MY CURRENT TURKISH SERIES | مسلسلاتي التركية في الفترة الحالية

  بسم الله الرحمن الرحيم  

السلام عليكم ياحلوين كيفكم 💗 ؟؟ أنا مررررة متحمّسة على تدوينة اليوم ، بم إنّكم حبيتوا تدوينة أفضل المسلسلات التركية

من وجهة نظري حبيت أشارككم مسلسلاتي التركية الي أتفرجتها الفترة الي فاتت😃 البعض مستمرة فيهم والبعض خلّصتهم فيلا خلونا نبدأ وخلوني أقلكم رأيي في كل مسلسل من وجهة نظري ..

  مسلسلات مستمرة لم تنتهي  

  ١- زهرة الثالوث  

قصة المسلسل تدور بين عائلتين في بينهم عداوة قديمة (عائلة أصلان بيه ضد عائلة شاد أوغلو) هادي العداوة تبدأ من الجدّة عزيزة أصلان بيه ، عزيزة كانت دائما تغرس الحقد والإنتقام في قلب ميران أصلان بيه حفيدها الي هو بطل المسلسل إتجاه عائلة شاد أوغلو .. كانت مفهمة ميران إنو الي قتل أبوه هو هزار شاد أوغلو فيكبر الولد بعد ٢٧ سنة علشان ينتقم لأبوه فيقوم يتزوّج ريّان بنت هزار شاد أوغلو يتزوجها زواج كذبي ويرميها بس علشان ينتقم لأبوه .. ميران وريان ضحية قصة قديمة حصلت بين العائلتين وهم في النهاية مالهم ذنب طبعا ميران أكيد غلط وحيبدأ يتقرب من ريان فهل ريان حتسامحه على الي سواه فيها وهل حتقدر تخليه يغير فكرة الإنتقام الي سيطرت على حياته حتعرفوا لمن تتفرجوا المسلسل .

💜💜💜💜💜

الصراحة المسلسل يجنننننننننننن💕 أكين الي هو ميران في المسلسل وإيبرو الي هي ريّان في المسلسل أول مرة أشوفهم في مسلسل ولكن حبيت تمثيلهم وإحساسهم في التمثيل ... كل الكاست في المسلسل قوي مررررة حبيته وأكيد حيدخل في قائمة مفضّلاتي .. المسلسل انتهى منه الموسم الأول وحيكون فيه موسم ثاني إن شاء الله فلازم الي ما شافه يتفرجه صدّقوني المسلسل حيعجبكم .

  ٢- إبنة السفير  

قصة المسلسل بتدور حول البطلين إنجين ونسليهان الي في المسلسل أسمائهم سانجار وناره .. سانجار يكون من عائلة بسيطة فقيرة أبوه يشتغل في حقل زيتون عند عائلة غنية في موغلا وناره إبنة السفير وبم إنها إبنة السفير كانت تسافر من بلد لبلد مع والدها .. سانجار وناره من وهما أطفال يحبوا بعض وفي يوم لمن كانوا مراهقين يقرروا يتزوجوا ويهربوا مع بعض لكن ناره تتعرّض للإغتصاب💔 من شخص حتعرفوه لمن تتفرجوا المسلسل قبل ما تتزوج سانجار بيوم .. لمن يجي يوم زواجهم تعترف ناره لسانجار بلّي حصل معاها لكن هو ما يصدّقها وطردها وما يتزوجها😔 .. فتختفي ناره من حياة سانجار ومحد يكون عارف فين راحت ناره البعض يقول إنها ماتت والبعض يقول إنها سافرت وعاشت حياتها .. ف تمر السنين إلين ما يجي يوم تطلع ناره لسانجار فجأة في اليوم الي سانجار يكون بيتزوج فيه بنت من القرية وتبدأ الحكاية من هناك .

