علاقتي مع الجمال !! | MY RELATIONSHIP WITH BEAUTY

  بسم الله الرحمن الرحيم  

أهلين حبيباتي كيفكم و كيف الويك إند معاكم ؟ اليوم جيتكم بتدوينة نار وشرار بالتعاون مع المدوّنة هاجر حبيبتي من المغرب في آخر التدوينة رح أحطلكم رابط مدونة وتدوينة هاجر مع كل روابط السوشيال ميديا حقتها لإنها من جد عسل وأنا مرة أحبها ، تدوينتنا اليوم رح تتكلم عن علاقتنا مع الجمال .. فلو حابين تشوفو إيش علاقتي مع الجمال وإيش هوا الجمال في نظري كملو معايا التدوينة ، ويلا نبدأ :) 

أنا بنت زي كل البنات أحب إنو الناس تقول عني جميلة ! وهذا أبدا مو عيب ، بس فنفس الوقت الجمال مو يعني إني أكون جميلة من الخارج فقط ، حلو إنو البنت تكون حلوة من الداخل والخارج . أغلب البنات بذّات الي في عمر المراهقة يفكروا إنو هما لو حطوا فاونديشن وبودرة وبلشر ورموش وغيّروا من شكلهم إنّهم كدة سارو جميلات وهادا أكبر غلط أنا ما ألومهم السوشيال ميديا زي الإنستقرام واليوتيوب ٢٤ ساعة فيلو فديوهات وصور بنات أجسامهم جميلة ، بشراتهم صافية ، شعرهم غزير بس ترا لا الواقع مو كدة وعمرو الجمال ما كان كدة .. أنا ما بأقول إنو لا تعتنوا بنفسكم ! أعتنوا ولكن بالمعقول لازم كل بنت تعرف إنو الجمال الخارجي ممكن يروح ويبقى الجمال الداخلي فقط .. أنا عن نفسي شفت بنات كتير جميلين شكليًا لكن ما أقدر أتكلم معاهم كلمتين لإنهم من الداخل مهم جميلين مع الأسف !! بعكس إنو ممكن تشوفوا وحدة تانية ممكن يكون جمالها عادي لكن ما تقدري تسيبيها من روحها الحلوة وعلى فكرة الروح الجميلة تطلع الشغص العادي جميل . وأنا عن نفسي أبغا الناس يشوفوني عادية وروحي جميلة من الداخل عن إنهم يشوفوني جميلة من برا فقط ، كل وحدة فينا لازم تطور من جمالها الداخلي قبل ماتفكر تسير جميلة من الخارج طيب إيش هو الجمال الداخلي : هو الأخلاق الطيبة ، التفائل ، الإيمان ، الإحساس بالغير ، التواضع ، الإبداع .. في نظري إذا البنت لم ترتقي بجمالها الداخلي عمرها ما حتكون جميلة لازم تحاوطوا نفسكم بناس تقدّر الجمال الداخلي لانو هدا هوا الجمال الحقيقي .

الله جميل يحب الجمال حلو الإنسان يهتم بنفسو لكن أبدا ما تفكّري إنّو لو الإنسانة الفلانية مالبست ماركة ولا أستشورت شعرها ولا كانت شنطتها شانيل يعني هيا مهي جميلة لإنو لو كانت هادي نظرتك في الجمال يعني إنتي سطحية وما تعرفي الجمال إلي أعمق من كدة لإنو عمرو الجمال ما كان بالماركات . أهتمي بصحتك بشعرك ببشرتك حتى لبسك لانو بالعكس دا شي حلو حتى لو لبستي ماركات لكن أبدا ما تفكري إنو بكدة إنتي جميلة ١٠٠ ٪  . ومن هنا تجي علاقتي مع الجمال أنا أحب الجمال أحب المكياج ، أحب أشوف البنات معتنيين بنفسهم ، أحب يكون جسمي حلو و نفسي أكيد في دا الشي ، أحب ألبس حلو ويكون شعري حلو ، بس والله العظيم أغلب الأيام ما أحط ميك أب ويكون شعري منكوش هههه وجسمي مهو رشيق لإنو هادا هوا الواقع إنتي ما حتكوني ON FLEEK ٢٤ ساعة أحيانا ما يكون نفسك تحطي مكياج ولانفسك تحطي ماسكات ولا نفسك تاكلي هيلثي عادي نحنا بشر . أهم شي تعرفي إنو الجمال الخارجي شي جدا جميل ولازم تشتغلي عليه لكن بالمعقول وأهم من دا كلو ما تنسي جمالك الخارجي . كمان في نقطة لازم أتكلم فيها البنات إلي يقولو عن نفسهم إنهم مهم جميلات أنا بس أبغا أقلكم شي والله العظيم إنو مافي ولا بنت وحشة إلا ما يكون فيكي شي جميل أبدا لا تخلّي أحد يقول عنك وحشة أو ينقص من جمالك خليكي دائما واثقة من نفسك لإنك جميلة أنا كنت ولازلت أتأثر بكلام الناس لكن هادا أكبر غلط لازم ما تخلّوا كلام الناس يأثر فيكم طالما إنتي داخلك جميل عمرو ما كان الخارج مقياس . المكياج ، والماسكات ، والزيوت والخ ... هادي كلها أشياء حلوة ولازم كل بنت تفهم فيها ليش ؟ علشان تكون وسيلة  تعطيها ثقة بالنفس وتزود عندها مشاعر الأنوثة .. من جد بنات أبغا أسألكم سؤال هل إنتو راضيات من جمالكم آخر الليل لمّن تمسحوا الميك أب ؟ لو كان جوابك نعم يعني إنتي واثقة بجمالك وشايفة إنو الميك أب فقط وسيلة للثقة بالنفس ، لكن لو قلتي لأ فأنا من جد أقلك لاتحطي مكياج وشوفي جمالك بدون ما تحطي ماسك على وجهك تخفي فيه جمالك لإنك جميلة ولازم تفهمي هادا الشي .. بنات لا تنسوا نفسكم أعتنوا بكل صغيرة وكبيرة فيكم لاتهملوا الداخل أبدا ولا تهملوا الخارج ، كل شي بالتوازن حلو طول ما كانت حياتك فيها إتّزان كل ما حتكوني مرتاحة ومبسوطة . 

*******

وبس جميلاتي هادا كل الي حبيت أقولو أتمنى أكون وصلتلّكم معنى الجمال بمفهومي البسيط وأتمنّى تكون التدوينة عجبتكم أشكر من كل قلبي الجميلة والعسل حبيبتي المدوّنة هاجر من المغرب أتشرف والله بتعاوني معاكي ياقلبي زوروا مدوّنة هاجر من جد تدويناتها رهيبة ودحين رح أحطلكم رابط مدونتها وروابط السوشيال ميديا : 

رابط مدوّنة هاجر : http://antiniaama.blogspot.com
رابط تدوينة هاجر : http://antiniaama.blogspot.com/2017/04/my-relationship-with-beauty-why-i-love.html?m=1

انستقرام : hajress@

تويتر : SHajress@

2 comments RANDOM