بسم الله الرحمن الرحيم
كيفكم بنات اليوم تدوينتنا حتكون إن شاء الله موضوعها يحمس عند أغلبكم ، أنا عن نفسي جدًا متحمسة لهادي التدوينة من زمان فبدون ما أطول عليكم خلينا ندخل طوالي عالتدوينة ...!
قبل فترة أشتريت من موقع كايلي شيئين المات لبستيك سبايس و البرقاندي باليت و علشاني طلبت يوم الهالويين بالضبط فأعطوني الميتال مات كاي ماجيستي مجانًا .
لمن طلبت شحنت الشحنة على أراميكس يعني حطيت عنواني حق أراميكس في إمريكا الشي اللي حبيتو في موقع كايلي إنو سارت تعمل ريستوك دائما لمنتجاتها فلمن دخلت موقعها أبدا ما كنت أتخيل إنو رح الاقي البرقاندي باليت موجودة بم إنها منتج جديد أو دوبو نازل تقريبا لقيت كل المنتجات يومتها موجودة و حتى توصيل الشحنة من الموقع الين ما وصلتني أخدت بس ١٢ يوم فكان شي حلو .
لكن حطّوا في بالكم إنو لو طلبتوا في وقت إجازاتهم يعني السبت والأحد ما يشتغلوا فممكن تتأخر الشحنة كمان يومين يعني ممكن تاخد ١٥ يوم مثلا .
أنا طلبت فوق ال ٦٠ دولار فما دفعت فلوس الشيبينق و أعتقد لين دحين موجود هادا العرض .
لمن وصلتني الشحنة ما أقلّكم قد إيش كنت مبسوطة مررة حبيت التعليب حق المنتجات لانو كان سمبل و بسيط لكن في نفس الوقت مو رخيص بالتحديد الباليت صغيرة على قد كف اليد فتنفع تنكرف و تاخدوها معاكم كل مكان .
THE BURGUNDY PALETTE
إنتو تعرفوا قد إيش أنا أحب باليت توو فيسد التشوكليت بار الي ضايفينني في السناب تشات يعرفوا هادا الشي ، لكن دحين أقدر أقلكم إنو باليت كايلي أحسن باليت عندي في الكوليكشن لين دحين ، الباليت فظيع مميزاتو أكثر من عيوبو أنصح فيه و بشدة لإنو تقدروا تعملوا من الباليت لوكات صباحية و مسائية ، الباليت كمان جامع بين الأوان البرونز و الألوان الأحمر عالعنابي جدًا الألوان رهيبة إنتو تعرفوا كيف أنا أقلكم رأيي بكل صراحة و من جد كايلي أشتغلت على هادا الباليت .
طيب أول شي مافي شي كامل و الحلو ما يكمل ... الباليت زي ما قلتلكم الألوان فظيعة لكن الألوان المات بالتحديد لمن تلمسوها أو تعملو سواتش أو مثلا تحطوا عليها الفرشة الباودر حق اللون تتطاير في نفس الباليت لكن في العين ما تتناثر و هادا شي حلو اللون الي شوية أتناثر معايا عالعين هوا الي إسمو Burgundy أنا الصراحة ما يهمني إذا الألوان أتناثرت شوية أهم شي إنو اللون قوي وما بيتناثر عالعين و هنا الألوان المات فقط الي كانت تتناثر في نفس الباليت مو في العين .
نجي للألوان الشمير أو الميتاليك ، كايلي من جد أشتغلت عليهم من قلب الألوان جدا جميلة و من مسحة وحدة تلاقي اللون قوي على أصباعك و حتى لمن تحطيهم على عينك مايحتاج تستخدمي فكس بلس من كتر ما الألوان قوية ، و الألوان المات كمان مرررة قوية و من مسحة وحدة تبان عالعين دحين رح أتكلّملكم عن أكثر الألوان إللي حبيتها في الباليت ١- Naked هادا اللون فظيع للهايلايت تحت الحاجب أو عند مدمع العين من جمالو سرت أستخدمو كهايلايتر عند أنفي و شفايفي اللون رهيب بذات إذا كانت بشرتك حنطية أو سمراء ، أنا بشرتي حنطية و طلع مرة حلو ممكن يطلع شوية غامق على اللي بشرتهم بيضاء و الشي الحلو كمان في هادا اللون إنو مو شيمري أو فيلو لمعة كثير لمعتو قليلة علشان كدة رهيب و مهما حطيتي منو مايبان كثير ، ٢- Penny دا اللون من الألوان الي خلتني أشتري الباليت لإنو جي على أورانج و أنا من زمان نفسي في لون نود أو لحمي رايح على أورانج كلون إنتقالي أو حتى على كل الجفن اللون قوي ورهيب ، ٣- LA دا اللون فتنة جمالو خيالي من مسحة وحدة اللون يطلع قوي يجنن زي الزبدة لمن تلمسوه الفورميلا حقت هادا اللون مرة خطيرة ، لو باعت منو كايلي كلون منفرد أو لحالو حأشتري منو مجموعة و أخليهم عندي خلاص ماأقدر أقلكم أكثر من كدة قد إيش اللون حلو ههههه ، ٤- Burgundy هادا اللون ما أقدر أقول مو حلو يتناثر شوويية لكن لو حطيتوه لحالو كفاية مرة حلو ، ٥- Brick and Almond هادول اللونين حلوين كلون غامق شوية على كسرة العين مرة حبيتهم .
