مقابلتي مع المدوّنة أناستازيا | MY INTERVIEW SERIES

  بسم الله الرحمن الرحيم  

كيفكم حبايبي ؟ ما أقلكم قد إيش أنا مبسوطة  😆 اليوم التدوينة حتكون مقابلتي مع المدوّنة العسل حنين (أناستازيا) .. من جد أنا أتشرف بيكي معايا اليوم شخصيتك وكل شي فيكي يجنن ... متحمسة تتعرفو على أناستازيا لإنها إنسانة راقية بكل معنى الكلمة.

  بعيدا عن التدوين من تكون أنستازيا ؟  

أهلاً بالجميع 👋🏼 ، صباح/مساء الخير .. 

بداية آناستازيا هي بنتي الخيالية " مدونتي " ، أنا حنين ، طالبة إدارة أعمال قسم نظم معلومات إدارية بجامعة طيبة بالمدينة المنورة ، أمانةً مو عارفه إش أقول غير إني انسانة بسيطة مالها إنجازات تذكر حالياً ولكن أتمنى تكون القائمة ممتلئة في السنوات القليلة القادمة .. 

  قوليلي إيش قصتك وراء التدوين ؟  

البداية كانت صدفه ، بعد مروري بظرف عصيب أقدر أقول إني كنت محطمه نفسياً لآخر درجة ، رحت ابحث في قوقل عن شيء يرفع معنوياتي ، وحط ربي في طريقي بوستين للمدونة الجميلة قورجس 💘، الي أنا جداً ممتنه لها ، بسببها خرجت من الأزمة الي كنت فيها + عرفت عالم التدوين ، بقد مافادتني تدويناتها في ذاك الوقت بقد ماتحمست أكون زيها و أفيد غيري ، لو شخص واحد فهالكون الكبير أنا راضية .. 

بدأت من وقتها ادرس فكرة المدونة والتدوين والحمد لله خطوة أفخر فيها بحياتي وأعتبرها إنجاز بسيط لو على المستوى الشخصي . 

  مين كان ملهمك في مجال التدوين ؟  

كثييييير جداً جداً ، فخورة جداً بجميع المدونات العربيات ، لكل منهم نصيب في إلهامي 

أبدأ من الجميلة قورجس اللي كانت بذرة هالإنجاز ؟ 

أو من هيا البلوي اللي عرفت منها إنو أي انسان يقدر ينشئ مدونته وبشكل مرتب ولطيف .. 

أو من آرتوس اللي كان اسلوبها رآقي ومعلوماتها سبّاقه وغريبة ، وتنسيق بوستاتها جذّاب يبين لك قد إش هالشيء مهم في التدوينات .. 

أو من اروى العمراني اللي تجذبك عناوين تدويناتها وغرابة أفكارها وجمال تصويرها واستغلالها لوقتها ولكل شيء بالحياة مهما كان بلا فايدة تطلع منه بمية فكرة مفيدة .. 

أو من أميرة مبارك اللي تلهمني دايماً وتملاني إيجابية فعلياً أميرة إثبات فعلي لنفسي إنو ممكن تكونين أم و "و بزبز ومن " ومدونة ناجحة . 

أو من صديقاتي في نافذة المدونات وحماسهم الدائم وبوستاتهم الي تلهمني اقتبس من هذي فكرة ومن هذي فكرة .. 

جميع الموجودين في عالم التدوين الهموني ولسى بيلهموني ، حقيقي ممتنّة لهم فرداً فرداً 😍💘.

  أوصفيلي مدونتك من ناحية الستايل و نوع التدوينات ؟  

ستايل مدونتي ✨ " نو ستايل " ، للأمانة بالبداية كنت مقررة إنها تكون ثقافية بحته ، زي بوست قصة آناستازيا وعائلة رومانوف وزي قصة التيتانيك ، ولكن مع الوقت اكتشفت مجالات كثير مهمة في الحياة ومفيدة ممكن اكتب فيها وانقل تجربتي من خلالها ، فقررت ما أحدد لها أي قوالب امشي عليها ، المجال مفتوح لأي فكرة ممكن إنها تفيد . 

  هل توجد رسالة حابة توصّلها أنستازيا عن طريق مدونتها ؟  

أتمنى أوصل لكل إنسان ، ولكل بنت بالتحديد .. الجميع عنده خبره في مجال معين وتجربه ناجحه أو فاشله في مجال معين ، وفي المقابل فيه كثير تنقصهم معلومات وآراء بنفس هالمجال ، إذاً اكتب تجاربك ووثّقها ، حتى إنت بنفسك حتستفيد من الي كتبته في يوم ما .

نحتاج جميعاً لمحتوى عربي جديد 💪🏼 ، نتائج البحث حالياً مقفرة في أغلب المواضيع ، أغلبها إذا مو كلها من المنتديات عام ٢٠١٤ كأحدث موضوع ، فـ لو كل إنسان عنده خبره في مجال معين دوّن وشارك هالخبرة مع غيره أعتقد راح يكون عندنا مرجع عربي ثري جداً للمعلومات على الإنترنت . 

