بسم الله الرحمن الرحيم
كيفكم حبايبي اليوم بم إنو بدأت السنة الجديدة سرلها كم يوم أبغا أتكلم باختصار عن السنة الي فاتت والسنة الجديدة أهم الأشياء الي سارت والأشياء الي إن شاء الله بعون ربنا أقدر أحققها هادي السنة .
2015
سنة ٢٠١٥ كانت سنة صعبة وفي نفس الوقت أتعلمت منها أشياء مرة كتير عن نفسي وعن شخصيتي وأكيد أتعلمت من أخطائي ، مريت فيها أكيد بلحظات حلوة ومن أحلى اللحظات والقرارات الي اتخذتها في ديك السنة وكانت نقطة تحول في حياتي هيا المدونة ، من أحلى الأشياء الي عملتها في حياتي أولا عرفتني عليكم خلتني أحس إنو أنا أقدر أساعد الناس وأقدر اطلّع كل الي جوتي من أفكار وكل الطاقة الي جوتي من جد أنا مبسووووطة جدًا إني عملت المدونة وإن شاءالله حأفضل أدون علطول وأصلا في خطط كتير حتسير في
سنة ٢٠١٦ إن شاءالله .
2016
سنة ٢٠١٦ أبغا أغير فيها أشياء كتير إن شاءالله وأكيد حتى لو مو كل الأفكار الي في بالي سارت مارح أفقد الأمل أبغا أبدأ أحط أهداف أمشي عليها في حياتي ؛ المدونة أبغا أغير فيها أشياء مررررة كتيرة كل شي حيسير في وقتو طبعا أكيد حيتغير التصوير السنة هادي كمان من الأهداف إني أطور من نفسي وإني أقرأ أشياء كتيرة عن مجالات مختلفة أبغا أركز أكثر عن نفسي وعن حياتي أنا لإني دائما كنت أخاف من الفشل ودحين سرت أقول وإذا فشلت إيش يعني أهم شي إني أكون أقلها حاولت رسالتي لكم إنكم ما تيأسو عادي حاولو مرة وإتنين وتلاتة لاتخلوا ولا شي يهزكم خلوكم دائما متفائلين وأحلموا وخلوا عندكم آمال تمشوا وراها وتحاولو تحققوها ، ومن هنا أقلكم سنة ٢٠١٦ إن شاءالله حتكون سنة جميييلة كلها إنجازات لنا كلنا وإن شاءالله حتلاقوا أشياء كتيرة حلوة وتحمس في المدونة الله لا يحرمني منكم
ويارب تكونوا دائما مبسوطين 3>
0 التعليقات:
إرسال تعليق