30 days challenge | ثلاثين يوم لحياة صحية

  بسم الله الرحمن الرحيم  

السلام عليكم بنات كيف حالكم أخيرا جات الإجازة وجا رمضان كل سنة وإنتو طيبين إن شاء الله يكون شهر رمضان 💛خير علينا وعليكم يارب ، وبمناسبة إنو رمضان جا بالخير علينا فرصة كبيرة إنو نغير من حياتنا 💪🏼 وطريقة أكلنا ، في هادي التدوينة إن شاء الله رح أعملكم تحدي نمشي عليه ٣٠ يوم لحياة صحية فيلا نبدأ .

طيب أول شي الغرض من هادا التحدي هو تغيير نمط الحياة ، يعني لا تحرموا نفسكم أبدا فقط أختاروا إختيارات تفيدكم ما تكون ضدكم ، بالنسبة ليا أبغا أبدأ بهادا التحدي لإنو أول شي رح يكون تحدي لنفسي 💪🏼 وغير كدة أنا أبغا جسمي يتغير لإنو أنا ولا عمري حبيت جسمي ودا شي من جد مررررة غلط 😱، قبل ما تفكري تبدي معايا لازم تحبي جسمك على ما هو عليه بعدين تبدئي ، لا تبدئي علشان بعد رمضان عيد مثلا ولا تبدئي علشان أهلك يبغوكي تنحفي ، أبدئي علشان نفسك ولا تحدي نفسك بوقت معين وتوقفي يعني لا تخلي ال٣٠ يوم فقط تتغيري فيها وبعد كدة يرجع كل شي زي ما كان ، ترا أنا في هادي التدوينة باكلم نفسي قبل ما باكلمكم لإنو حتى أنا كل سنة أنحف وبعد كدة يرجع وزني زي ما كان عشاني ما أكمل ودا أكبر غلط ، لمن تحبو تبدأو لازم تحطو في بالكم إنو أنا أبغا حياتي تتغير للأبد ما أبغا أرجع لوزني القديم وترا من جد هي فقط إختيارات أفضل بتختاروها جسمكم حيشكركم عليها وحتشوفوا الفرق .

بالنسبة للأكل أنا مارح أحطلكم برنامج أكل بس ممكن أحطلكم رابط وصفات ممكن تسووها في البيت تكون صحية ومفيدة مثل : https://www.pinterest.com/thatbeautyangel/healthyfood

لكن عموما إنتو حاولو تكون وجبتكم في الفطور غنية بكل العناصر بروتين ، نشويات شوية ، كربوهايدرات ، دخلو الخضار في وجباتكم كتييير سوآء كان في الفطور أو السحور لا تحرموا نفسكم لككككككن في نفس الوقت في أمور لازم تمشو عليها وتنتبهولها 😬

فيلا أقلكم عالنصائح الي حنمشي عليها ؟

١- لازم نبعد تمااااما عن بعض الأكلات مثل : الفاست فود 🍔🍗🍟🍕 ، العصيرات المسكرة 🍹سواء كان فيمتو أو التانق مثلا . دول كلهم فيهم سكريات بالهبل فبلاش منهم طيب (عيني حمرا ترا هههههه عشان أخوفكم) ، المشروبات الغازية كمان نبطل منها لو مرا أشربو بيبسي دايت .

٢- أشربو موية داااااااائما لو إنتو عطشانين أو منتو عطشانين دايما خلو قارورة موية معاكم في اليوم ٣ لتر موية لازم تشربو 💦💦 من جد ماأقدر أقلكم قد إيش الموية مهمة إنتو حتكونو صايمين تقريبا نصف يوم جسمكم وأعضائكم حتكون محتاجة موية عشان تشتغل هادا غير إنو جسمكم حيكون متعطّش للموية وترا الموية مهمة للشعر والبشرة فدا 

شي جدا مهم .

٣- لازم يكون في رياضة 🏋🏻‍♀️ حتى لو تمشو في الحوش حق بيتكم نص ساعة 🏃🏻‍♀️ بس لازم نتحرك ، الي تبغا تروح نادي تروح الي تبغا تعمل الرياضة في البيت براحتكم لكن لازم يكون في رياضة في الموضوع واليوتيوب مليان تمارين في البيت ممكن تسووها وكمان بم إنو رمضان حاولو تساعدو ماما في البيت دا كمان رح يحرك من الجسم شوية .

٤- لاتحرمو نفسكم لو تبغو شكولاتة أو آيس كريم في شكولاتة تكون مليانة بروتين ممكن تاخدوها بعد التمرين تعطيكم طاقة ونفس الشي مع الآيس كريم في أنواع كثير في السبر ماركت مليان بروتين وصحي للجسم وفي نفس الوقت لذيذ أو لو مرة نفسكم في شي حلو كلو وصلة شكولاتة بس مو كل البار حق الشكولاتة وصلة فط ومو كل يوم كمان .