  إيش هو شعورك أنستازيا بأول تدوينة نشرتيها ؟  

كنت متحمسة لأقصى درجة ، خصوصاً إني ماسبق شاركت في منتديات أو مكان أقدر اتكلم فيه واكتب وابين رأيي ، فإنو أنشر بوست لأول مرة + في موقعي حقي مقي كان شعور جميييل 😻 مخلوط بين سعادة وحماس وإنجاز وشوية خوف من التجربة . 

الشعور ماوقف على أول بوست ، أول المشاهدات ، أول تعليق ، كلهم كنت حاسه فيهم إني طايرة السما والدنيا مو واسعتني 

  إيش هي طقوسك قبل كتابة أي تدوينة ؟  

التدوينات عندي ماخطط لها ، فجأة يطري لي موضوع ينفع كتدوينة ، اسجلها في المسودات ، وفجأة تجيني طاقة كتابة داخلية ( قريحة الكتابة زي مايسمونها ) افتح الايباد وابدأ اكتب في الملاحظات نص بوست وأحياناً بوست كامل عاد حسب الوقت المتاح ، لأنو غالباً هالقريحة تجي وأنا في السيارة أو في بريك بالجامعة يعني في أوقات مو مفتوحة ورايقة 💆🏻 .. فبس أخلص كتابة أبدأ اخطط لصورة الهيدر والصور الي تحتاجها التدوينة واصورها واعدلها في يوم منفصل .. 

وآخر شيء وأحلا شيء فقرة التنسيق والتدقيق ، في هذي أحب أجلس في مكان رايق وهادي وغالباً اجيب لي مشروب أحبه و مسلسل أو برنامج اتابعه اثناء الشغل وابدأ انسق التدوينة واعمل لها معاينة ولو عجبتني من كل النواحي أنزلها في وقتها ، ما أحب أنتظر أوقات معينة للنشر ، في كل وقت نلاقي متابعين لطيفين يقرأوون ويسعدوننا بتعليقاتهم . 

  الصور من العناصر المهمة لأي تدوينة ، إيش هو سر جمال الصورة في رأي أنستازيا ؟  

أكيد الصور من أساسيات جمال التدوينة واكتمالها 📷 ، نظافة الصورة برأيي مهم جداً يحسسني باهتمام المصور بأغراضه وبالمنظر الي بنشوفة وبالمستوى الي المدونة واصلة له .. 

دقة الصورة ووضوحها وحجمها والسطوع حاجات أشوفها تجمّل الصورة وتطلعها بمنظر الاحترافية .. 

وأكيد ماننسى أهم شيء وهو التكوين وإش العناصر الموجودة في الصورة وعلاقتهم بموضوع التدوينة .. 

* لازم كل مدوّن يعرف إنو الصور توصّل حاجات ماتوصلها الكتابة بمراحل ، الصور جداً مهمة . 

  إيش أكثر برامج التواصل الإجتماعي تُحبه أنستازيا جدًا ؟  

همممممممم ، تويتر🐥 بالمركز الأول بالنسبة لي ، ولو إنو تقريباً شخصي ومالو علاقة كبيرة بمدونتي ، ولكن احسه متنفس لي ، أحب حسابي هناك أحب تغريداتي لأن لكل تغريدة حدث كتبت عشانه . 

سنابشات 👻 يوازي تقريباً التويتر ، السناب أقرب شيء لي مع متابعيني عرّفني عليهم عن قرب ، وإن انقطعت عن أي موقع تواصل مستحيل السناب ينقطع . 

  ما هي عيوب ومميزات التدوين ؟  

المميزات كثيرة جداً .. 

شعور الفخر بكل بوست ينزل مايقابله أي شعور بالدنيا ، شعور إنك تقدمين شيء للناس ، شيء جميل يبقى حتى لو رحلتي عن هالحياة . 

شعور زكاة العلم ، الأجر كبييييير 🤗 إذا احتسبه المدوّن لوجه الله.

التدوين يملى وقتك بشيء مفيد ، ويضيف لك أكثر مما تضيفين لغيرك ، لمن تجهزين لبوست معين لازم تبحثين عن هالموضوع بشكل مفصل عشان تلمّين بهالموضوع وتكتبين شيء متكامل وصحيح قدر المستطاع ، هالشيء يوسع مداركك بشكل كبير ؛ المدوّن هو المستفيد الأول . 

أما العيوب فما فيه شيء يذكر ، أو الى الآن ماصادفت شيء من هالعيوب . 

