بسم الله الرحمن الرحيم
السلام عليكم حبايبي كيفكم واليوم جيتكم بنصائح جديدة في الجزء التاني من تدوينة الحياة الصحية و حتكون هادي التدوينة بالتعاون مع حبيبة قلبي مودة الي تدوينتها عن كيف تحضروا وجبة غداء وسناك للدوام صحية و سريعة فلو حابين تشوفوا تدوينتها حاحطلّكم روابط مودة تحت آخر التدوينة .... فيلا نبدأ بالنصائح !!
GET ENOUGH SLEEP
من الأشياء المهمة جدا لو تبغو تغيروا نمط حياتكم وتسيروا صحيين هوا النوم ....
لمن ما تناموا كويس يسير جسمكم يعوض التعب و عدم النوم بالأكل فتسيروا تبغو تاكلوا أكثر هادا غير إنو وقت النوم فيه هرمونات وإنزيمات مخصوصة للحرق ما تفرز الاّ في الليل لمن ننام ، أهم شي رتبوا نومكم ولا تسهروا علشان جسمكم يشتغل تمام ويحرق أما لو عملتوا عكس كدا الجسم حيفضل واقف ما حيحرق و لا شي و انتو حتلاقوا نفسكم تعبانين .
SAY NO TO OILY FOOD
قللّو الأكل الي يكون مليان زيوت زي الفاست فود من برقر و دونات و شيبس وغيرو صح إنو ساعات الواحد يشتهي دي الحاجات لكن مو كل يوم تاكلوها كلوها يوم واحد في الأسبوع فقط .
كمان لمن تجو تطبخوا أكلكم أستخدمو الدهون الغير مشبعة في الزيوت يعني أطبخوا بزيت زيتون بدل الزيت العادي و بدل الزبدة والسمنة لإنو الدهون المشبعة تتخزن في الجسم زي ما هيا فتزيد الدهون عندكم في جسمكم .
في السبرماركت تلاقوا بخاخات زيوت بدون كالوري ولا فات للناس الي مررررة ما تبغى زيت خير شر لكن زيت الزيتون صحي و مفيد بس طبعا مو كتير تحطوا منو وقت الطبخ حطوا قليل .
كل ما أكلتوا أكل مليان دهون كل ما بشرتكم أفرزت دهون أكثر وطلعتلكم حبوب فأحسن قللّوا من الدهون قد ما تقدروا عشان جسمكم و صحتكم و بشرتكم .
LEARN TO SAY NO
لا تحسّسوا نفسكم إنو إنتو بتاكلوا بس علشانكم جالسين في عزيمة أهل أو مع أصدقائكم أو مثلا أحد غصبكم تاكلوا ببساطة قولوا لأ وخلاص أو قولوا والله أنا مني جيعانة دحين لكن لا تاكلوا إرضاءً للغير فقط .
DON'T SMOKE
التدخين طبعا زي ما أغلبنا عارف يعمل أمراض مرة كتيرة بعيد عنكم جميعا ، سرطان في المريء و الكلية و الرئة و غير كدة يرفع الضغط ويعمل تصلب في الشرايين أعتقد إنو بعد هادي الأمراض الي سببها التدخين حتبطلوا تدخين صح ؟ من جد ما تعرفوا قد إيش ناس بعد الشر عنكم بيموتو من التدخين وهما في أعمار ما أتعدت ال ٥٠ سنة لا تدمروا جسمكم وقفوا تدخين الآن !
LIVE YOUR LIFE WITH PURPOSE
خلولكم هدف وحطوا هادا الهدف قدامكم دائما لو أنتي أو إنتَ كنت عايش حياتك بدون هدف لازم تراجع نفسك ،
لو مثلا تبغوا يكون وزنكم ٦٠ لازم تحطوا دا الشي قدام عينكم و تشتغلوا على هدفكم بأكل صحي و رياضة و تغيير نمط حياة وغيرو وقيسوا إنتو الأمور الحياتية التانية من دراسة و من عمل والخ .. .
LOVE YOURSELF
مهما كان جسمكم أو شكلكم أعرفوا إنو إنتو جميلين .. من جد انتو حلوين ربنا خلقنا كلنا جميلين كل واحد منّنا له شي يميزوا عن التاني حبوا نفسكم زي ما إنتو لا تقولو نحنا محنا حلوين أو جسمنا مو حلو هادي الجمل تعطيكم طاقة سلبية فظيعة ولا تحاولوا تغيروا نفسكم عشان أحد ، أعرفوا إنو إنتو لو تبغوا تتغيرو بتتغيروا علشان نفسكم مو عشان أي أحد خلوا دائما نفسكم رقم واحد في كل شي ولا تحطموا نفسكم لإنو كل واحد مننا يستاهل يكون مبسوط و يحب نفسو .
**************
وأخيرا حبايبي لو عجبتكم التدوينة وتبغوا جزء ثالث قولولي تحت في الكومنت حبيت إنو يكون الجزء الثاني خفيف عليكم ولا تنسو تشوفوا تدوينة مودة حبيبتي دحين رح أحطلكم روابطها ..
شكرًا على قرائتكم وأشوفكم في تدوينة جديدة مع السلامة .
0 التعليقات:
إرسال تعليق