COFFEE TALK WITH SHAHAD | ليش مكياجنا ما يطلع زي المشاهير والبيوتي قوروز ؟؟

  بسم الله الرحمن الرحيم  

أهلين بنات كيف حالكم تدوينة اليوم كان المفروض تنزل أمس🌸 لكن كنت مرررة تعبانة ماقدرت أنزلها في يومها أعذروني حبايبي ...

اليوم التدوينة كوفي توك☕️حضرولكم قهوة أو شاهي وأجلسوا روقوا معايا وخلّونا ندردش مع بعض في موضوع أنا عن نفسي مأزمني وأكيد في كثير بنات زيي حاسين بنفس إحساسي😄😂...

كثير مننا نحنا البنات وبم فيهم أنا أشوف توتوريال أو لوك معين على اليوتيوب أو الإنستقرام لمن أجي أسويه وأنسخه ما يطلع أبدا زي "المشاهير" بصورة عامة و"البيوتي قوروز" بصورة خاصة😓 مع إنو أكون جايبة نفس باليت الشادو والفرش وكل شي يعني جاهزة مجهّزة وبأعمل نفس التكنيك و مع ذلك مااااا يطلع اللوك زي ما هو عليهم طيب لييييييييش🤣 ؟؟ خليني أقلكم من وجهة نظري إيش الأسباب الي بتخلّي مكياجنا مهو زيهم . 

حطو في بالكم إنو عندنا في مجتمعنا نفس الفكرة حقت المشاهير الأجانب ولكن النسخة العربية ظاهرة الفاشينيستات ... الفاشينيستات عندنا لااازم أتكلم عنهم في تدوينة لحالها ههههه🤣 .

١- البوتوكس والفيلر :

خلونا نبدأ بكيم كارداشيان مررة يعجبني جمالها💘حتى من زمان جمييلة ..ولكن كيم لو تشوفوا مكياجها في صورها القديمة الي كانت في سنة ٢٠٠٧ حتشوفوا إنو بشرتها كانت فيها حبوب والبشرة كانت وعادية وغير مشدودة بالتالي لو تطالعوا في مكياجها زمان ما كان حلو ورهيب زي الآن☺️... الآن كيم أولا عاملة بوتوكس وشد وغيره لوجهها💉 علشان أكيد تبان أصغر وتبان بشرتها سموووث وناعمة وماتبان فيها العيوب والعمر فمكياجها أكيد حيبان أحلى .. فالبوتوكس من الأسباب الكبيرة الي بتخلي مكياجنا ما يسير زي المشاهير .

نيكي توتوريال من الناس الي كثيييير أجرب لوكاتها والنتيجة تبات بالفشل معايا ههههههه🤣 .. نفس حكاية كيم نيكي توتوريال من الناس الي عاملة بوتوكس فأكيد بشرتها حتكون بيرفيكيت وهي أعترفت بنفسها إنها عملت بوتوكس وأنا أحييها على دا الشي ومع البوتوكس عاملة فيلير لشفايفها والفيلر يخلي الليكويد ليبستيك المطفي مثلا يبان سموث وناعم ومافيه خطوط .. بعكس لمن نحنا الطبيعيين نحط ليكويد ليبستيك😓 حتبان خطوط الشفايف الطبيعية ... فنيكي ما حتكون موجودة عندها الخطوط وعيوب الشفايف علشان ببساطة هي عاملة فيلر .

٢- مستحضرات العناية بالبشرة و جلسات الفيشيال وغيره :

كثير من المشاهير أو البيوتي قوروز بيدفعوا مبالغ كبيرة لمستحضرات العناية بالبشرة اليومية 😉 وجلسات الفيشيال الي بيعملوها كل أسبوع .. مثلا تاتي اليوتيوبر والبيوتي قورو المشهورة بتدفع فلوس كبيرة على بشرتها وعندها مستحضرات غالية تستخدمها على بشرتها من ماسكات وجلسات وغيره ومؤخرا أعلنت عن براندها هيلو بيوتي وأول منتجين نزلتهم عبارة عن حبوب تتاخد عن طريف الفم خاصة بالبشرة 💗... يعني باختصار هادي الإنسانة تهتم ببشرتها جدا وتحب البشرة وتدفع على بشرتها عشان تفضل شباب ومشدودة فأكيد المكياج عليها حيكون غير العناية عندها إكسترا وغالية .

يعني نحنا صح بنعتني بس مو بالطريقة الي المشاهير يسووها وطبعا هما دايما قدام الكاميرات فلازم دايما يكونو أون بوينت .

٣- بروفيشينال ميك أب أرتيست أو بروفيشينال ميك أب تييم :

أغلب البيوتي قوروز الأجانب بيكونو متعلمين ميك أب من سنين والبعض منهم بيكون متمرس دا الشي وعندهم شهادات في الميك أب فأكيد طريقتهم وتكنيكهم في الميك أب حيكون مختلف عن المبتدئين👌🏽.

في الجهة الأخرى أغلب المشاهير والسيليبريتيز عندهم ميك أب أرتيست خاص فيهم💁🏻‍♀️ يعني مو هم الي بيعملوا مكياجهم ومو بس عندهم ميك أب أرتيست خاص فيهم☺️ هم كمان عندهم تييم كامل من المختصين للملابس وللشعر وللميك أب ولشغلهم الخاص فكل هادا يأثر إنو مكياجنا ما يكون زيهم .

