مشترياتي من موقع تارت | tarte makeup haul

الأربعاء، 5 أبريل 2017

  بسم الله الرحمن الرحيم  

أهلين حبيباتي كيفكم وحشتوني ؟ اليوم إن شاء الله التدوينة حتكون عن مشترياتي من موقع تارت فيلا نبدأ :) 



طيب أول شي رح أتكلم عن تجربتي في التوصيل ، أخترت إنو يكون التوصيل دايركت للسعودية و طبعا في أكتر من خيار ممكن التوصيل ببلاش أو بفلوس أنا أخترت DHL EXPRESS الي بفلوس عشان كنت خايفة تضيع الشحنة وكدة فقلت خليني ما أخاطر وأدفع فلوس دفعت حوالي ٣٠٠ ريال زيادة حق التوصيل ووصلتني دايركت للبيت بعد حوالي أسبوعين كانت كل الطلبات ممتازة مافي شي مكسور وكل شي كان تمام .


  EYE SHADOW PALETTE  



أول مشترياتي هوا هادا الشادو باليت كان بالتعاون مع يوتيوبر أجنبية ألوانو عجبتني جدا عشان كدة أشتريتو بغض النظر عن التعاون لين دحين ما جربت الآي شادوز لكن جربت البلشر والكونتور والهايلايت .
الكونتور كان جدا قوي يعني لازم تحطو منو شوية في الفرشة لإنو اللون قوي ، الدرجة مبدئيا ما حبيتها عليّا لإنها على أورنج ، بالنسبة للبلشر كان فيلو لمعة فما حبيتو كتجربة أولى ، والهايلايت جدّا قوي وفيلو قليتر دا الشي ما حمسني و حسيتو شوية فاتح على لون بشرتي لكن ما أبغا أحكم عليه دحين ل٫و لازم أجربو أكثر عموما أنا ما أخذت وقتي في تجربتهم لسة رح أجربهم أكثر و أنزل ريفيو كامل عن كل الباليت إن شاءالله ، وزي ماقلتلكم السبب الرئيسي إلي خلاّني أشتري الباليت هو الآيشادوز عجبتني الدرجات جدًا سعر الباليت ٢٠٣ ريال .

  BLUSHERS  



بلشرات أمزونيان كلاي تجي مجموعة مع بعض مكونة من ٤ بشرات حجمها صغير وتجي معاهم فرشة أنا من جد حبيت بلشراتهم مررررة حلوين ما يتكتّلو يندمجو بسهولة و درجاتهم كمان حلوة ما عندي أي تعليق على البلشرات غير إنها جميلة سعرهم ١٧٣ ريال .



كمان أشتريت هادا البلشر لإنو ينفع لكل وقت ومولازم برونزر معاه لإنو هوا برونزر و بلشر في نفس الوقت مرة حبيتو سعرو ١٢٧ يعتبر ٢ في واحد .

  LIPSTICK  



هادا الروج شي فظيييييع وباين إني هاريتو ريحتو شوية غريبة بس اللون فظيييع اللون مات لكن في نفس الوقت ما ينشف الشفايف رهيب مرة حبيتو لكل يوم في الجامعة إسمو beach bum dark nude 
سعرو ٩٨ ريال . 

  SWATCHES  


في السواتشات كان في كم لون من الآيشادوز كانو صعبين في الدمج وأنا بأعمل السواتش إلا أرجع تاني أعيد السواتش على اللون بس عادي أنا ما أحكم على الآيشادوز من السواتش لإنو حتى في باليت كايلي كان يحصل معايا نفس الشي الألوان كانت صعبة في السواتش لكن عالعين كانت تجنن فما تحكموا من السواتش جّربو الألوان أول على عيونكم بعدين أحكموا بس و دحين رح أخليكم مع السواتشات وترا السواتشات بدون فلاش في الطبيعة الألوان أحلى من كدة بكثير .






****************

وبكدة حبيباتي نكون وصلنا لنهاية التدوينة أتمنى التدوينة تكون عجبتكم أكتبولي لو عندكم أفكار تدوينات جديدة ورأيكم في التدوينة تحت في الكومنت مرررة شكرا ويارب يومكم يكون جميل ومع السلامة .



0 التعليقات:

إرسال تعليق