رسالتي لكل بنت وزنها زائد | COFFEE TALK WITH SHAHAD

  بسم الله الرحمن الرحيم  

كيف حالكم بنات ان شاءالله يارب تكونو بخير وبصحة وسلامة اليوم موضوع كوفي توك مختلف وزي ما إنتو عارفين أنا دائما أحب أتكلم في مواضيع تلامس البنات 😃 بشكل عام ومواضيع ما باشوف أحد من حولي يتطرقلها اليوم ، موضوعنا عن كيف المجتمع يعامل البنات الي وزنهم زائد !!! قبل ما أبدأ كلامي حابة آقول كلمة لكل بنت سواء كان وزنك زائد أو لا إنتي حلوة و جميلة 💘حتى لو كل الناس تقول العكس دائما خلي راسك مرفوع ولا تخلي شي يهزك ودحين يلا نبدأ التدوينة 😍 .

أول شي أبغا أقلك لو إنتي بنت وزنك زائد ترا أنا حاسة فيكي ❤️ لإنو حتى أنا تقريبا من يوم ما كنت خامس إبتدائي وأنا وزني زائد وتقريبا ولا عمري رحت السوق وأنا مرتاحة ١٠٠ ٪ إنو رح ألاقي كل الي أتمناه على مقاسي علشان كدة كنت أكره أروح السوق أشتري ملابس 😷 ، أنا الوحيدة الي كنت بين أهلي غير في الجسم أخواتي كانو نحاف وأنا كنت نحيفة وأنا صغيرة لكن فجأة لمن كنت سرت في الابتدائي سار وزني يزيد شوية شوية . لمن وصلت المتوسط أفتكر كنت لمن الناس يجو بيتنا في العيد أو مثلا نروح نزور أحد دائما الاقي إنتقادات 😒، ما أقلكم إنو دا الشي ما أثر فيا الا أثر ، كنت أسمع الانتقادات وأنا آغلي من جوا 😡 ليش الناس تحكم عليا كدة وتنتقدني علشان وزني زائد هما ما يعرفوا أنا قد إيش باعاني من دا الشي وقد إيش مأثر فيا وطبعا كنت في عمر صغير كنت وقتها في المتوسط ، كبر معايا الموضوع الين ما دخلت الجامعة وفي سنة من السنين ما أعرف إيش كان في بالي وغيرت شكلي نحفت ، قصيت شعري ، كنت أروح كل يوم الجامعة بفل ميك أب 💄 بس علشان الناس يشوفوني حلوة لحدت صحباتي سارو يقولولي أكيد أتخطبتي هههههههه 😆 من التغيير المفاجيء الي سار فيا وفي نفس ديك السنة كانو في بنات مهم صحباتي كان يجو يتكلمو معايا ويبغو يشوفوني بس علشاني نحفت وأنا كنت أشوفهم وأقول أنا شهد الي كانت قبل وأنا شهد نفسها الي نحفت ليش دحين سارو يبغو يسيرو صحباتي 🤔 هل الشكل والجسم والشكل يخلي الناس يصاحبوني ولو كنت مليانة الناس حيتهربو مني ؟؟ فضل دا الموضوع في بالي . كل ديك السنة كنت تايهة وحسيت إني إنسانة نحفت وأتغيرت مو عشان أنا أبغا أتغير لا علشان كان جواتي في غصة من كل الناس الي كانو ينتقدوني ما كنت أنسى كلماتهم الي كانو يقولولي هيا ، قد إيش كانت
 تأثر فيا 😭 . حتى يوم ما نحفت ما حسيت بمتعة وجمال إني غيرت من نمط حياتي وأتغيرت للأحسن ما كنت حاسة بشي كنت ضاااااايعة ومني عارفة إيش أبغا إلين ما جا يوم 💡 وقلت فيها أنا ليش بأنحف علشان الناس لو أبغا أنحف حأنحف علشاني علشان صحّتي أنا مو علشان أرضي أي
