مقارنة ما بين الشامبو الجاف | dry shampoo reviews

  بسم الله الرحمن الرحيم  

كيفكم حبايبي اليوم جيتكم بموضوع من زمان أبغا أتكلم عنو هوا مقارنة بين الشامبو الجاف أو الدراي شامبو الي من DOVE and BATISTE

أولا حأعرفكم على الدراي شامبو طبعا هوا بخاخ فيلو شامبو جاف تبخيه لو إنتي من الناس إلي شعرك يدهن أو يزيت بسرعة من المنابت لانو في ناس ما يحمِّمو شعرهم كل يوم وأنا من هادول الناس جسمي أحممو كل يوم لكن شعري كل يومين علشان ما يتقطع وكدة فاشامبو الجاف تبخيه علمنابت حقت الشعر وهوا حيمتص كل الزيت الي عالمنابت ويدي ريحة حلوة زي كإنك دوبك مستحمية أنا عن نفسي ما أقدر أعيش من غيرو  .

نبدأ بBATISTE هادا الدراي شامبو هوا الأفضل عندي أكيييد طبعا في ناس كتير يشوفو دوف أحسن بس أنا عندي أسبابي الي تخليني أحب بتيست أكتر من دوف أول شي بتيست أحسو مرة خفيف عالشعرر يعني أول ماتبخيه يمتصو الشعر وما يخلي الشعر ماسك في بعضو أو يخلي الشعر ملمسو زي كإنك باخة شي تقيل عالشعر مرة أكرة هادا الإحساس وبتيست أبدا ما عَملِّي هادا الشي مرة خفيف وسهل ، لمن تبخيه يعمل زي البودرة لونها أبيض طبعا إنتي تفركيها بيدك تختفي علطول في بنات يقولو ليش هادي البودرة بتخلي شعرنا ابيض هيا لابتخلي الشعر ابيض ولا شي بمجرد إنك تفركي شعرك مزبوط تختفي وطبعا يعطي حجم للشعر او volume وله أكثر من ريحة وحجم فيه روائح كتيرة كمان ، طبعا أشتريتو يمكن ٣ مرات كل مايخلص أشتري علبة تانية في منو الحجم الكبير ب٥٠ ريال والصغير ب ٣٦ ريال الي في الصورة الصغير  .

نجي ل DOVE مرة ما عجبني أول شي للبنات إلي يقولو دوف ما يطلِّع بودرة بيضا أنا أقلكم ترا يطلع بودرة بيضا ومرة ما يمتصها الشعر بسرعة يعني لمن تجي تلمسي منابت شعرك تلاقي كدة في إحساسس غريب زي كانو في طبقة بودرة على شعرك حتى لمن يمتصها الشعر ، مفعولو مرة مؤقت يعني حطيتيه دحين ساعتين بالكتير يبدأ الشعر يزيت تاني إلا تبخيه مرة تانية عكس بيتيست وما أدري ازا بس أنا ما اعرف أول ما أحطو يخلي فروة راسي تحكني بشكل رهيب ما أعرف ليش يمكن علشاني مني متعودة عليه مع اني استخدمتو اكتر من مرة من يوم ما اشتريتو علشان ما اظلمو واعطيكم رأيي فيه بدون اي تحيز  في منو أعتقد حجم واحد وريحة وحدة قيمتو شي و ٣٠ لكن ما أدري بالزبط كم أشتريتو من الدانوب و batiste أشتريتو من صيدلية بوتس وموجود كمان في صيدلية وايتس  .

بشكل عام BATISTE أفضل من DOVE  طبعا هادا رأيي الشخصي مع إحترامي أكيد لآرائكم شكرا حبايبي لإنكم قريتو التدوينة شاركوني رأيكم وأعطوني طلباتكم في الكومنت تحت أو في السوشيالل ميديا شكككككرا حبايبي ومع السلامة .

Leave a Comment CARE PRODUCT