COLOURPOP HAUL | مشترياتي من موقع كولور بوب

  بسم الله الرحمن الرحيم  

أهلا بنات كيفكم ؟؟ خلاص ما يحتاج أقلكم إنّكم وحشتوني هادي أوّل تدوينة ليّا في السّنة الجديدة إن شاء الله يارب تكون سنة ٢٠١٧ سنة خير وإنجازات لنا كلنا نحقّق فيها كل الّي نتمناه يارب ... طيب أنا اليوم جيتكم بتدوينة من زماااان وإنتو مستنيينها مني الّي هيا مشترياتي و تجربتي لشركة كولور بوب للميك أب فيلا نبدأ ... :)

  تجربتي مع كولور بوب  

أوّل شي رح أتكلّم عن طريقة الطلب أنا طلبت من موقعهم على أساس إنو يجيني عالسّعودية دايركت وجاني عن طريق البريد خلال تقريبا ١٤ يوم كانت عندي الشحنة ، رسلولي رسالة البريد السعودي إنّو عندك طلبية تعالي أستلميها دفعت حق الشحن غير قيمة المنتجات ١٠٠ ريال يعني مهما كانت طلبيتك قيمتها زودي عليها ١٠٠ ريال حق الشحن للسعودية وهادي ال١٠٠ ريال تدفعوها أونلاين وقت ما إنتو بتطلبو من الموقع لمن تجي السعودية تستلموها وبس بدون ما تدفعوا شي .

كولور بوب من الشركات الرخيصة والجودة حق أغلب المنتجات حلوة يعني من الشركات الي عرفت كيف تجذب الناس بأسعارها الرخيصة والجودة الكويسة ، وطبعا زي أي شركة ميك أب أكيد في منتجات من عندهم عجبتني و في منتجات ما عجبتني لكن عموما كولور بوب من الشركات الي أكيد حأرجع أشتري منهم وأنبسطت إنّي جرّبت منتجاتهم .

  مشترياتي :)  

أنا أشتريت خمسة شادوهات سعر الشادو الواحد ٥ دولار يعني حوالي ٢٠ ريال سعودي ، و أشتريت أربعة ألترا مات لكويد لبستيكس ب ٦ دولار الواحد يعني ٢٤ ريال للواحد .

  الشادوهات  

شدوهات كولور بوب يمكن من أحلى المنتجات الي من عندهم إذا ما كانت الأحلى من جد الشادوهات تركيبتها ما شفتها في أي شركة تانية لمن تحطو أصباعكم في الشادو تحسو إحساس زي كإنكم حاطين يدكم على زبدة حتى ممكن لو لمستو  الشادوهات بقوة بي أصباعكم تتكون حفرة مرة الإحساس غريب وحلو و ما شفتو الا عندهم الألوان الّي فيها لمعة أنصحكم   تستخدموها بيدكم مو بالفرشة لإنها كريمية أكتر من المات و بعدين باليد رح يطلع اللون أقوى ، الألوان المات ممكن باليد والفرشة عادي . شادوهاتهم قويّة من ناحية البقمنتيشن يعني اللون يطلع واضح في السواتش وفي العين شادوهاتهم أنا عن نفسي مرررررة حبيتهم وأنصحكم بيها ودحين رح أوصفلكم كل لون لحال

  1- ENVY  

دا اللون أسود و فيلو قلتر بنفسجي اللّون جدًا جميل مرررة حلو و غريب وأحس إنو لازم يكون عند كل بنت ، هوا من الألوان الي ما تنفع لكل يوم أكيد تنفع للسهرات و المناسبات الكبيرة بس إلا ما رح تستخدميه من جمااااالو مرة حلو و قوي حطوا تحت كلمة قوي مليون خط طبعا أي لون أسود لمن تحطيه لازم تدمجي مرررة كتير عشان يديكي اللوك السموكي ، ينفع باليد أو بالفرشة ، والله اللون دا حكاية أنا حبيتو لإنو لون نادر وأنا أحب الألوان النّادرة الّي مافي زيها .

  2- TANG  

 دا اللون مررررة يشبة اللون الي إسمو بيل بعد شويّة رح أورّيكم هوا ، اللّون دا موف جي على رمادي شويّة ، ينفع للصّباح   تحطّي منو شويّة على كل الجفن لو كنتي في الجامعة أو الدوام تعجبني الألوان الّي زي كدة لكل يوم وأنا عشان كدة جبتو .

  3- BILL  

هادا الّلون مشابه جدّا لي اللّون الّي قبل بس دا موف مهو على رمادي ينفع لكل يوم ، بشكل عام اللونين يتشابهوا جدّا ممكن تلخبطي بينهم و الإثنين ممكن تستخدميهم بالفرشة أو باليد لإنهم جيّين على مات .

  4- TEA PARTY  

طيب اللّون دا زي ما إنتو شايفين اللون بنك أو بمبة فاتح مع قلتر أو لمعة وبرضو أنا أشوف هادا اللون غريب بس مو لكل يوم للمناسبات أكثر ويفضّل تستخدموه باليد مو بالفرشة حيطلع أحلى وحيبان أكثر .