💜💜💜💜💜

المسلسل طبعا حبيته أول الحلقات حتحسوها باردة شوية لكن أول ما يبدأ سانجار يعرف الحقائق حيحلى المسلسل أكثر والبطلين إنجين ونسليهان تمثيلهم يجنن وغنيّين عن التعريف أكيد .. خلّص الموسم الأول والموسم الثاني المفروض يبدأ في سبتمبر إن شاء الله لحّقوا تشوفوه من دحين ما حتندموا .

  ٣- نجمة الشمال  

مسلسل نجمة الشمال من المسلسلات الخفيفة الظريفة الكوميدية بذّات إنو المسلسل فيه تويقان🤣 الي هو إسمه في المسلسل سفر يجنن مررررة يضحكني أتفرّجت المسلسل بس عشانه لإنه يضحك دايما يضحكني في كل مسلسلاته ههههه .

نروح لأبطال المسلسل وقصة المسلسل 

القصة تبدأ قبل ٢٠ سنة بين كوزاي ويلديز .. يلديز تحب كوزاي من وهي صغيرة ويكون هو حبّها الوحيد الين ما يخطبها كوزاي لكن فجأة كوزاي يسيب يلديز بدون سبب ويسافر ويتزوج وحده تانية ويجيب منها ٣ بنات ..تعدي الأيام وبعد ٢٠ سنة يرجع كوزاي مع بناته للقرية الي أتربى فيها بعد مايكون أتنصب عليه وخسر فلوسه😔 وزوجته تسيبه وتروح تخونه مع شخص تاني .. فيقرر يرجع لقريته الي زمان كان يعرف فيها يلديز .. وتبدأ يلديز تنتقم منه وتحاول تطفّشه عشان يخرج من القرية ويرجع للمكان الي كان عايش فيه .. لإنها مهي قادرة تنسى الي سواه فيها قبل ٢٠ سنة ، خلص الموسم الأول وحيكون فيه موسم ثاني إن شاء الله ..

💜💜💜💜💜

 المسلسل جدا كوميدي حبيته خفيف❤️ ما يحتاج تركزوا فيه كثير لو تحبوا المسلسلات الكوميدية حيعجبكم بذات شخصية سفر في المسلسل هو أكثر واحد كوميدي في كل المسلسل هههه .

  ٤- مسلسل منزلي  

تدور القصة بين زينب ومهدي❤️.. زينب طالبة حقوق طموحة عندها والدتين 

أمها الحقيقة الفقيرة وأمها المعنوية الثانية الغنية ، أم زينب الحقيقة الفقيرة تعطي زينب للأم الثانية الغنية علشان تربيها وتعطيها حياة أفضل وعشان زينب تدرس في أحسن المدارس وتقدر تحقق أحلامها لكن هادا الموضوع أثّر على زينب بحيث إنها تسير مهي عارفة هي لمين تنتمي ولأي عائلة تنتمي هل للعائلة الفقيرة أم الغنية وتسير مهي عارفة ترضي مين والا مين هل ترضي أمها الحقيقية أم ترضي أمها الغنية الي ربّتها😔 .. زينب من الشخصيات الطيبة جدا الي بسبب طفولتها وتشتتها بين الحياتين المختلفة الي تكون عايشة فيها تلاقي نفسها ما تقدر تقرّر قراراتها بنفسها ودايما تحاول ترضي الي حولينها علشان ما يزعلوا منها ... الين ما يجي يوم تتزوج مهدي زواج تقليدي بدون ماتعرفه مزبوط بسبب إصرار أمها الحقيقية عليها فعشان زينب ترضي أمها تتزوج مهدي ..

مهدي في الجهة المقابلة يكون شخص شهم يساعد المحتاجين ويكون طيّب من نفس قرية زينب الي أتربّت فيها قبل ما تعيش عند العائلة الغنية ، مهدي يتزوج زينب زواج تقليدي وتبدأ الحكاية من هنا حيبدأ مهدي يكتشف زينب و زينب حتبدأ تكتشف مهدي وكل واحد حيكتشف ماضي الثاني

💜💜💜💜💜

 القصة درامية لامستني مرة وقصة زينب أثّرت فيا وأحس إنها واقعية وترا المسلسل هو عبارة عن قصة حقيقية واقعية حصلت في الحقيقة مرررة عجبني المسلسل وحيكون له موسم ثاني إن شاء الله .

