بسم الله الرحمن الرحيم
هل عمركم فكرتوا قد إيش جسمكم صحي ؟ و هل عندكم نظام غذائي صحي ؟ طيب هل بتتمرّنوا كل يوم ؟ وهل بتعملوا أي نوع من أنواع الرياضات ؟ لازم كل واحد فينا يسأل نفسوا هادي الأسئلة علشان يقدر يحكم على نفسو هل هوا ماشي صح أو لأ ...
طيب أنا اليوم جياكم ببعض النصايح الي لو بدأتوا بيها رح تكون حياتكم صحية مو لازم تبدأو بكل هادي النصائح لكن عالأقل أبدأوا من اليوم بأشياء صغيرة ... غيروا حياتكم علشان ما تندموا بعدين لإنو من جد هادي الحياة الي نحنا عايشينها حنتحاسب على كل صغيرة و كبيرة فيها و أكيد أجسامنا من الأشياء الي ربنا حيحاسبنا عليها فلو حابين تغيرو من حياتكم كملوا معايا هادي التدوينة و حاولوا تركزوا على الكلام الي رح أقلكم هوا يلا نبدأ :)
١- شرب الكثير من الماء :
الكثير مننا ما يشرب الموية كل يوم و هادا الشي من جد مرة غلط ، الموية مهمة لجسمنا عشان يشتغل والأهم من كدة إنو ٦٠ ٪ من جسمنا عبارة عن موية فلو نحنا ما عوضنا هادي الموية الجسم مارح يشتغل كويس ، كمان الموية تطلّع السموم من الجسم وبم إنو نحنا بنطلّع السوائل الي في جسمنا عن طريق البول والعرق لازم نعوض هادي الموية الي بتخرج و إلا جسمنا حيسير فيلو جفاف ! الموية مرة مفيييدة للبشرة تديها نضارة طبيعية و هادا الشي أنا لاحظتو على نفسي لمن سرت أشرب موية لترين في اليوم و أكيد الشعر كمان يسير صحي أكتر و هادا الشي أكيد كلنا نبحث عنه .
٢- التمرين والرياضة :
الرياضة عاد هادي شي كبير وواسع ولو بدأت فيه ما حاخلص ، الرياضة لازم تكون مو اليوم و بكرة لأ ... لازم تكون كل يوم و تكون ضمن الروتين اليومي اللي عايشين فيه لإنو الرياضة مو بس بتخلينا نحرق الدهون هيا بتخلينا نبني عضلات و هيا كمان مهمة جدّا للقلب والرّئة والكلـى وكل الأعضاء المهمة في جسمنا ، كمان الرياضة تطرد السموم من الجسم .
فلو حاسة نفسك طفشانة مكتئبة مو عاجبك جسمك حزينة أياً كان شعورك أعملي رياضة قومي و أتحركي مو لازم يكون عندك سير أو أجهزة للرياضة مو لازم تروحي نادي أمشي في البيت ، أفتحي اليوتيوب و شوفي مقاطع تمارين رياضيّة بدون أجهزة ، أعملي رياضة حتّى لو قمتي سويتي غرفتك أو ساعدتي مامتك في المطبخ أي شي بس لا تجلسي فاضية لإنو الأفكار هادي السوداوية من جد تسيطر على تفكير الإنسان وتخليه سلبي فالرياضة دايما تخليكي تفكري أحسن وتطرد السلبية من حياتك و تخليكي تشوفي الحياة بشكل أحسن و تعدل مزاجك و هادا هوا الشي الي نحنا نبغاه .
