COFFEE TALK WITH SHAHAD | طرق أسعد فيها نفسي في زمن كورونا ؟

  بسم الله الرحمن الرحيم  

السلام عليكم يا أحلى ناس كيفكم😀 ؟؟ وحشتوني سنة ٢٠٢٠ يمكن أكثر سنة صعبة مرت عليا في حياتي كلّها😭 .. من بداية السنة تقريبا في أواخر فبراير جانا وباء عالمي أكتسح العالم كله عيّشنا في خوف فظيع ، خوف على أهلنا وخوف على نفسنا وخوف على الناس الي نحبهم ، منّنا الي خسر أحد من أفراد أسرته الله يرحم موتانا وموتى المسلمين يارب وأنا أتمنى إنها تكون آخر الأحزان يارب و مننا من خسر وظيفته بسبب إنهيار الإقتصاد.

وأكيد أغلبنا تعب نفسيا بسبب الي بيسير في العالم مو بس من كورونا من أشياء كثير زي مثلا الظلم الي بيسير في العالم وعدم الرحمة الي سارت في قلوب الناس❤️. على قد ما كنت حاطّة أهداف لهادي السنة الا إني ما سويت أي شي لتحقيق أهدافي كانت أغلب أيامي تمر مرور الكرام تمر بلا هدف كنت بس قاعدة أفكر في الي بيسير حوليني😳 .

لكن مع ذلك فترة كورونا كنت أغلب الوقت في البيت طبعا بذّات فترة الحجر كنت أقضيها في بعض الأمور الي أحس إنو كان لها اليد إنو تخفف عليا طفش حبسة البيت هههه بعد الله أكيد، دحين حابة أقلكم بعض الأشياء الي كنت أضيّع فيها وقتي🤓 ؟

 ١- اليوتيوب  

اليوتيوب❤️ كان نجم الساحة فترة الحجر وفترة كورونا بشكل عام أوّل ما أحس إني أبغا أخرج من الواقع الي أنا فيه أدخل عاليوتيوب وأقعد أتفرّج على ناس إهتماماتهم من إهتماماتي😊 هادا الشي كان يغير من نفسيتي للأفضل .

 ٢- سورة البقرة  

قبل ما أنام من زمان ماما الله يسعدها💗 معودتني إنو لمن أكون متضايقة أسمع سورة البقرة أو أي سورة من القرآن الكريم وأغمض عيني وأنام ما أقلكم كمية الراحة الي أحس بيها لمن أقوم من النوم .

 ٣- الطبخ  

انا من الناس الي أحب أطبخ بالذات لمّن يكون مودي مود الطبخ تلاقوني أبدّع ما أحب أطبخ وأنا مغصوبة .. ف فترة شهر رمضان كله كنت أنا أطبخ لأهلي فطور رمضان😋💖 ومن جد كنت مرة أنبسط لمن يمدحوني ويمدحوا طبخي ههههه أحيانا المدح بذّات من الأهل يعطينا طاقة إيجابية كبيرة .

 ٤- الفيديو قيمز  

الي يعرفني كويّس يعرف قد إيش أنا أحب ألعب من زمان وأحب أجمّع كل أجهزة الألعاب أنا وأخوية الي أكبر مني عشنا كل طفولتنا نلعب فيديو قيمز وكبرنا على هادا الشي💜 صح الحياة والدراسة أحيانا تخلينا نلتهي عن اللعب ولكن أنا وأخوية كل ما نكون طفشانين نلعب .. الفترة الي فاتت كنت ألعب أنيمال كروسينق على النينتيندو سويتش رهييييبة من جد كانت تطلعني من مود الطفش😃 جرّبوا تلعبوا فيديو قيمز صدقوني حتنبسطوا هههه .

 ٥- المسلسلات التركية 

إنتو أتوقع سرتوا تعرفوني وتعرفوا إنّي أموت في المسلسلات التركية بداية الحجر بالذات كنت أتفرج مسلسلات تركية كثير صح المسلسلات ماكانت كثير كعدد ولكن كان فيه كم مسلسل كنت مجمعة حلقاتهم الين ما يخلص الموسم وأتفرجها ورا بعض وفعلا هادا الي سويته للان عندي مسلسلات ما خلصتها😁..يبغالي أسويلكم جزء ثاني من أحلى المسلسلات التركية الي حاليا أتفرجها قولولي في الكومنت إذا تبغوني أكتبلكم هي وأنزلها لكم .

 ٦- الفضفضة  

أنا من النوع الي أتحمّل وأكتم مشاعري وما أعبّر بس أوصل لمرحلة خلاص أنفجر ودايما لمن اوصل لدي النقطة أدق على أختي الكبيرة وأقعد أبكيييييييييييييي🤣😂 وأطلّع كل الي ف قلبي أختار أخواتي غالبا علشان ما أكون أبغا ماما تشيل همي أو تشوفني زعلانة .. فدايما أرجع لأخواتي إنو يطلّعوني من الكئابة الي أنا فيها ولو مافي أخواتي أروح لأعز صديقة ليا أدق عليها ونقعد نتكلم بالسّاعات ههههههه أهم شي إني أفضفض .

 ٧- الموسيقى  

أحيانا أحب أنعزل عن العالم ف ألبس سمّاعاتي🎧 وأشغّل ألحان وموسيقى تخليني أروح مكان غير الواقع ..أنا أحب الموسيقى جدًا بكل أنواعها أهم شي إنها تدخل جوتي وأحس بيها😍..مؤخرا بدأت أتعلم على آلة موسيقية لأول مرة في حياتي يبغالي لمّن أتمكّن أكثر منها أوريكم هي :) ..

 ٨- الخروج من البيت بحذر 

أنا من الناس البيتوتية إلي نادرًا جدا لمن أطفش من البيت ولكن هادي الفترة الشي الغريب إنو سرت أطفش من جلسة البيت فقبل فترة خرجت أنا وأختي💃🏻 ورحنا المول كانت خرجة خفيفة ظريفة غيرت فيها جو ومن جد أتغير مودي ١٨٠ درجة .

💕💕💕💕💕💕💕💕💕💕💕💕💕💕💕

كدة كنت أقضي وقتي في زمن كورونا قولولي إنتو كيف تقضوا وقتكم ؟؟

آخر شي أبغا أقوله إنو هادي الحياة قصيرة أهم شي أهتمّوا بصحّتكم وعيشوا حياتكم بدون ما تزعلوا صدقوني كلنا بنمر بظروف مايعلم بيها الا الله لكن لازم نوقف تاني على رجولنا أقوى من الأول💪🏼 علشان الحياة تمشي ، أعطوا حزنكم حقه لكن لا تخلّوا هادا الحزن يسيطر عليكم وعلى نفسيتكم💓 الله يحققلكم آمالكم ويسعدكم ومايحرمكم من أحبابكم يارب🙏🏼 .. أنتبهوا على نفسكم وأشوفكم إن شاء الله في التدوينة الجية 

لا تنسوا تبدأو من الآن في بناء حلمكم 

أحبكم ومع السلامة 👋🏼 .

5 comments COFFEE TALK