس البنت هادي الي عندها مشاكل وبتشوف حاجات غريبة بتطلع من الأرواج البعض لقى كور دائرية بلاستيك تطلع من الروج والبعض لقى الأرواج بتتكسر😶 وتسيح من غير أي مجهود وغيره.. دحين حأوريكم صور من الحاجات الغريبة الي الناس لقوها..
هادي البنت لقت شيء أبيض زي العفن طالع من الروج 🤢🤮 ..
والبعض زي هادي البنت لقوا سطح الأرواج بعد أول إستخدام سارت خشنة وطلعت عليها زي الخطوط مع نقط صغيرة صغيرة سوداء اللون😶😦 ..
وبرضوا طلعوا ناس أكثر عندهم نفس مشكلة البنت الأولى مشكلة الكور الدائرية الي زي البلاستيك🤢وطبعا الناس ساروا يكسروا الأرواج ويطلعوا منها حاجات غريبة عجيبة مالعالم بيها الا الله👎🏽 من جد شي غريب إيش هااااادا !!!
شوية شوية ساروا الناس يشوفوا فايبر أو شعر طويل بيطلع من الأرواج خلاص الناس بعد كدة بم فيهم أنا كلنا مستعجبين ومستغربين إييييييييش في إيييييييش الي حاصل 🤭😵🤮🤢 ليش كدة طبعا هادا كلو بيسير وجاكلين كانت ساكتة وكل ما أحد يسألها تقول ماركتي أنا حأفضل وراها ونحنا مستحيل نبيع شي منتهي الصلاحية وكلام كثير غير منطقي وما يدخل الدماغ ..
بعد كدة جات هادي اليوتيوبر الي أنا أحييها على صدقها لمتابعينها إسمها كريستي💘💗عملت مراجعة مفصّلة عاليوتيوب عن تجربتها مع أرواج جاكلين وبالمناسبة إسم قناتها RawBeautyKristi
قالت في الفيديو إنها أشترت الأرواج لإنها ما كانت تعرف إنو الأرواج حتجيها مجانا من جاكلين عشان تجرّبها وتعمل عليها ريفيو أو مراجعة بم إنو جاكلين ما وضّحت لليوتيوبرز إنو حتجيهم منتجات مجانا منها وللمعلومية هادا الشي لازم يكونوا داريين بيه اليوتيوبرز من قبل يعني كان المفروض جاكلين تدي علم لكل يوتيوبرز إنو ترا حتوصلكم منتجات مني عشان مايروحوا يخسروا ويشتروا بم إنو حتجيهم مجانا 👆🏽.. فالبنت أشترت زيها زي الأوادم👌🏽 والناس الباقيين بعدها بفترة جاتها الأرواج المجانية من جاكلين وجاتها الأرواج الي أشترتها بنفسها وبفلوسها المهم الشي الصادم😵🤮 الي أكتشفتو كريستي إنو الأرواج الي أشترتها بفلوسها زي باقي الناس غريبة وبتطلع فيها نفس الحاجات الي بتطلع للناس والأرواج الي وصلتها مجانا من جاكلين طلعت بيرفيكت ومافيها أي عيوب 🤭😓 ... كيييييييييف كييييييف كييييييف ؟؟؟ اذا المصنع واحد كيف الناس جاتهم الأرواج مضروبة والأرواج الي وصلت اليوتيوبرز والبلوقرز المجانية كانت بيرفيكت وبدون أي عيوب كيف😳 ؟؟؟؟!!!!! ..