  5- BAE  

لو قلتولي إيش أحلى لون عندك من كل الخمسة آي شادوز أقلّكم هادا اللون ، اللّون مرررررة حلو بنفسجي وله أكثر من إنعكاس ممكن يعكس بنفسجي أزرق وممكن يعكس بنفسجي عنابي محمر ، رهيب في السواتش وعالعين وكل شي أحب أستخدمو بيدّي عن الفرشة أنا أقلكم من دحين أشتري هادا اللون وإنتي مغمضة لإنو جمييييل وما حتندمي عليه يجيب السعادة والله .

  الأرواج  

أوّل حاجة كل هادي الألوان نوعها ultra matte lipsticks يعني مطفية بزيادة .. نبدأ بأوّل لون من اليسار إسمو love bug هادا اللّون كدرجة مرة حلو بني على أحمر غامق نزل في مجموعة الخريف لكن كفورميلا وتركيبة أبدًا ما عجبني اللّون يتقشّر يعني مثلا لو حطّيتي اللّون على إيدك كسواتش ومرّرتي أصباعك عليه حتلاقيه يتفتفت معاكي ويتقشر حتى لمن تحطيه على شفايفك يعمل نفس الشي يتقشّر ويتفتفت مرة تركيبتو ما عجبتني ... نروح لثاني لون cheap thrills دا اللّون موف غامق  اللون عادي بالنّسبالي لكن أنا عندي مشكلة عمومًا مع ألوان الألترا مات من كولر بوب إنّهم ثقيلين عالشفايف بزيادة ويتقشّرو مع الوقت يعني أول ما أحط الروج يطلع خرافي نص ساعة بس يبدأ يضايقني ويتقشّر ويعمل الخط هادا الي في الشفايف لمن تتقفل على بعض مهما أهتميت بشفايفي تسرلي نفس المشكلة مع كل ألوان الألترا مات من كولوربوب فهادا اللّون كويّس بس برضو بيعمل معايا نفس المشكلة .... نروح ل trap هادا اللّون على بشرتي طلع مرررة فاتح  لونو عليا طالع بيج و ترا يختلف اللون هادا درجتو من بشرة للتانية يعني عليا بيج عليكي ممكن يطلع اللون غير تماما ، ينفع لو إنتي بتحطيه مع أرواج تانية كلون فاتح  بذّات لو بشرتك حنطيّة ومافوق ، الدرجة مرة فاتحة كمان من الأشياء الّي لاحظتها في ألوان الألترا مات إنو كل لون له تركيبة غير يعني trap حسّيتو أحسن من الباقي من ناحية التركيبة كان أخف مو ثقيل مرة لكن أنا ما جربتو كثير لإنو فاتح عليا مرّة إن شاءالله رح أجربو أكثر مع أرواج تانية وأقلّكم ... آخر لون إسمو bumble من الأربعة الألوان هادا أحلى لون من ناحية الدرجة اللّون درجتو رهيبة أورانج غامق و في نفس الوقت مهو غامق مني عارفة كيف أوصفو ، جيا الدرجة على لون بشرتي حلوة لكن فيلو نفس المشكلة إلي قلتها بشكل عام مع كل ألوان الألترا مات إنو يتقشر وثقيل عالشفايف ومع دا كلو أحب اللّون درجتو رهيبة .

رح أرجع أجرب كم لون ألترا مات من عندهم و أشوف هل كلّهم يعملوا نفس المشكلة أو لا وحاقلّكم بس دحين كل الأربعة ألوان فيهم نفس المشكلة مع الأسف قولولي إنتو لو جرّبتوا الألترا مات هل سارتلكم نفس مشكلتي أو لا ؟ ياريت كولوربوب يحاولوا يحلّو دي المشكلة لإنو الألوان درجاتها حلوة لكن التركيبة ما عجبتني أبدًا .

  سواتشات  

من اليسار أول شادو bae ثاني لون في الوسط bill وآخر لون tea party 

أول لون من اليسار envy و اللّون الثاني trap شفتوا كيف ! لونو موف على رمادي قريب جدّا من bill 

الّلون الي عاليسار cheap thrills و اللّون الثاني love bug 

اللّون إلّي عاليسار bumble شفتو كيف درجتو رهيبة :) و اللّون الّي عاليمين trap

*********

بشكل عام أنا أشوف إنّو ماركة كولور بوب من الماركات الي منتجاتها حلوة و زي أي ماركة فيها الحلو وفيها الوحش السعر لحالو شي جميل أشياءهم رخيصة وجودتها جيدة ، أنا للآن ما حبيت فقط شي واحد الي هوا تركيبة ال ultra matte lipsticks ... أكيد رح أرجع أشتري منهم تاني و ترا قريبًا كمان إن شاءالله رح تكون في تدوينة تانية عن كولور بوب .

و بكدة حبايبي نكون وصلنا لنهاية التدوينة أتمنى تكونو أستفدتوا منها و آسفة لو هادي التدوينة أخذت مني وقت شكرًا حبايبي ومع السلامة .

2 comments Makeup