بسم الله الرحمن الرحيم
السلام عليكم حبايبي😀 تدوينة اليوم كان المفروض تنزل أمس فإن شاء الله حأعّوضكم على تدوينة أمس كيفكم أول شي وإيش عاملين ؟؟ كيف الدنيا معاكم أهم حاجة إن شاء الله تكونوا جميعا بخير👋🏼🧡 ... اليوم التدوينة حتكون عن آخر كوليكشينات الميك أب الي نزلت طبعا نحنا عارفين إنو الشركات مع الوباء الي جانا ماسارت تنزّل منتجات كثير زي زمان ولكن مع ذلك فيه كم شركة نزّلوا كوليكشنات جديدة أنا اليوم جبتلكم بعضها وحأقلكم رأيي في كل كوليكشن فيلا نبدأ 👌🏽..
KYLIE COSMETICS
KYLIE JENNER X KENDALL JENNER
كايلي جينر عملت أخيرا كوليكشن مع أختها كيندال شكل الكوليكشن كتعليب يجنّن😍 وفكرة الثيم حق الكوليكشن حلو
ولكن أحس للآن كايلي جينير ما عملت كوليكشن يبهرني ١٠٠٪ 💔، عندها بعض من باليتات الشادوا يعجبوني مرررة بالذات البرقاندي باليت والأرواج الفيلفيت حقها برضو تجنن .. ولكن ماحسيت إنها بتشتغل على البراند يعني ما تنزّل الشي كدة من قلبها😳، كلنا سرنا متوقعين إيش حتنزل كايلي الكوليكشن الجي😒 !! لإنها ماتخرج من النمط الي هي ماشية عليه من زمان و ما أحس إنها بتطوّر البراند مع إنو زي ماقلتلكم هي عندها حاجات حلوة في براندها وأنا حأفضل أشتري من عندها الأشياء الي تبهرني وأستفيد منها .. نروح على الكوليكشن الجديد الي أتعاونت فيه مع أختها كيندال .
EYE SHADOW PALLETE
الباليت من ناحية الدرجات حلو لكل يوم فيها البنّيات وفيها كم لون جريء مثل الموف والأورانج والأخضر وفيها كم درجة شيمر بلمعة ... هل أنا شايفة إنو الباليت يستاهل لا😓 .. لإنه خلاص الدرجات مستهلكة😒
الا لو ما كان عندك هادي الألوان وتحبّي ماركة كايلي فممكن تجربي الباليت بس في نفس الوقت ممكن تلاقي نفس الدرجات في باليت تاني وبفورميلا أفضل ولكن برضو أقدر أقول إنو الشي الي يعجبني في باليتات كايلي ويخليني أبغا أشتريها إنو حجمها صغير👌🏽 تشيلوها معاكم في الشنطة كل مكان وسهلة للإستخدام اليومي لو أبغا أغير من البرقاندي باليت ممكن أشتري هادي الباليت عشان حجمها الصغير فقط .
سعرها ٤٢ دولار = ١٥٨ ريال سعودي .
LIP BLUSH LIPSTICK & LIP LINER KIT
نزّلت lip blush هو عبارة عن ليبستيك إسمه blush علشان الفورميلا خفيفة قريبة من الفيلفيت لكن أخف المفروض إنه ما ينشّف الشفايف يجي معاه المحدد حقه ... الدرجة الصراحة عجبتني💗 أحس إنها حتنفع على أغلب أنواع البشرة الباكيجينق كمان أو التعليب حلو سعرهم ٢٦ دولار = ٩٨ ريال سعودي .
LIP GLOSS
نزّلت كمان قلوس للشفايف لونه عنّابي حبيت الدرجة الصراحة💘 مع إني ما أحب القلوسات لكن الدّرجة عجبتني
سعره ١٦ دولار = ٦٠ ريال سعودي .
3 FACE STICKS
نزّلت ٣ ستيكس كريميين عبارة عن كونتور وبلشر وهايلايت
الكونتور أحس إنو فاتح ينفع للبشرات البيضاء أكثر من الحنطية والبشرات الغامقة نفس الشي مع الهايلايت ، لكن البلشر حلو و درجته من وجهة نظري حلوة لأغلب درجات البشرة😊 .
سعر البلشر والكونتور ١٦ دولار = ٦٠ ريال سعودي .
سعر الهايلايت ١٨ دولار = ٦٨ ريال سعودي .
BLOTTING POWDER
نزّلت باودر مطفي يقلّل من لمعة الوجه بالدهون لون الباودر شفّاف
سعرها ٢٤ دولار = ٩٠ ريال سعودي .
EVERYWHERE GLOSS
آخر شي نزّلت قلوس لأي مكان وجه أو الجسم
ماحبيت فكرته ما أعرف أحس إنو حيحوس الدنيا👎🏽 وما حيكون ثابت و حيتحرّك
سعره ١٨ دولار = ٦٨ ريال .