  المسلسلات المنتهية  

  ١- إبنتي  

مسلسل إبنتي من المسلسلات الدرامية الكوميدية من بطولة بورا وبيرين .. بورا البطل في المسلسل يكون إسمه ديمير وبيرين البطلة الصغيرة الي في المسلسل إسمها اويكو تكون بنت ديمير .. ديمير عايش على السّرقة طول حياته كان يسرق علشان يقدر يعيش أتربى وهو صغير في ميتم فما كان عنده الوظيفة والتعليم عشان يقدر يعيش فكان دايما يلجأ للسرقة علشان في باله إنو السرقة هي الحل الأسرع لجني المال .. الين مافي يوم من الأيام يدق باب بيته ويطلع عنده بنت فجأة .. طبعا هو ما كان يعرف أساسا إنو عنده بنت ويرفض فكرة إنو أويكو بنته وما يكون متقبّلها في البداية 😳.. إلين ما يبدأ يحبها ويكتشف إنو عندها مرض مميت وحتشوفوا التفاصيل في المسلسل لمن تتفرجوه .

💜💜💜💜💜

مرة حبيت علاقة ديمير ببنته😍💓 بذّات لمّن يبدأ يتقبلها ويبدأ يغيّر نفسه ويعمل المستحيل عشان يرضيها وعلشان تكون بنته بخير وما تمرض 😔، المسلسل خفيف كوميدي ودرامي أحب الجانب الكوميدي في المسلسل .. بطلة المسلسل الي يكون إسمها جاندان يحبها ديمير تعرفوا قصتها مع الأحداث لكن أنا ما حبيتها كثير كان نفسي يجيبوا ممثلة تانية لايقة على ديمير أكثر في المسلسل ولكن عادي التركيز في المسلسل على ديمير وبنته أويكو .. اويكو الي هي بيرين في الحقيقة خطيييييييرة في التمثيل❤️ صح إنها طفلة ولكن مبدعة

 المسلسل هادا أنتهى بس حلو وخفيف .

  ٢- الإصطدام  

طبعا أي مسلسل يمثل فيه كيفانش تاتليتوغ لاااااااازم أتفرّجه هادا البني آدم مجرم تمثيل رهيب💕 المسلسل قصته تدور حول ٤ أشخاص كل واحد منّهم له قصة وفي يوم من الأيام يلتقوا في حادث سيّارة البطلين همّ كيفانش و ألتشين الي إسمهم في المسلسل قدير و زينب تدور القصة حول قدير الي يكون دوره شرطي ماهر وفي نفس الوقت يحب الكورة و دايما يروح الملعب يشجّع فريقه المفضّل في يوم من الأيام ياخد زوجته وبنته الملعب عشان يحضروا مباراة فجأة يحصل إنفجار غامض يموتوا فيه زوجته وبنته في هذه الأثناء تكون زينب موظّفة في بنك وفي يوم من الأيام تنخطف بنتها بسبب عصابة فتضطر إنو تسرق البنك عشان تدفع الفلوس لإطلاق سراح بنتها😔 ومن هنا تبدأ الأحداث إيش قصة الحادث وكيف يسير ومين هي العصابة وهل حيقدر قدير يعرف الي دبّر مؤامرة الإنفجار كل هادا حتعرفوه لمن تتفرجوا المسلسل .

💜💜💜💜💜

عجبني جدا المسلسل لإنه فيه روح الأكشن وكدة فيه حماس أنصحكم فيه وهو طبعا من المسلسلات الي خلصت فحلو إنو تتفرجوه كامل مرة وحده .

وأخيرا وصلنا لآخر التدوينة مرررة أستمتعت وأنا أكتبها💕 ما حتندموا على هادي المسلسلات صدّقوني👌🏽

قولولي رايكم لو شفتوا شي من هادي المسلسلات أحبكم وحأحاول كل يوم أكتبلكم تدوينة مع السلامة . 

2 comments LIFESTYLE