بعد كدة كريستي قالت في الفيديو إنو تبغى تشوف الأرواج المضروبة الي أشترتها بفلوسها تحت المجهر المكّبر لاااايفوتكم المنظر قد إيش مقزز ومقرف تنبيه ذوي القلوب الضعيفة لا تشوفوا الصور الي حأحطها دحين ههههههه🤮
طبعا كريستي شافت كل شي الناس شافوه بس عن قرب أكثر وبصورة واضحة ومكبّرة شافت العفن ، والشعر ، والكوَر الدائرية البلاستيكية ،كمان شافت الفتحات الدائرية السوداء على الأرواج أنا ما عندي أي شي أقوله غير ايش دا يا جاكلين حراااام عليكي الناس حرااااااام فين المصداقية الي حترجع للناس بخصوص الماركة حقّتك أبغا أعرف كيف🤢 ؟؟؟؟ شعر وعفن من الأرواج .. هادي كبيرة في حق عالم الكوزماتيكس أنا بعد هادي المشكلة سرت مفكّرة أدرس أكثر عن الكوزماتيكس وأقرأ أكثر في دا الموضوع وأعرف الانقريديانت الي هي المكونات حقت الأرواج والأشياء الي بيحطوها فيها وشروط المصانع وغيره عشان من جد ما ينضحك عليا😦😓 من أي شركة كزبونة ولو مستقبلا فكّرت يكون عندي براند أو ماركة ما أعمل كدة في الناس ..الأرواج التقليد مو كدة عمري ماشفت شي زي الي شفتو دا .. أنا عارفة إنو أي شركة ميك أب أو تجميل ممكن تمر عليها مشاكل كثير سواء كان في التركيبة أو المصنع أو في الشحن بذّات في البداية لكن يوصل الموضوع لغفن وشعر هنا لازم نوقف شوية ونمسك جاكلين ونقلها برّريلنا الي بيسير نحنا نبغا نسمع تفسيرك عالموضوع وهادا الي سار الناس ساروا يبغوا توضيحات من جاكلين إنو إشبك ساكتة قوليلنا إيش المشاكل الي واجهتك عشان نديكي فرصة ونصبر عليكي ..
الأيام بتعدّي وبتطلع مشاكل زيادة ساروا في ناس بتجيهم حساسية وأعراض حساسية غريبة من الأرواج وطبعا بم إنو الموضوع سار خطورة وضرر بالصحة🤮 الناس بدؤوا يشتكوا لهيئة الغذاء والدواء بإنوا هادي الأرواج مضرّه ولازم تنسحب من السوق ... شوفوا لين فين الموضوع وصل😦 !!!!
وفي يوم من الأيام قريب جدًا أتكلمت جاكلين أخيرا عن الموضوع وبرّرت الموقف مع إنو كل الي قالتوا في نظري ما كان له أي داعي لإنو ما جاوبت على تساؤلات الناس من التساؤلات الي كانو يقولوها الناس
وأنا شخصيا كمان كنت أبغا لها رد👆🏽:
١- كنت أبغا توضيح وااااااضح وغير خيالي عن الشعر الي موجود في الأرواج والعفن والبلاستيك وغيره .. الخ .
٢- كمان كنت ابغاها توضح نظرية وتوقعات الناس لأرواجها إنها منتهية😦 أغلب الناس قالو إنو الأرواج مكتوب عليها جاكلين هيل الي هو إسمها سابقا لمن كانت متزوجة زوجها السابق الي من عائلة هيل مع إنو إسم الماركة جاكلين كوزماتيكس بدون هيل .. جاكلين منفصلة عن زوجها من سنة تقريبا يعني هادي الأرواج حسب ما الناس والمنطق يقول انو متصنعة من زمان وسرلها متصنعة بالقليل سنة جالسة في المصنع .
٣- ثالث شي كنت أبغاها توضّحه ليش الأرواج المجّانية الي رسلتها لليوتيوبرز والبلوقرز كانت بحالة ممتازة بينما الأرواج الي أشتروها عامّة الشعب كانت مضروبة وفيها مشاكل؟🤢.
٤- في ناس كثير شكّو في جاكلين إنها أساسا لا عندها مصنع ولاشي هو مصنع مورفي وشكلها عاملة الأرواج من زمان ودحين عملتلها إعادة تغليف 👎🏽 طبعا هادا كلو فرضيات والناس يبغو إجابات وااااضحة لهادي التساؤلات.
جاكلين في الفيديو الي على أساس انها وضحت فيه الي ساير أتكلمت في أوّل سؤالين وأول نقتطين من أصل الأربعة نقاط وكانت تبريراتها غير منطقية أبدااااا ...
أولا قالت إنو الشعر الي موجود في الأرواج كان شعر القلفزات🤮 الي لابسينهم الموظفين في المصنع وإنو العمّال في المصنع لمن بيجوا ينظّفوا الكونتينر الي تندمج فيه الأرواج بيستخدمو منشفة لها شعر في التنظيف 😆 يااا سبحان الله !!! دوبها تكتشف مستحيل ..اي مصنع في الحياة يكون معقم ونظيف وحتى ادوات النظافة تكون غير كان كل الأرواج الي بنشتريها من الماركات التانية مشعّرة أو فيها شعرات هههه 😆.. أنا عن نفسي عمري ما شفت شعر قلفز بهادا الطول شوفوا في وحدة شالت الشعر من الروج حق جاكلين شوفوا قد إيش طول الشعرة !!