٥- أستبدلوا السكريات المضرة للجسم بالسكريات المفيدة مثل الفواكه ، تعرفو لو أكلتو فواكه صدقوني مارح تشتهو الشكولاتة لإنو إنتو أساسا جسمكم حيكون بياخد السكريات من المصادر المفيدة .

٦- أستخدمو في الطبخ الزيت الي يجي بخاخ وما فيلو كالوري في أنواع برضو في السوبر ماركت أنا أستخدم نوع إسمو PAM فظييييع أشتريتو من الدانوب .

٧- أعملو أن فولو للناس الي بس ينزلو صور أكل مو صحي أو الي نمط حياتهم مهي صحية وأستبدلوهم بناس يشجعوكم تنحفو وتغيرو من حياتكم من جد دا يفرق لانو نحنا تأثر فينا الفديوهات والصور الي بنشوفها

بشكل كبير لكن نحنا ما بنحس ومع الأسف في رمضان 🌙 الإعلام والناس يستغلو الشهر الكريم ترويجا للأكل زي كإنو مثلا نحنا ما بناكل طول السنة أو رمضان للأكل مو للعبادة من الناس الملهمين في مجال الرياضة والدايت هي ناتالي بسمة أنا عن نفسي ضايفاها في الإنستقرام والسناب تشات 👻 من جد ضيفوها حتديكم طاقة رهيبة سرلي سنة ضايفاها ماشاء الله عليها طاقة رهيبة وهادا أكاونتها NATBASMA .

٨- لا تفقدوا الأمل 🤗 البداية دائما صعبة لكن خلي عندك هدف وأجري وراه مو بس تخلي هدفك ٣٠ يوم فقط خليه طول عمرك وترا صدقيني هوا بس توازن في الأكل لاتحرمي نفسك لكن في نفس الوقت لا تفتحيها مرة وتندمي على الوزن الي خسرتيه وما حافظتي عليه .

٩- خلي عندك يوم في الأسبوع تقدي تاكلي فيه وجبة فقط مفتوحة مو كل اليوم مفتوح وجبة وحدة مفتوحة يا فطور يا سحور تاكلو فيها الي تبغوه بس برضو بكمية معقولة 🙏🏼 .

١٠- بعّدوا تمااااااما عن الأكل المقلي أنا عارفة إنو رمضان مهمة فيه السمبوسة 😆 بس كلو مثلا أول يوم فقط بعد كدة باقية الشهر لاتاكلو مقالي من جد كلها زيت بعدو عن المقالي .

١١- لا تخلو أحد يأثر فيكم لا ماما ولا بابا ولا الأخوان يقولولك هيا تعالي ياشيخة كلي معانا 😱 حلى أو مقالي أو أكل مليان زيت أنتبهي✖️ ، يا تطبخي أكلك بنفسك يا تخلي ماما تسويلك شي صحي أو نوعا ما صحي أو كلي معاهم لكن أختاري مزبوط أكلك ولا تخلي أحد يأثر عليكي 💪🏼 لانو من جد رمضان حتشوفي فيه أكل من كل مكان فلاااااازم نمسك نفسنا ونعرف إيش ناكل أول ما تشوفي أكل ما حيفيد جسمك قولي أستغفر الله أعوذ بالله ولا تفكري تقربي منو ههههه 😆من جد ترا لا تخلي الأكل يأثر فيكي ترا والله الأكل ما حيطير موجود إنتي دحين في مرحلة تبغي تركزي فيها على صحتك فقط وترا رمضان يا الواحد ينحف فيه أو يتخن بالكيلوهات من كتر الأكل ما شاء الله .

١٢- أخر شي HAVE FUN أنبسطوا💃🏽 بالخطوة الجميلة هادي الي حتتغيرو فيها للأبد ، أنبسطوا وإنتو بتطبخو لنفسكم ، أنبسطوا و إنتو بتسوو رياضة ، أنبسطوا بكل لحظة .

  

سيبولي أكاونتاتكم في السناب تشات لو حابين 👻 عشان أضيفكم هادا أكاونتي في السناب تشات glamorous-angel مرة متحمسة أشوف الصور 😬 منكم وأنا كمان رح أحطلكم وصفات غالبا من بكرة خلونا نشجع بعض ولو شفتكم متحمسين ونحفتو حتى لو كيلو واحد رح أكمل هادي السلسلة من التدوينات يلا أتحمسو معايا

*********

غرضي من هادا كلو إنو نحمس بعض وتحسوا إنو إنتو مو لحالكم بتغيرو حياتكم فيلا خلونا نحمس 💪🏼 بعض ونبدأ كسرو الكومنت أبغا أشوفكم متحمسين 😬 وحاولو تنشرو التدوينة عشان توصل لبنات كتييييير .

أشوفكم حبايبي في تدوينة تانية ومع السلامة .

6 comments FITNESS