بسم الله الرحمن الرحيم
أهلين حبيباتي اليوم بم إنو مدونتي سرلها سنتين فبهادي المناسبة حابة أقلكم عن سلسلة جديدة في مدونتي كل شهر أعمل فيها مقابلة مع بلوقرز عربيات قدروا يوصلوا صوتهم عن طريق مدوناتهم ... واليوم مقابلتي مع بلوقر سعودية عسل وأنا من أكثر الناس الي يتابعوها في مدونتها وفي وسائل السوشيال ميديا حبيبتي ريما الحربي من جد حبيت تدويناتها لامستني ، تصويرها وشغلها على مدونتها وصلني واليوم مقابلتي معاها لو حابين تعرفوا ريما أكثر كملوا التدوينة :)
بعيدا عن التدوين من تكون ريما الحربي ؟
انا ريم الحربي .. مواليد 1991 سعوديه . . من مواليد جدة " خريجة بكالريوس خدمة اجتماعيه " لدي الكثير من الاحلام على يقين ان تتحقق عيوني متأمله للكتب دائما .. واكتب ل اتنفس خربشاتي القديمه لها صوت في داخلي , التصوير بالنسبه لي ضوء ان اظلم اظلمت . هادئه , مرحه , التفاصيل تهمني كثيراا , الفاشن والتسوق جزء من سعادتي مرتبه , حساسه , ايجابيه , طموحه , ولا ارضى بالقليل اتمنى الوصول للقمه .
قوليلي إيش قصتك وراء التدوين ؟
قصتي وراء التدوين .. انا من زمان اعشق الكتابه والتصوير والفاشن والجمال فتحت المدونه في 2015 ما كتبت فيها ولا حرف نسيتها تقريبا كنت حابه الشيء بس مو متحمسه له ابدا .. نهاية 2016 بدءت استوعب نفسي بدءت احقق اللي ابيه رتبت افكاري وايش ابي بالضبط وحسيت اني فعلا ودي ابدأ ادون .. فتحت المدونه بحب لدرجه احس بسعادة كل اللي يدونون , ف حابه المدونه وححببت كل اللي حولي فيها
ماكنت اعرف في المدونه ولا شيء ابدأ , وكنت ابيها زي المدونات حاليا ابيها ب مستوى اللي لهم سنين بالتدوين
تعبت كثير لاني ما اعرف شي ابد من نايحة التنسيق و و ... كنت ابي اول تدويه لي تنزل بداية 2017 ف ظليت ايام من القهر ما انام ابي تنسيق وابي وابي بس مو عارفه شيء يوم عن يوم تعلمت كثير اشوف واجرب واحاول لين عرفت كل ركن في البلوق
يمكن لو جاني احباط من اي شخص اعصب واتركها بس لا كنت مصره اكمل واتعلم زي اللي ماشاء الله ابدعو فيها ..
ف حمد لله وصلت للرضى وبدءت ادون
مين كان ملهمك في مجال التدوين ؟
كثير اشخاص ملهمين بحياتي ساعدوني اني ادخل وابدء تدوين شجعوني وانتظرو اول تدوينه لي بحماس في مجال التدوين . من البلوقرز ( هيا البلوي استفدت كثير منها ومن تدويناتها والشروحات اللي تنزلها في مدونتها واشياء كثير سهلت علي طريق ممكن اتعثر فيه كثير كنت اروح لمدوناتها واطبق اللي اسصعبته ) البلوقرز شيماء (قورجس ) قرات لها تدوينه قبل ابدء تدوين مره شجعتني تدوينتها
أوصفيلي مدونتك من ناحية الستايل و نوع التدوينات ؟
مدونتي ستايلها احسه بسيط والالوان مريحه وقريبه لي ستايل ناعم ومرتب نوع التدوينات ( متنوعه , اي شيء احبه عادي ينزل ك تدوينه , مفضلات شهريه , مشتريات ) او ممكن اي احد يبي انزل تدوينه عن شيء معين ممكن انزلها عشانه لو شخص واحد بس
هل توجد رسالة حابة توصّلها ريما عن طريق مدونتها ؟
لو انا ما دخلت مجال التدوين يمكن ما يكون عندي مساحه خاصه ولا رساله ممكن أوجهها لمن فتح الضوء ليقرا مدونتي مروركم سبب سعادتي انتم سبب نجاح المدونات .