KKW BEAUTY
براند كيم كارداشيان للميك أب نزّلت كوليكشن ألوانه كلاسيك للمرة الثانية أغلبها درجات نود أو لحمية برضو أنا أشوف كيم ما بتبهرني ماركتها ... من يوم ما عملت البراند ما فكّرت أشتري من عندها ممكن تكون الفورميلا وتركيبة المنتجات ممتازة لكن أبدا ما تبهرني ماركتها فيها برود مافي حماس😒😞 في منتجاتها ودايما ما تحب تخرج عن النود والألوان الترابية .
EYESHADOW PALETTE
CLASSIC II
أول شي نزّلت باليت نود ألوانه كلاسيكية الألوان الي نحنا متعودين عليها البنّيات واللحميّات🤨 .. الباليت أكيد من وجهة نظري مو ضروري أبدا تشتروها لإنه أغلب هادي الدرجات ممكن تلاقوها في باليت تاني بسعر أقل أو باليت بنفس السعر وفيه نفس الدرجات زيادة عليها درجات متنوعة أكثر لكن كفورميلا أو كتركيبة للشادو أنا أشوف إنو ماركة كيم أفضل في الشادو من ماركة أختها كايلي ...😶 أنا ما جرّبت ماركة كيم بس حسب مني شايفة السواتش عاليد في الصورة الألوان واضحة وباينة أكثر من شادو كايلي .. يبغالي أجرب أشتري من براند كيم وأقارنها مع كايلي إيش رايكم ؟؟؟
سعر الباليت : ٤٥ دولار = ١٦٩ ريال
NUDE GLOSSES
نزّلت ١١ درجة قلوس جديدة كلها ألوان نود أو لحمية
سعر القلوس الواحد : ٢٠ دولار = ٧٥ ريال سعودي.
سعر مجموعة القلوسات كاملة : ٢٠٠ دولار = ٧٥٠ ريال مدري بس أحس السعر مبالغ فيه🤨
كمان تقدروا تشتروا الروج مع القلوس حبيت الفكرة .
فصورة السواتش موجود كل درجة روج مع القلوس حقه .
NATASHA DENONA
ماركة ناتاشا دينونا من الماركات الي أحترمها🧡 صح إنو تعليب المنتجات رخيص أحيانا أحسه بدائي بالنسبة للسعر.. لانه ماركة ناتاشا من البراندات الغااااالية علشان كدة ما أشتري من عندها مع إنو كل الي أستخدم الماركة يمدحوها كفورميلا
وكتركيبة بالذات الآيشادو زي الزبدة واللون يكون وااااضح😍 .
نزّلت كوليكشن برونز عبارة عن باليت وباليت هايلايت وبرونزر وقلوسات وهادا الكوليكشن يعتبر غالي ومو غالي .
THE BRONZE COLLECTION
THE BRONZE PALETTE
باليت الشادو ألوانه طبيعية ترابية برونزية الدرجات هادي موجودة في باليتات كثير ولكن شوفوا السواتشز تجننننننن الألوان واااااضحة زي الزبدة شوفوا الدرجات الي فيها لمعة رهييييبة😍😍 نفسي أشتريها بم إنو السعر دي المرة
مو غالي ومبالغ فيه
السعر : ٦٥ دولار = ٢٤٤ ريال سعودي .
BRONZE CHEEK PALETTE
كمان عملَت باليت للخدود عبارة عن برونز هايلايت
السعر : ٥٥ دولار = ٢٠٦ ريال سعودي أحس السعر غالي على باليت هايلايت .
OH-PHORIA GLOSSES
نزّلت كمان قلوسات فيها لمعة بسيطة الدرجات حبيتها🧡 حسّيت إنها لايقة مع الكوليكشن .
سعر القلوس الواحد : ٢٦ دولار = ٩٨ ريال .
HUDA BEAUTY
نروح لماركة هدى بيوتي هدى من الناس الي من جد تلهمني 🙏🏼❤️ كيف وصلت لحلمها وكيف بنَت نفسها وبدأت من رموش لشي مررة كبير وعالمي لذلك أنا أحترم براندها وأحترمها على عزمها ومثابرتها😍 ... صح احيانا بعض المنتجات ما ناسبتني لكن الماركة ككل متعوب عليها ولمن هدى تنزّل المنتجات تنزّلها بحب .. أهم شي هي تكون راضية ما همها كلام المنتقدين .. الشي الوحيد الّي نفسي تغيره في منتجاتها إنها تشيل العطور من تركيبة المنتجات أو تخفف ريحة العطور بالذّات منتجات البشرة .
