بسم الله الرحمن الرحيم
كيفكم بنات إن شاءالله يارب كلكم تكونوا بخير .. اليوم التدوينة ما كنت مخططالها أبدا كنت على أساس أنزل تدوينة ميك أب لكن اليوم الصباح سار معايا موقف خلاني أكتب هادي التدوينة الي هيا حتكون من ضمن سلسلة coffee talk with shahad السلسلة دي مواضيعها دائما تلامسني فإذا كنتوا تبغوا تكملوا معايا التدوينة سوولكم قهوة أو شاي آو أي شي تروقوا عليه ويلا حبايبي نبدأ التدوينة :)
اليوم صحيت الصباح فجاتني رسالة على جوالي من إنسانة أعرفها و مقربة مني جدًا كانت بتقلي شهد أنا رحت للدكتور والدكتور قلي إنو إحتمال الشي الي طلع فيكي يكون وراه المرض الله يحمينا يارب و يعافي كل مريض وإنو أنا خايفة و كدة وقتها أنا زي كإنو أحد أعطاني كف على وجهي فِضلت مني عارفة إيش أقول .. طبعا هيا مافيها شي إن شاء الله هما فقط شاكين فيبغوا يعملوها كم إختبار وكدة بس أنا أنفجعت لإنو البنت قريبة مني جدًا ودائما معايا ، بعد كدة حاولت أهديها وأتكلنا مع بعض شوية و بعد ماقفلنا أنا وقتها خلاص ما شفت قدامي حسيت قلبي انقبض و أساسا اليوم زي كإنو قلبي حاسس ماداومت ، فجلست لحالي ما أبغا أشوف أحد بعدين بدأت أفكر قد إيش الإنسان ضعيف من جد ترا نحنا جداً ضعاف لازم كل واحد يجلس مع نفسو يشوف هوا إيش سوا في حياتو ، البنت دي إن شاءالله مافيها الا العافية بس دا الموقف خلاني أشوف إنو المرض يجي فجأة و ما يعرف لا صغير ولا كبير ، كمان من الأشياء الي فكرت فيها أنا ليش ما أعمل الأشياء الي أحبها وأحلم بيها ليش دائمًا أقول بكرة أسويها ليش ما أسويها اليوم و الله الدنيا قصييييييرة محد يعرف بكرة إيش مخبيلنا ، أنا من الناس إلي أخاف جدًا من المستقبل وفيه حاجات كتير نفسي أسويها لكن خايفة من الفشل مو إنو نقص إيمان الحمدلله أنا مؤمنة بالله لكن أنا من الناس الي أفكر كتير الدنيا دي إيش مخبيالي ؟؟ فبعد هادا الموقف قلت أنا لازم أجلس مع نفسي و أحاول أحقق أحلامي حتى لو كانت مستحيلة ربي موجود و أكيد حيساعدني أنا ما أعرف بكرة إيش ممكن يسرلي ؟ الشي الوحيد إلي أعرفو إنو ربي ما حيسيبني ... الشاهد من الموضوع ومن القصة الي أديتكم هيا هوا إنو لا تيأسوا من تحقيق أحلامكم حتى لو كانت الظروف ضدكم لإنو الدنيا قصيرة مهما كانت قوتنا إلا ما حنضعف ، فلا تأجلوا أحلامكم إلين ما يجي اليوم إلي تقولوا فيه ياريت سويت حلمي و أشتغلت عليه ، فلو مثلا كنتي بنت وتحلمي إنك تسيري دكتورة ذاكري وأجتهدي وإن شاءالله حتسيري حتى لو كانو كل الناس ضدك ، لو تبغي تنحفي وتنزلي وزنك أبدئي و لا تستني إلين ما تجيكي الأمراض بعدين تقولي ياريت و نفس الشي بالنسبة للولد . لا تخلوا أحد يوقفكم عن حلمكم ودائما خلوكم مع الله و أشتغلوا لرضا ربنا و للآخرة دائما نحنا تشغلنا الدنيا وننسى ربنا إلين ما يجينا موقف يصحينا و يخلينا نفتكر ربنا .... طبعا دا الشي غلط ، نحنا دائمًا لازم نكون متعلقين بالله في قوتنا و ضعفنا طالما إيماننا بالله قوي إن شاءالله رح نقدر نتغلب على كل شي ورح نقدر نوصل لأحلامنا المواضيع الي زي كدة يهمني إني أكلّمكم عنها الميك أب و العناية كلها أمور دنيوية ننبسط فيها صح بس الي أهم من كدة هوا علاقتنا بالله و هل نحنا عن جد مبسوطين بتحقيق أحلامنا المؤجلة ولا لأ ؟ ، فمن اليوم لا توقفّوا حلمكم أبدًا خليكم أقوياء ما تخافوا من شي والله معاكم وحطوا في بالكم إنو إنتو دحين الحمدلله بخير وبصحة عيشوا اليوم بتحقيق أحلامكم وبعلاقتكم مع الله أهم شي . السنة الي فاتت حصلّي برضو موقف كان قوي جدا عليا وأثر فيا مرررة كتير لمن ماما تعبت و نامت في المستشفى أسبوعين ، أسبوعين و أنا كنت عايشة تايهة بدون أمي كنت أروح الجامعة بلا روح و كانت عندي إختبارات ، وقتها برضو حسيت إنو أنا من جد ضعيفة الحمدلله بعدين طلعت و هيا دحين تمام الله يخليها ليا و يخليلكم أمهاتكم يارب بس تعرفوا ترا نحنا ما نصحى إلا لمن نمر بمواقف زي كدة فليش !! لا تستني أمك تتعب علشان تقوليلها أنا أحبك لا تستني أبوكي يتعب علشان تقوليلو لا تسيبني أبدؤا من دحين روحو لأمهاتكم وأبهاتكم وأمسكوا فيهم ولا تسيبوهم لإنو الدنيا قصيرة وأهم شي فيها الصحة والسعادة وراحة البال ، أكتبوا أحلامكم وخلوها واقع تعيشوا علشانوا و أنا من هنا أقلكم الله يطمن بالكم ويطمن بال كل مريض ويشافي كل مريض ويسعدكم يارب أدعوا لآحبابكم سواءً كانو أحياء أو أموات .
********
إن شاءالله من اليوم رح أجري ورا حلمي وإنتو كمان أجروا ورا أحلامكم و حاولوا تِبسطوا الناس ، الله يوفقكم يارب و لا تنسوني من دعاكم الله يسعدكم حبايبي .. أبغا أطلب منكم طلب ؟ كل أحد قرأ التدوينة يكتبلي تحت موقف أثر فيكم و كيف غير من حياتكم للأفضل خلونا كلنا نعطي طاقة أمل لأي شخص ممكن يكون فاقد الأمل ومستنّي مين يعطيه طاقة إيجابية تنور حياتو مرة شكرا حبايبي وإن شاءالله قدرت أوصل رسالتي بدون ما أتقل عليكم الله يسعدكم يارب ومع السلامة .
0 التعليقات:
إرسال تعليق