الشعر الي بيطلّعوه الناس من الأرواج مستحيل يكون شعر قلفز أو حتى منشفة مستحييييييل لإنو الشعرات طويلة شوفوا الشعرة قدّ إيش طولها!!!!
جاكلين قبل ما تنزّل البراند حقتها نزّلت فيديو في موقع الماركة عن كيف التصنيع بيتم وغيره في الفيديو كانت جاكلين لابسة قفّاز شفاف أزرق عادي جدًا لاهو بشعر ولا شي .. نفسي أعرف إيش المصنع دا الي بتصنّع فيه الأرواج نفسي والله أشوفه .. فين الجودة فين معايير السلامة فين الرقابة 😓!!!
والطامة الكبرى إنو و الفيديو بيتصوّر الناس لقطو واحد من الموظفين في المصنع أساسا مو لابس قفّاز من الأساس🤢🤮 ..
ههههههههه طيب من فين جا القفّاز أبو شعر الله أعلم ههههههه .
🤮🤢🤮🤢🤮🤢
من الأشياء الي قالتها جاكلين في فيديو التوضيحات حقتها إنو الأرواج ليست منتهية وإنو بدأ تصنيع الأرواج في نفس الفترة الي أعلنت فيها عن الأرواج والماركة وإنو الأرواج فريش من المصنع ، وإنو النقاط أو الفتحات السوداء ماهي الّا فقاعات أكسجين 🤣🤣 وإنو الكور البلاستيكية بسبب إنو الأرواج ساحت ورجعت بردت تاني😆 ، قالت نصيحة جداااااا مهمة إنو لو كنتو في دولة حارة لا تعملو سواتش أو تستخدموا الأرواج علطول أستنوا إلين ما تبرد هههههههههههههه😆🤣 تبريرات غريبة عجيييييبة 🤣 أنا ما أقتنعت أبدًا ، كمان قالت إنو أي أحد شاف شي يكلم خدمة العملاء ويتواصل معاهم عن طريق الإيميل وهي حتتكفل انها ترجع للناس فلوسهم وتديهم أرواج بديلة للأرواج الخربانة وأضافت إنو هي حتفضل دايما وراء الماركة حقتها وإنو حتحاول تصلّح الي حصل😌.
💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️💁🏻♀️
وأخيرا حأقول رأيي المتواضع في الموضوع ..
جاكلين في السابق كان عندها مشاكل كثير لمن كانت تنزل باليتات تعاون مع مورفي بذات الأربعة باليتات الصغار الي نزلتهم مع بعض الناس كانت تجيهم الشادوهات سيئة وحاولت جاكلين تبرّر الموقف والناس ما أقتنعت وسكتت😦🤭 ودحين لمّن جات تعمل ماركتها الي تقول انها جلست تشتغل عليها ٥ سنين أنا عن نفسي قلت يا الللله أنا مرة مبسوطة جاكلين أخيرا نزّلت براند وأكيد حتكون فظييييعة💘 وأنا أول الداعمين لها والمتابعين لها من زمان وأشتريت من عندها وكنت جدّا مبسوطة لكن بعد الي شفتو منها مستحيل أقلكم أشتروا من عندها حتى لو كانت الأرواج الي حتوصلني سليمة مع إني أبدا ما أتوقع تجيني سليمة ..مستحيل أقلكم أشتروا 👎🏽🤢🤮 إلا لمن تصلّح الي ساير والناس يشوفوا إنو المنتجات مافيها عيوب وتصلّح أخطائها .. الحل كان جدا سهل 👆🏽 من البداية كان يمديها جاكلين توقّف البيع في الموقع من أوّل شخص أشتكالها على تويتر أو غيره وصورلها إنو ترا في مشكلة حاصلة عشان تتفادى الموضوع من البداية وتحلها صح إنها كانت حتخسر الكمية الي أتصنعت ولكن سلامة الناس أهم من الفلوس في نظري🙏🏼 أنا لو كنت بدالها كان سويت كدة أي براند ممكن تمر بصعوبات ومشاكل بذات في البداية لكن المفروض اذا صاحب البراند شاف الغلط لازم يكون حازم ويحل المشكلة طوالي مو يسكت بس عشان الفلوس ..