THE GLOW COCO HYDRATING MIST
الآن نزّلت ميست للوجه لقبل المكياج أو بعده زي المستحلب بريحة جوز الهند يارب تكون الريحة خفيفة المفروض إنه يعطي ترطيب ولمعة صحية للبشرة💗
السعر : ٣٥ دولار = ١٣١ ريال سعودي .
MAKEUP FOREVER
الماركة هادي رهيبة كثيييير ناس يمدحوها ونفسي أجربها❤️ بس بصراحة ما قيد جرّبت أي شي من عندهم مع إنو عليها مدح و من جد أبغا أجربها عشان أكتبلكم عنها ريفيوهات مفصّلة وأشوف هل قد المدح أو لا ..
لازم أجرب أشتري شي من عندهم قريب😍 .
MATTE VELVET SKIN HIGH COVERAGE CONCEALER
نزّلوا كونسيلر أو خافي عيوب متعدد الإستخدامات يعني ينفع كبديل للفاونديشن ويخفي العيوب ومصحح ممكن تستخدموه بالطريقة الي تعجبكم الدرجات متنوعة حبيت هادا الشي مرة 😍 قوامه فيلفيت مخملي ومطفي .
السعر : ٢٧ دولار = ١٠١ ريال سعودي .
MORPHE
مورفي من الماركات الإمريكية الرخيصة سعرها معقول وفمتناول اليد .. عليها كلام كثير من المجتمع الامريكي ودايما تدخل في الدراما ... أنا أشوف إنو الماركة حتضيّع نفسها بكثرة التعاونات الي تعملها مع اليوتيوبرز 😒 وأحس دا الشي نزّل من سمعة الماركة وخلّاها ما تركز على الفورميلا وتحسين تركيبة المنتجات، بل سار همها الوحيد إنها تنزّل تعاون ورا تعاون وخلاص ... الماركة أنشهرت في البداية بالفرش عندهم فرش حلوة ورخيصة وكان عندهم باليتات حلوة ولكن شوية شوية أحس بيتغيروا ولازم ينتبهوا ..
COCACOLA COLLECTION
عملوا كوليكشن بالتعاون مع شركة كوكاكولا 🤣💔... شفتوا كل يومين تعاون مع ماركة أو يوتيوبر أو شخصية مشهورة .. المهم الكوليكشن كبير أنا حأقول رأيي في باليت الشادو فقط .
THIRST FOR LIFE PALETTE
الباليت الصراحة ما حبيت درجاته بدائية مرة💔 الدرجات ترابية مع كم درجة أحمر وأزرق وأصفر خلاص أحس ملّيت من الباليتات الترابية اللحمية لااااازم ينوّعوا 🤢 هادا الكلام مو بس لمورفي أغلب الماركات بتنزّل باليتات نود .. عموما الباليت مو مرة أبهرتني ... من الكوليكشن هادا كله حبيت فيه الفرش لونها أحمر وحسيتها كيوت ههه😆 .
سعر الشادو : ٢٢ دولار = ٨٣ ريال السعر الصراحة دايما أسعار مورفي حلوة .
LANCOME
لانكوم من الماركات الي ماما مرة تحبهم ❤️❤️ بس أنا ماجربت من عندهم شي أنا عارفة إنو الماركة فيها حاجات حلوة😃بس ماقيد جربتها ما أعرف ليش ؟؟ لاااازم أجرب الماركة .. ماما تموت على أرواجهم
LASH REVITALIZING SERUM
نزّلوا منتج حلو .. سيروم للرموش شي جميل الصراحة 🧡، المنتج يوعدكم إنو خلال 4 أسابيع حيعالج الرموش يخليها أكثف وأقوى نستنى ونشوف كيف حيكون ... للآن مانزّلوا موعد إصدار السيروم ولا سعره لكن قالو إنو حيكون في سيفورا .
COLOURPOP COSMETICS
كولوربوب من البراندات الرخيصة الي تعجبني منتجاتهم بس مو كل شي يعني في أشياء مستحيل أرجع أشتريها منهم تاني و لكن البراند في المقابل فيها منتجات كثير رهيبة وسعرها رخيص في متناول اليد منتجاتهم قريبة من منتجات كايلي .
MAKEUP BRUSHES
نزّلوا كوليكشن فرش للمكياج حبيت سعرها ما أعرف كيف حتكون الجودة للأمانة ولكن السعر يعتبر حلو .
سعر مجموعة الفرش كاملة 6 فرش : 28 دولار = 105 ريال سعودي .
💗💗💗💗💗
وبكدة نكون وصلنا لنهاية التدوينة لو تبغوني كل بين فترة أتكلم عن إيش الجديد في عالم المكياج قولولي في الكومنت😆❤️ وانا أسويلكم الي تبغوه لاتنسوا تتابعوني في السوشيال ميديا أتمنى لكم يوم سعيد وإن شاء الله أشوفكم في التدوينة الجديدة ومع السلامة .
0 التعليقات:
إرسال تعليق