٣- أطردوا الأفكار السلبية والناس السلبية :
الحياة الصحية مو معناتو إنو نحنا نحرق دهون و ننحف و خلاص ، زي ما بنغير جسمنا من برا لازم نغير تفكيرنا من جوا و نفكر بإيجابية و نغير الناس السلبيين الي حوليننا و نقطع علاقتنا بهم تماما لإنو هادول الناس رح يأثروا علينا بأفكارهم التشاؤمية ، انتي كل ماحتكوني ايجابية رح تستمري ، بعكس لو لقيتي ناس تحبطك و تحطّمك هادول الناس رح يحبطوكي و بسبب كلامهم حتلاقي نفسك وقفتي و ما كملتي كلو من ناس ما قدروا يغيروا شي في حياتهم فحبّوا إنهم يحطموا فيكي زي ما هما محطّمين نفسهم من جوا فنصيحتي لكم أقطعوا علاقتكم من الناس السلبيين في حياتكم
وترا إلا ما تلاقو ناس إيجابيين في حياتكم أحسلكم مليون مرة من الأعداد الزيادة المحبطة الي ما لها داعي في حياتكم غير السلبية .
٤- الفواكه والخضار :
الفواكه طبعاً مفيدة جداً لإنو بتمد الجسم بكل الفوائد الغذائية من بروتينات و فيتامينات و مويات و ألياف و أكيد نفس الكلام بالنسبة للخضار جدا مهمة . لو شايفين نفسكم ما تقدروا تاكلوا الفواكه و الخضار زي ماهيا تقدروا تعملوها على هيئة سموثي أو عصير تحطي كل الفواكه الي تبغيها وتعصريها في الخلاط وتشربيها ، رح تفيد البشرة والشعر والجسم بشكل عام .
٥- أقطعوا الكربوهايدرات البيضاء بالكربوهايدرات السمراء :
الكربوهايدرات البيضاء هيا الي تكون مصنوعة من دقيق أبيض زي الرز ، المكرونة ، و العيش الأبيض ، الكربوهايدرات البيضاء لمن تتعمل تروح منها الفايدة الغذائية وتكون مليانة بالسكريات الي بعد كدة تتحول لدهون و هادا الشي أكيد نحنا ما نبغاه .
فبديلا عن ذلك نروح للكربوهايدرات السمراء اللي معمولة بالدقيق الأسمر لإنها تكون غنية بالألياف والفوائد الغذائية المفيدة للجسم مثل الرز ، العيش ، والمكرونة السمراء .
٦- أقطعوا الأكل المصنع :
الأكل المصنّع أو المعلّب غير مفيد ليش ؟؟؟ لإنو ما تكون فيلو الفائدة الغذائية يكونو حاطين فيلو مواد حافظة ضارة وكل هادا علشان يجلس الأكل فترة أطول و علشان كدة الأكل المصنع بعّدو عنّو لإنو يضر بأجسامكم .
٧- الإبتعاد عن الأكل الي يفتح شهيتكم :
طيب الأكل الي يفتح الشهية يختلف من شخص للتاني يعني أنا الشي الي يفتحلي شهيتي مثلاً المكرونة شخص تاني الشكولاتة شخص تالت العيش و وهكذا .. فهوا يفرقمن شخص للتاني طيب ليش قلتلكم بعّدوا عن الأكل الي يفتح شهيتكم ؟.... لإنو لو أكلتوا هادي الأكلات رح تسيروا تبغوا تاكلوا أكثر فحاولوا لو ما قدرتوا تقطعوها قلّلوا منها .
****************
هادي التدوينة بالتعاون مع المدوّنة حبيبتي أثير تدوينتها حتكون عن وجباتها الصحية في يومها بالكامل من الفطور الين العشا كل الوجبات صحية فدحين رح أحطلكم رابط تدوينتها مع روابط السوشيال ميديا :
Twitter : idyar1
أشكركم حبايبي على قرائتكم التدوينة و أتمنى تكون التدوينة خفيفة عليكم ، أنتظروا الجزء التاني من هادي التدوينة رح تكون كمان بالتعاون مع مدوّنة جميلة رح أقلكم عليها لمن تنزل التدوينة .
لاتنسوا تشوفوا تدوينة أثير حبيبتي أنصحكم تشوفوها لإنو أكيد رح تكون تحمس وفيها معلومات مفيدة :) و شاركونا قصصكم ومعلوماتكم عن الحياة الصحية على هاشتاق #روتين ـ صحي
أشوفكم حبايبي في تدوينة جديدة ومع السلامة .
أشوفكم حبايبي في تدوينة جديدة ومع السلامة .
0 التعليقات:
إرسال تعليق