  كيف تتغلبي عن لحظات الخمول تجاه التدوين ؟  

😞 

من بدأت التدوين ماصادفت أي لحظة خمول ، مسودتي مليانه تدوينات تنتظر النشر كنت دايماً أحتار أيهم انشر بالأول ، هي فترة خمول وحدة إلى الآن وهي اللي أمر فيها حالياً ، اللي يتابعوني يعرفون إني آخذه بريك مفتوح من التدوين هالفترة الله العالم هل له نهاية أو هو النهاية لهالمشوار ، اجتمعت كثير ظروف وكان أبرزها وأهمها خمول التدوين وغياب قريحة الكتابة ، قاومت هالشعور فالبداية وحاولت ماعطيه مجال يتغلب علي ولكن النتيجة كان مستوى تدوينات غير مرضي أبداً ، فقررت اترك المقاومه واخلي الأمور تمشي براحتها وأشوف لوين توصل ، م اخفيك إنو المسودة أغلبها تدوينات شبه مكتمله لكن حرفياً مالي نفس اضيف حرف زيادة ، الله العالم سبب هالخمول إش وعلاجه كيف ! لكن أتمنى فعلياً تنتهي هالفترة بسرعه لأني اشششششتقت لبنتي كثير.

  كيف تقضي أنستازيا وقت فراغها ؟  

نادراً جداً يكون عندي وقت فراغ ، خصوصاً هالفترة ؛ وهو كمان أحد أسباب بعدي عن التدوين حالياً ، ولكن غالباً المتنفس يكون فترة روقان مع كوب قهوة و مسلسل تركي أو فيلم دراما وفانتازيا ، أو مشي 🚶🏻‍♀️ في سطح البيت آخر الليل وأتأمل السما والنجوم واسمع الأغاني اللي احبها ، أو جلسة رسم وتلوين تفرّغ المشاعر السلبية . 

  كيف تشوف أنستازيا مدونتها ٣ سنين من الآن ؟  

أتمنى اشوفها تنافس كبار المدونات 🙏🏼 ، مواضيعها شاملة أغلب أمور الحياة ، وتكون أيقونه مهمة في مجال التدوين ، ويذكر إسمها بالأول . 

  ايش هوا سر النجاح برأيك ؟  

للنجاح أوجه كثير ، إذا حصلت على واحد منها على الأقل فأنت إنسان ناجح ، الأوجه هذي تختلف من إنسان للثاني ، إذا كنت تشوف النجاح هو التفوق الدراسي والشهادات الكثير والمناصب العالية فقيّم نجاحك بحسب ماعندك من شهادات . 

وإن كنت تشوفه بعدد مشاهدات ومتابعين على مواقع التواصل فقيّم نسبة نجاحك بعدد متابعينك ، وهلمّ جرا ... 

لكن لاتحكم على نجاح الناس بمنظورك . 

وسر النجاح في الإخلاص والإحسان والتميز 🌸 ، إن اخلصت لهالشغلة راح تعطي لها كل مافيك كل طاقتك كل ابداعك مابتقصر في شيء وبتنجح وتتميز ، ممكن نلاقي كثير يعملون بنفس المجال لكن فيهم الناجح والبارز وفيهم المقلّد ، التميّز لو بشيء بسيط يصنع فرق كبير .

  أكثر ٣ أشياء بشكل عام تحبها أنستازيا ؟  

اووووووه شهود أكثر سؤال صعب أحصر إجابته  ، أنا انسانه أحب الحُب ، واقدسه بشكل كبير 

أحب الحياة ككل ، أحب الألوان ، أحب الأغاني والرقص والموسيقى ، أحب البحر والمطر والسفر والشعر القصير 

أحب الفيله 🐘 " جمع فيل " والزرافات  ، أحب القهوة ☕️ و الشوكولاته 🍫 والحلويات وكل شيء لذيذ .. وأحب الفلسفة أكيد 

الحياة مليانه حاجات حلوه تنحب ، إذا عبينا تانكي الحُب عندنا مابنلاقي مكان للكره . 

  كلمة توجهها أنستازيا لكل من يقرأ التدوينة وكل متابعينها ؟  

أول شيء باشكر صديقتي وحبيبتي شهد ع هالإستضافة اللطيفة حقيقي يشرفني ويسعدني إختيارك لي ، وأعتذر على التأخير .. 

أتمنى إنو البوست كان ممتع وخفيف ، عني أنا جداً استمتعت بالإجابة .. 

أتمنى كل إنسان يقرأ كلامي ويشوف بنفسه قدره على التدوين مايتردد لحظه ، وإن ماكان يقدر فتشجيعكم للمدونات يعني لهم كثييييير صدقوني أبسط تعليق ممكن يأثر فيهم بشكل ماتتخيلونه . 

وأحبكم ، واشكر ربي إنو رزقني متابعين بهالجمال وهاللطافة 💘

مدونة أناستازيا : http://istazia.blogspot.com

تويتر : I_STAZIA@

إنستيقرام : I.STAZIA@

7 comments MY INTERVIEW SERIES