أحد . شفت كتير بنات قدامي وزنهم زائد ومكسوفين يبينو جسمهم علشان إنتقادات الناس لييييييييييش إنتي جميلة بكل حالاتك لو تبغي تنحفي أشتغلي على نفسك 💪🏼 وأستمتعي بكل لحظة بتغيري فيها حياتك لنفسك ، ولو تبغي تكوني زي ما إنتي أنطلقي  ولا تفكري في أحد وتحبسي نفسك في قوقعة تبعدك عن أحلى أيام حياتك عيشي حياتك بالطول والعرض إنتي جمييييييلة 😍 عمرو ما كان الجسم مقياس نحكم على الناس بي ، كل الناس الي بينتقدوا هما غيرانين منك فيبغوا يطلعو فيكي عيب عشان تكرهي نفسك 👿 لا تسمحي لأي مخلوق كان ينتقص منك أو من ثقتك في نفسك . أنا دحين كبرت وفهمت الدنيا أكثر عن لمن كنت شهد قبل ٣ سنين لو أي أحد من الناس الي حوليني أنتقدني في الوقت الحالي أبسط شي  حأقولو ( دا جسمي أنا ! وجسمي عاجبني ) صدقوني لو قلتو الكلمتين دي ولا حيقدر أحد يتكلم بعد كدة أو يرفعوا عينهم في عينك . المجتمع عندنا قاسي وما يرحم بكلامو ☹️ لكن لازم الإنسان يكون قوي 💪🏼 سواء كنتي نحيفة أو مليانة لا تخلي أحد يأثر فيكي هدا الكلام أنا أقولو لنفسي قبل ما أقولو لكم 💘 . كل وحدة دحين بتقرا كلامي أنا أقلك والله العظيم مهما كانت عيوبك إنتي جميلة 🌸🌸، إنتي جميلة فوق أكبر كبير يقول عكس كلامي . مع الأسف مجتمعنا لازم يفهم إنو لو البنت مليانة أبدا مو عيب ، العيب لمن نجي نحنا ننتقد الناس على أجسامهم بدون ما نشوف نفسنا ، العيب هوا لمن نجرح مشاعر الشخص الي قدامنا بكلامنا كفاية ممكن الشخص الي قدامنا مو ناقص أساسا أحد من برا يجي وينتقدو . ليش نحسّس الناس إنو هما أقل منّنا أبدا لا تحسي إنك أقل من أحد إنتي ملكة نفسك 👸🏻، عيشي ملكة وراسك مرفوع دائما لإنك جمييييييلة عيشي كل يوم وكل لحظة بسعادة 😃 الدنيا فانية وقصيرة .
الإنسان ربّي خلقوا للعبادة وللسعادة في الدنيا عيشوا حياتكم بدون ما تفكروا في كلام الناس ، كلام الناس لا يودي ولا يجيب . طوّري من نفسك ، أدرسي ، غيّري نمط حياتك ، أعملي رياضة ، أثبتي وجودك ، خلي عندك موهبة وههدف تصحي كل يوم عشانو 💜، اضحكي ، وألعبي وعيشي حياتك علشان نفسك مو علشان أي أحد غيرك إنتي فقط .
أنا أحبكم كلكم وأقلكم إنتو جميلين بكل ما فيكم من مميزات وعيوب كل إنسان مميز حطو دا الشي في بالكم أهم شي تكون قلوبنا صافية هادا أهم شي ودائما حبي نفسك أول ولا تربطي سعادتك بالناس 🌸 .
أنا هنا مو علشان أعلمكم كيف تكونو جميلين أنا هنا علشان أخليكم تشعروا إنكم جميلين وتحسوا بدا الشي 💘 ، التدوينة قصيرة بس أتمنى تكون رسالتي وصلت ، أحبكم جميعا ومع السلامة في تدوينة جديدة يا أحلى وأجمل ناس .

18 comments COFFEE TALK