شخصيات ألهمتني | الجوهرة ساجر

الاثنين، 17 أبريل 2017

  بسم الله الرحمن الرحيم  

أهلين حبيباتي كيف حالكم ؟؟ إن شاءالله يارب كلكم تكونوا مبسوطين وبخير اليوم أنا مرررة متحمسة لإني رح أتكلم عن شخصية أثّرت فيا بشكل كبير وهي حبيبة قلبي اليوتيوبر الجوهرة ساجر ... 💘




أولا الي ما يعرف الجوهرة هي يوتيوبر عندها قناة عاليوتيوب إسمها jaysajer عندها ما شاء الله عليها  تقريبا ٥٠ مليون مشاهدة و ٤٤٤ ألف سبسكرايبرز أو مشترك في قناتها ، وعندها كمان قناة تصوّر فيها سفراتها ورحلاتها . أنا سرلي مشتركة في قناتها تقريبا ٤ سنين ، و بغض النظر عن المتابعين وقدّ إيش هيا ما شاءالله محبوبة بين متابعينها أنا من جد جدا أستفدت منها لإنها حقيقي إنسانة ملهمة ما عندها في قاموسها كلمة مستحيل دائما في كلامها تلاقوا الأمل حتى وهيا زعلانة تحب إنو تعطي طاقة إيجابية للناس الي حولينها ومتابعينها . عمري ما شفتها شخصيًا .. مع إني في نفس البلد والمدينة الي الجوهرة عايشة فيها لكن ولا مرة قدرت أشوفها أو أقابلها لمن تعمل meet up مع متابعينها ان شاءالله في يوم من الأيام رح أشوفك ياجوجو وأقلك قد إيش إنتي إنسانة ملهمة ليا .


بم إني بنت سعودية فخر ليا إني أشوف بنت زيي قدرت تِوصّل صوتها وتُوصَل لفئة كبيرة من المجتمع أكيد إنتقادات الناس كانت موجودة لكن قدرت تتغلب عليها ، لإنها في نظري قدرت تثبت لأهلها وللناس قد إيش هيا مثابرة وطالما إنو الله معاها رح توصل وحيكون لها بصمة ، أفتكر إني مرة سمعتها تقول إنو مو لازم تطلعي عاليوتيوب علشان تنجحي فيه أكثر من طريقة تثبتي فيها ذاتك وأول ماقالت هادي الجملة رسخت في بالي وقلت خلاص أنا لازم أعمل شي في حياتي له قيمة وأول شي عملتو إني دخلت تخصص الصيدلة علشان أساعد الناس قد ما أقدر وفتحت مدونتي ومن جد هادول الشيئين هما أحسن قرارين أتخذتهم في حياتي والجوهرة بعد الله كان لها يد في إلهامي إني أعمل الشيء الي أحلم فيه . أي بنت تقرأ كلامي دحين أنا أقلّك إنتي تقدري توصلي مهما كانت ظروفك أقلمي نفسك مع ظروفك وفكري في شي يخلّي لكي قيمة وبصمة في المجتمع ، دائما خليكي فخورة إنك مرأة لإنو عمرها المرأة ما كانت عار أو شي ماله قيمة لإنو
 إنتي الي رح تصنعي المستقبل .


دائما نحنا نطالع في الغرب على إنهم همّا مصدر الإلهام عندنا ... لكن ترا في عندنا بنات عربيات قمة في الإلهام والإنجازات ومن ضمنهم الجوهرة ، تشتغل من كل قلبها على فديوهاتها وتحاول قد ما تقدر إنو تفيد البنات الي زيها .
فديوهاتها من جد تفتح النفس بذّات الفديوهات الي يكون معاها أبوها بابا ساجر الله يخليه لها يارب ويخليلكم أبّهاتكم وأهلكم يارب .
الله يسعدك الجوهرة على كل شي بتسويه لمتابعينك وعلى إنك بتحاولي تغيري نظرة المجتمع للبنت بشكل عام وبتخلي كل بنت تحاول تشتغل على نفسها علشان توصل .
 يارب أكون أعطيتك ولو شوية من الي بتعطيه لمتابعينك شكرا لكي من جد و أنا عن نفسي فخورة فيكي ويارب توصلي لأحلامك وأهدافك .
رسالتي من هادي التدوينة إنو لازم تكون في حياتكم شخصيات ملهمة زي الجرهرة تتطلعوا إنو تكونوا زيهم ولكن بطريقتكم يعني الآن الجوهرة في نظري قدرت توصل لقلوب الناس عن طريق اليوتيوب والسوشيال ميديا ، إنتي دحين جا دوورك تشوفي كيف تقدري تخليلك بصمة وصوت في المجتمع مو لازم تكوني مشهورة علشان توصلي ، ممكن توصلي من خلال مهنتك ، من خلال أسلوبك مع الناس ، من خلال إبداعك ، طرق النجاح كثيرة وعادي جدا إنك تحسّي نفسك ضايعة في فترة من فترات حياتك لكن في النهاية مع الإصرار أكيد حتوصلي لهدفك وتحققي حلمك . 
الجوهرة مرة تانية أقلّك مليون شكرآ إنك موجودة في حياتي وإن شاءالله هادي التدوينة توصل لناس كتيييييير علشان كلهم يعرفوا الجوهرة مين تكون ويحسّوا بالفخر الي أنا حاسة فيه لبنت بلدي .

****************
وبكده حبيباتي أكون وصلت لنهاية التدوينة أتمنى تكون خفيفة عليكم وتكونوا أستفدتوا ولو بشي بسيط منها شكرا لكم حبايبي ومع السلامة في تدوينة جديدة .

إنستقرام الجوهرة : jaysajer
تويتر الجوهرة : jaysajer
قناة اليوتيوب للجوهرة : https://www.youtube.com/user/JaysCherry/videos



هناك 4 تعليقات:

  1. مساء الخير انا من سلطنه عمان مسقط من المتابعات الجدد ليكي
    وانبهرت بقناتك فاليوتيوب و البلوجز و الله يوفقك و يسهل امرك و انا متابعه الجوهره صارلي فتره طويله ونفس ماحكيتي انسانه مثابره وجدا ايجابيه

    ردحذف
    الردود
    1. ياقلبي عليكي وعلى عمان مرررة مبسوطة فيكي انا ماعندي قناة عاليوتيوب بس ممكن في المستقبل ما اعرف .. حاليا عندي فقط المدونة والسوشيال ميديا أتشرفت بمتابعتك ياقلبي مبسوطة فيكي والله شكرا 💜

      حذف
  2. الله يصعدك ويسعد جوجو الجوهره ساجر مررره احبهاا وحافظة فديواتها واتابعها من 2013فعلازشخصيةرتستخق المدح والاطراء..

    ردحذف
    الردود
    1. حبيبة قلبي إنتي صح كلامك الجوهرة من البنات الي أنا مرررة تلهمني ونفسي فيوم أوصل للنجاح زيها الله يوفقها يارب ويسعدك ياقلبي على دعواتك الحلوة شكرا يا سارة 💕

      حذف