طريقتها لمن ردّت عالبنت في تويتر كانت جدّا وقحة😳😦
دائما المصداقية الأول والأخيرة للزبون لإنو الزبون ما يبغا الا إنو المنتج يجيب نتيجة غير كدة أكيد حيتكلم ما حيسكت يعني الناس ما حتتبلى عليها من الباب للطاقة الا ما حيكونوا شافوا شي غير مرضي في المنتج😶👎🏽 ، سكوت جاكلين الطويل وإستمرارها ببيع الأرواج كان أكبر غلط من وجهة نظري .
آخر شي أبغا أضيفه هو إنو أغلب اليوتيوبرز المشاهير جدًا زي نيكي توتوريال وكاثلين وتاتي وجيمس وجيفري وجاكي اينا وغيرهم الكثير ماجابوا أي سيرة عن الي حاصل مع إنو أكيد وصلتهم منتجات جاكلين وعارفين بكا الي حاصل حتى ما قالوا رايهم علأقل عاليوتيوب ودا الشي جدّا محزن😔 أنا شخصيّا حسيت إنو عشانها زيهم يوتيوبر همّ سكتوا وهادا الشي بصراحة بيقلل من مصداقيتهم بشكل جدّا كبير😒 ويدل إنهم جالسين يجاملوا بعض وكل الي بينهم مجاملات ..بالمقابل مثلا لمن يجي الموضوع عن شركة كايلي الكل تلاقوهم عملوا فيديوهات عاليوتيوب يطلّعوا عيوب الدنيا في منتجات كايلي🤨 .. كايلي للأمانة عمرهم الناس ما أشتكوا من عفن في أرواجها أو شعر أو غيره ..بالرغم من انو كايلي أحيانا ما تكون عارفة هي إيش تبغا بالضبط وكل ساعة تنزّل كوليكشن ودا الشي بيأثّر من ناحية جودة الفورميلا أو التركيبة إنو مو دايما بتكون بيرفيكت عشان ما بتدي فرصة زمنية بين الكوليكشن والكوليكشن التاني فالتركيبة عندها موثابتة في كل المنتجات وطبعا دا الشي ممكن يكون سلبي ..
ولكن مع ذلك للأمانة كايلي كوزماتيكس عمرها ما جاني منها شي مكسور أو فيلو عفن بم إني أشتريت من الماركة أكثر من مرة وللأمانة عندها كثير حاجات حلوة وعندها حاجات مو قد كدة .. ماركة كايلي مهي أحلى ماركة في العالم لكن مهي الأسوء عادية وممكن أشتري منها عادي مرة تانية .. فالتحيّز الي شفتوا من اليوتيوبرز المشاهير شي أبدا ما كنت متوقعته منهم يعني كونوا مع الحق دائما مو عشان جاكلين يوتيوبر وكايلي أساسا مشهورة وجيا من برنامج واقع تقوموا تسفّلوا في كايلي وتغطوا على جاكلين الي من جد المفروض الكل يتكلم عن المشكلة
لإنو مشكلتها سارت تأثر على صحة الناس ..
عموما أنا هنا أرجع أقلكم لاتشتروا من جاكلين كوزماتيكس الين ما تشوفوا الحلول بعيونكم وتشوفوا الناس مبسوطين من منتجاتها ودايما إنتو الي أحكموا اذا تبغوا تشتروا من البراند الفلانية أو لأ .. إن شاءالله أول ما توصلني شحنتي الي أشتريتها من جاكلين كوزماتيكس حأصورلكم هي وحأتفحصها معاكم وحأكتبلكم تدوينة خاصة بالأرواج الي حتجيني ..
أتمنى لكم يوم سعيد يا أحلى ناس أنشروا هادي التدوينة لأي أحد ما يعرف بالموضوع عشان ينتبهوا قبل ما يشتروا ولاتنسوا تضيفوني عالإنستقرام ومع السلامة .
INSTAGRAM : THATBEAUTYANGEL
جاكلين فيها جشع ان بعد كل هذا و لسى تبيع في الموقع و يحق للناس يرفعون شكوي ان يقفلون الشركه قالت افضل مصنع كذابه
ردحذفصح كلامك بعد ما خلاص الناس قاموا عليها وباعت قامت وقفت البيع ... ودحين أختفت وحتى بعد ما أعتذرت برضو الناس ما نسيوا الموضوع وللآن بينبّشوا فيه المعمل الي كانت تصنّع فيه مجرثم😞
حذف