٤- تعديل الصور والفيديوهات :

برامج تعديل الفيديوهات من البرامج الي من جد تنقذ هههه🤣 في حالات اللخبطة يعني لو لخبطت في الكلام لخبطت في الميك أب أقدر بكل سهولة أقص الجزء الي لخبطت فيه وخلاص لمن ينزل الفيديو ينزل بدون ولا غلطة👌🏽.

نفس الفكرة مع برامج تعديل الصور أغلب المشاهير والانستقرامرز والبيوتي بلوقرز بيستخدموا برامج تعديل الصور عشان يخفوا العيوب الموجودة في الصورة☺️... أنا عن نفسي أحب أستخدم هادي البرامج لمن أصور صور في السوشيال ميديا 

زمان كنت أصور ميك أب لوك ولازم اعدل عالصورة كنت مررة أنقهر من الخطوط الي تحت عيني فكنت أمسحها ببرامج تعديل الصور وكمان كنت أمسح مثلا لو كان عندي حبة قريبة من عيني زي كدة 😇، حتى الصور العادية الي مالها علاقة بالميك أب أعدلها من ناحية الإضاءة وغيره فلا تفكروا إنو الصور الي بتشوفوها

 سواء كانت للمشاهير أو غير المشاهير مهي معدّلة اغلبها معدلة ولا تنسوا كمان الفلاتر الي دحين سارت موجودة في البرامج والكاميرات كمان .

٥- معدات التصوير والكاميرات :

اليوتيوبرز والمشاهير لمن بيجوا ياخدوا صورة أو بيصوروا فيديو بيكون عندهم معدات للتصوير من كاميرات بروفيشينال وإضاءة من كل مكان وسيت أب خاص فيهم😀 كل هادا يأثر في الصورة أو الفيديو ويحسن من الشكل فتبان البشرة بيرفيكت والميك أب بيرفيكت ودا كلو بسبب المعدات الي يستخدموها💙.

٦- فرش المكياج :

أنا للآن مني قادرة أستوعب كمية الفرش الي بتكون عند البيوتي قوروز أو البيوتي بلوقرز أو حتى المشاهير ماشاء الله تبارك الرحمن في ناس عندهم فوق ال ١٠٠ فرشة كل فرشة لها إستخدام أنا عن نفسي مع إنو يكون عندي الفرش الأساسية بس في ناس من جد ما أتوقع حتى إنهم يستخدموها كلها من العدد الهائل الي عندهم😀... ولكن خلونا نكون واقعيين البيوتي قورو الي عندها فرش أكيد بيكون مكياجها أحسن من الي عندها فرشتين أو ثلاثة ههههه زيي لازم أشتري فرش حاااالا هههههه🤣🤣💗 .

٧- الصور أو الفيديوهات بتكون في نفس اللحظة :

البيوتي قوروز أو المشاهير لمن بيجوا ينزلوا صور لهم أو فيديوهات بيكونوا دوبهم عاملين الميك أب فريش يعني ماخدين الصورة أو الفيديو وهما دوبهم عاملين مكياجهم 😉🙏🏼 يعني ما بيجوا يصوروا بعد ٨ ساعات من وقت ما حطوا الميك أب .. فتلاقيهم يصوروا الميك أب لوك وكل شي وبعدين يمسحوه ما يفرق معاهم . أهم شي عندهم إنو لمن صوروا الفيديو أو الصورة يكون الميك أب فريش دوبو معمول وهادا كلو يفرق في الميك أب😇🌸 .

٨- كمية الميك أب الكبيرة من الشركات PR PRODUCT :

في كثير يوتيوبرز وبلوقرز بتجيهم كمية كبيرة من الميك أب من الشركات 😄 فبيضطروا مثلا إنو يستخدموا أكثر من برايمر في اللوك الواحد وأكثر من فاونديشن وكونسيلر ... شفت ميك أب أرتيست معينين يخلطو ٣ و ٤ فاوندشن عشان يناسبهم فأكيد حيكون مكياجهم مو زي الي عندو برايمر واحد وفاونديشن واحد وأساسا مين حيكون عنده يشتري ٣ او ٤ فاونديشن الا لو كانت ميزانيته تسمح بكدة☹️ ، المنتجات الكثير بتعطيهم مساحة إنو يجربو فيعرفو ايش يناسبهم وإيش لا ... فأكيد المكياج حيكون مختلف💙 .

🌸🌸🌸🌸🌸🌸🌸🌸🌸🌸🌸🌸

في النهاية بنات أشتغلوا بالميك أب الي عندكم وبإمكانياتكم الموجودة 😍 وأتدربوا على التكنيك وجربوا مرة وإثنين وثلاثة وإنتو ح تطوروا نفسكم صدقوني حتى ميزانيتكم مع الوقت حتسير أحسن وحتشتروا منتجات أكثر والي نفسكم فيه .. أهم شي لا تقارنوا نفسكم بأحد أهم شي تعرفي إنو هادول المشاهير عملوا حاجات في نفسهم وإبر وغيره عشان يطلعوا حلوين أما نحنا الطبيعيين صدقوني حلوين بدون شي🤩😍 وبدون ميك أب أهم شي القناعة بنات 

والميك أب تتطوروا فيه مع الوقت .

هادا كان كل شي أتمنى التدوينة عجبتكم وأشوفكم في التدوينة الجديدة إن شاء الله .

2 comments COFFEE TALK