إيش هو شعورك ريما بأول تدوينة نشرتيها ؟
ما اوصف لكم شعوري .. احلا يوم بدءته واحلا ساعه واحلا شيء نشرته اول يوم في 2017 نشرت تدوينه مفضلات 2016 كتبتها بسرعه ونشرتها ومره كانت افضل تدوينه لي للان كنت اكتب بلا توقف .. متحمسه كثير
إيش هي طقوسك قبل كتابة أي تدوينة ؟
أحب اروق واجهز مكاني عشان اتهيأ للكتابه احب اكتب اخر الليل ، احب تدوينات المفضلات لاني اكون متحمسه لها من شهر ف كل شوي اكتب شيء واقفل ، اما التدوينات اللي بنص الشهر تجي فجاءه من غير ترتيب لها ولا رواق ولا شيء فجاءه اصور واكتب وانشرها ف مره اتعب من الاشياء الفجاءه لاني ما اترك الشيء اللي يجي فجاءه لين اكمله وارتاح بذات لو حبيت التدوينه.
الصور من العناصر المهمة لأي تدوينة ، إيش هو سر جمال الصورة في رأي ريما ؟
احب تكون الصوره واضحه نظيفه .. ما احب اي تعديل على الصوره لاني مره ادقق اصور كثير ف عادي لو بدءت اكتب التدوينه وما عجبتني الصور ارجع اصور من جديد.
إيش أكثر برامج التواصل الإجتماعي تُحبه ريما جدًا ؟
انستقرام ، سناب تشات ، تويتر مو كثير بس من فتحت المدونة رجعت له .
كيف تقضي ريما وقت فراغها ؟
ااااانام , أكككل , اتقهوى , اتصفح مواقع تسوق , اصور , اطلع , اهج , اقرا كتب , اقرا مدونات , اشوف يوتيوبرز
مين أكثر البلوقرز الي تحبهم ريما ؟مين أكثر البلوقرز الي تحبهم ريما ؟
ولاء هارت , هيا البوي , اميره مبارك , قورجس , وفاء احمد , نورا وسارا العوفي , غدير , ليدي موني , ذات ريد ليب , اروى العمراني وكثير كثير تعرفت عليهم ..
كيف تشوف ريما مدونتها ٣ سنين من الآن ؟
أشوفها انها وصلت للمستوى اللي ابيه , تعب ثلاث سنين ان شاء الله يكون نجاح
ايش هوا سر النجاح برأيك ؟
سر النجاح المثابره عشان توصلين للنجاح لازم تتعبين خطوه خطوه تعلمك كثير
أكثر ٣ أشياء بشكل عام تحبها ريما ؟
القهوه بكل انواعها الصباح والعصافير . . عادي احط منبه واصحى الفجر واجلس اروق مع نفسي واسمع صوت عصافير بعدين ارجع انام ، الفاشن والتسوق مسببات السعادة .
كلمة توجهها ريما لكل متابعينها ومن يقرأ التدوينة ؟
أتمنى إني وصلت لقلوبكم ..
***********************************
وبكدة حبيباتي نكون وصلنا لنهاية التدوينة مرة أتشرفت بمقابلة ريما في هادي التدوينة لا تنسوا تتابعوا ريما على السوشيال ميديا دحين رح أحطلكم كل روابطها تحت و إن شاءالله أشوفكم في التدوينة الجية .
instagram : @rema_remii
0 التعليقات:
إرسال تعليق