بسم الله الرحمن الرحيم
السلام عليكم ورحمة الله وبركاته كيفكم حبايبي تدوينة اليوم طلبتوها مني في تويتر فقلت لازم أكتبلكم هادي التدوينة في أسرع وقت ممكن فاليوم إن شاء الله حتكون تدوينتنا عن كيف نكون صباحيين فيلا نبدأ تدوينتنا .... :)
أول شي أبغا أتكلملكم عن نفسي أنا إنسانة أعشق الصباح ، لمن أشوف سبحان الله كيف خلّى الناس الي تروح لدواماتها والي تجلس في بيوتها والي تودي أولادها المدارس مجرد التفكير بدا الشي خلاني أعشق الصباح دايما الصبح هوا الوقت الي أشوف فيه نفسي ، أجلس أعمل كل الحاجات الّي أحبها في داك الوقت و أحيانا ما يكون عندي شي أسويه فأجلس أفكّر لحالي عن يومي و عن حياتي فمن جد الصباح من أحلى الأشياء الي مارح تندمو عليها أبداً .
THE NIGHT BEFORE
في الليلة الي قبل
١- أعملوا خطة لصباحكم كيف تبغوه يكون ؟ إيش الإنجازات الي نفسكم تسووها ؟
٢- عايرو منبه جوالكم على الساعة الي تبغو تصحوا فيها وخلّو الجوال بعيد عنكم تماما عشان لمن يرن حتتطرّوا تقوموا عشان تقفلوه .
٣- قفلوا كل الإلكترونيات من جوال - آيباد - تلفزيون ـ كمبيوتر.... ونااااااااموا بدري يعني بالكثير ١٠ في الليل تكونو نايمين عشان تقدرو تصحو بدري .
AFTER YOU WAKE UP
أول ما تصحو من النوم
١- صلّوا الصبح ... الصلاة سبحان الله لحالها كفيلة إنها تصحينا الصبح و بعد ما تصلوا لا تنامو تاني .
٢- رتبوا السرير وهادي العادة مررررة حلوة لإنها حتخلي يومكم مرتب و تديكم طاقة حلوة بدل ما تخلو السرير مكركب .
٣- أشربوا موية نص لتر أول ما تفتّحوا عيونكم ههههه الموية أحسها تُحيي أعضائنا و تساعد عالحرق و تساعد البشرة و الشعر و كل شي فلازم تشربوا موية الصباح هادا غير باقي اليوم لازم تشربوا ٣ لتر في اليوم .
٤- أعملوا رياضة .... الرياضة من الأشياء الي تديكم حافز إنكم تكونو هيلثي و كمان تعطيكم طاقة مارح تخليكم تنامو و حتشيلو من بالكم إنو لسة ما أتمرنتو ولازم تتمرنو لإنكم أساسا متريضين من الصباح .
٥- دلّعو نفسكم خذوا شاور .
٥- أفطروا ... الفطور شي ضروري لازم تاكلوا قبل ما تروحو الدوام أو الشغل علشان الفطور رح يخليكم تحرقوا كالوريز أكثر في خلال اليوم .
٦- أعملوا أي نشاط يخليكم تصحوا كل يوم متحمسين مثل قراءة كتاب مع شرب كوب قهوة ، شوفو إيش الشي الي يحمسكم و حاولو تعملوه كل صباح .
٧- أكتبوا كل يوم هدف واحد كبير وحاولوا تحققوه خلال اليوم .... بعد كدة أنطلقوا ليومكم سواء كنتو رايحين لشغلكم ، دواماتكم .
صدقوني هادي النصايح رح تغير فيكم ورح تخليكم تنجزوا أكثر ولو تشوفوا أكثر الناس المنجزين والناجحين سواء كانو أجانب أو عرب كلهم يصحوا الصبح .. طبعا في البداية ممكن ما تتعودوا لكن يوم يومين حتسير عندكم عادة و مارح
تبطلوها .
**************
اليوم التدوينة خفيفة لكن إن شاء الله تفيدكم وتعجبكم قولولي إيش روتينكم الصباح ؟؟؟ وإذا عندكم أي إقتراحات لتدوينات جية قولولي تحت في الكومنت ولا تنسوا لو تبغو تشوفو مني أكثر تابعوني على السوشيال ميديا كل الروابط تلاقوها في المدونة مرررة شكرا حبايبي و مع السلامة .
الحمد لله انسانة صباحية صح عندي دواااام بس حتى ف الويكند اصحى الصباح
ردحذفياقلبي عليكي دعاء هادا الصح من جد أنا أستغرب من الناس الي يكرهو الصباح ... صباحك دايما سعادة ياقلبي 💜
حذفحتى انا احب الصباح واللي يحمسني اقوم التصوير والهدووء ..❤️
ردحذفإنتي زيي حتى تلاقيني لمن تكون عندي تدوينات أو تصوير ما أرتاح إلا لمن أصحى بدري هههه 💘
حذفالصباح أجمل فقرة باليوم 💕
ردحذف💘 من جد أنا لو ما شفت الصباح كل يومي يسير ماله أي داعي
حذفأعشق وقت الصبح سبحان الله أروق وقت باليوم وجد أحس وقت الصباح طويل لو قمت بدري أحسني أقدر أنجز كثير أشياء وأهمها أني أتشجع للرياضه بذا الوقت وصير حتى يجيني ألهام لأفكار فيديوهات وأتحمس أصور 😻❤❤❤ ، موفقه حبيبتي شهد
ردحذفمدونتك جميله مشالله
ردحذف