عموما الألوان الشيمر مرررة حبيت الفورميلا حقتهم و كلهم سواء كان الشيمر أو المات البقمنتيشن حقهم قوية من مسحة
وحدة .
SWATCHES
SPICE MATT LIPSTICK
طيب هادا اللون أول مرة جربتو كانت تجربتي معاه مهي حلوة ليش ؟؟ لإني ما عرفت أستخدمو فكتّل معايا و ما كان متوحد فحطيت أكثر من طبقة و هادي أكبر غلطة ، المرة الثانية لمن حطيتو حبيتو مرة و ما حسيت إني حاطة روج من الأساس المرة التانية خلّتني أبغا أشتري كل ألوان أرواج كايلي .
أرواج كايلي الغامقة بالتحديد دائما أشوف انتقادات عنها في اليوتيوب و غيرو إنها تسير مهي متوحدة عالشفايف فا تتطرّي تحطي أكثر من طبقة و إنو لو طبقتي شفايفك يتمسح اللون من الوسط هادا الشي صحيح و سار معايا أول مرة لكن في طريقة قالت عليها كايلي عملتها المرة التانية و طلع اللون فظيع دحين أقلكم إيش تسوو مع أرواج كايلي الغامقة و كلمة الغامقة حطوا تحتها ١٠٠ خط ههههه
١- حدّدي شفايفك بالقلم كل شفايفك مو بس الأطراف .
٢- جيبي اللّكويد ليبستيك وطبطبي فقط على شفايفك ما تمسحي طبطبي فقط .
٣-لا تطبقي شفايفك على بعض عشان ما يتمسح اللون و تتطرّي تحطّي طبقة ثانية ويسير اللون ثقيل خلّي اللون ينشف تماما بعدين أطبقيهم لو مرة لازم .
لو عملتي هادي الخطوات مع أي لون غامق من كايلي حيطلع بيرفيكت جدًا ما رح تحسّي باللون على شفايفك ، كمان لاحظت إنو الروج ما عمل معايا الخط الي يسير مع الكلام أو مع الشفايف لمن تكون على بعض و هادا الشي مرة حلو ، أكيد رح أجرب من الألوان الفاتحة الي عندها و أقلكم رأيي عنهم بس عموما حبيت ملمس أرواجها عالشفايف من تجربتي
لسبايس .
SWATCH
METAL MATT LIPSTICK
طيب هادا اللون زي ما قلتلكم جاني مجانًا و أنا للأمانة ماجربتو لكن عموما هوا مهو مات هوا قوامو موسي شوية و اللون جي رمادي على ميتال فيلو قليتر ، أشوفو حلو لو كنتي مثلا حاطة تحتو روج أسود مات و هوا حطيتيه من فوق اللون الأسود أما لحالو ما حيثبت لكن عموما اللون حلو يعني من باب التغيير بس صعب لإنو ما يليق إلا عالأسود أكثر شي .
SWATCH
وبكدة حبايبي نكون وصلنا لآخر التدوينة أتمنى تكونو حبيتوا التدوينة وأتأكدوا إنو ما خلّيت فتفوتة إلا و قلتلكم عنها لو عندكم أي سؤال أو أي شي تبغوا تقولوه تحت في الكومنت خدوا راحتكم ولا تنسوا تتابعوني في السوشيال ميديا مررررة أحبكم و إن شاء الله أشوفكم في تدوينة جديدة قريب .
Instagram & Twitter : ThatBeautyAngel
Snapchat : glamorous-angel
كنت محتارة اخذه او لا
ردحذفبس حبيت الالوان ف السواتشز ��
شوفي حبيبي أنا بالنسبالي مرررة حبيت الباليت فلو تبغي باليت حلو لكل وقت ليل نهار أنا أقلك أتوكلي على الله وأشتريه لإنو يستاهل ❤️
حذفحببت الباليت و استني حقتي توصل
ردحذفان شاءالله ياقلبي توصلك وتتهني فيها وتحبيها زي ما أنا حبيتها وأكيد أنا مستنية رأيك في الباليت إن شاءالله لو وصلتك وأستخدمتيها 💛
حذف