بسم الله الرحمن الرحيم
السلام عليكم حبايبي اليوم التدوينة إن شاء الله عن آخر أخبار عالم المكياج إيش حينزل الفترة الجيا من شركات الميك أب ف يلا حضّرولكم كوب من مشروبكم المفضّل وخلونا نبدأ ...
1-FENTY BEAUTY CREAM BLUSH
فينتي بيوتي حينزّلوا درجات جديدة من البلشر الكريمي حقهم طبعا فينتي بيوتي غنيين عن التعريف منتجاتهم تجنن والحلو فيهم والي يعجبني إنهم ينزلوا درجات مناسبة لجميع البشرات بكل الأندرتونز مو بس بالنسبة مثلا لكريمات الأساس حقتهم لأ حتى باقي المنتجات زي البلشرز مثلا تليق على كل البشرات الاّ ما حتلاقوا درجة تناسب بشرتكم من جد أحييهم على شغلهم الجبار وأتوقع هذا الي خلّى فينتي بيوتي يتميّزوا بمنتجاتهم .
اسماء درجات البلشرات الي حتنزل ان شاء الله :
Big Melon
Peach Face
Pinky Promise
Raisin Standardz
Riri
2- BENEFIT COSMETICS
بينيفيت كوزماتيكس حينزلوا زيت وسيروم للحواجب .. الزيت المفروض إنه يعمل زي conditioning أو ترطيب للحواجب يخلي الحواجب ناعمة الملمس ، متغذية ، وفيها لمعة .
بالنسبة للسيروم يعمل enhansing للحواجب أو
يجعل الحواجب تسير أقوى وأفضل .
أسماء المنتجات :
Whoa So Soft Brow Oil
Hubba Brow Serum
3- TARTE STICK BRONZERS
تارت كوزماتيكس حينزّلوا برونزر كريمي على شكل ستيكس المفروض إنه الفورميلا أوتركيبة المنتج تكون مخملية سهلة الإستخدام تعطي لوك ناعم وطبيعي وخفيف على البشرة طبعا تقدروا تستخدموا المنتج على أكثر من طبقة يعني buildable وطبعا vegan & cruelty free حيجي منه ٧ درجات سعر البرونزر حيكون ب ٢٦ دولار إمريكي .
4- DANESSA MYRICKS BEAUTY
EVOLUTION POWDER
دينيسا مايريكس بيوتي حتنزّل بودرة شفافة لونها بينك طبعا البودرة البينك طلعت تريند الفترة الي فاتت أنا الصراحة أحب منتجات ماركة دينيسا فمتحمسة عليها المفروض انه البودرة تكون خفيفة وشفافة ما تعمل فلاش باك ، مطفية وتعمل blur للخطوط الي تحت العين وطبعا تعمل تثبيت للمكياج الي تحتها وتعطي كمان تنوير للمنطقة .
سعر المنتج : ٢٤ دولار إمريكي
5- SPECTRUM COLLECTIONS
حينزّلوا كوليكشن فُرش ، عدد الفُرش حيكون ١٠ فُرش الثيم تبع الكوليكشن ميكي وأصدقاءه سعر الفُرش حيكون
. ٥٦ دولار إمريكي
6- DIOR BACKSTAGE BLUSH NEW SHADES
ديور نزّلوا درجات جديدة من الروزي بلشر حقهم المشهور الدرجات عجبتني لإنها متنوعة وتناسب بشرات كثير الدرجات أسماءها :
BERRY
CHERRY
ROSEWOOD
MAHOGANY
سعر المنتج الواحد ٤٠ دولار .
7- DYSON CERAMIC POP SUMMER EDITION 2023
شركة دايسون حتنزل من كوليكشن الاستشوار والستريتنر وجهاز الويفي حقهم اصدار خاص للصيف تجنن الألوان الصراحة مرة حبيت درجات الالوان حاليا نزل الكوليكشن فقط في اليابان.
8- LANEIGE SLEEPING LIP MASK
لانيج نزلوا ماسك الشفايف المشهور عندهم ولكن بنكهة جديدة طبعا يعمل ترطيب عميق فيه فيتامين سي أنتي أوكسيدانت مع البيريز والبينك ليمونايد سعره ٢٥دولار إمريكي .
9- ONE SIZE Ultimate Blurring Setting Powder
ون سايز بيوتي برضه عاملين باودر للوجه لونها ultra pink ودرجة ثانية إسمها honey بس انا الي شّتني البينك تجنن ون سايز من الماركات الي لازم إن شاء الله أجربهم قريب سعر المنتج ٣٤ دولار امريكي .
10- colourpop smokin hot palette
كولور بوب نزّلوا باليت ألوانها رهيييييبة ما أعرف مرة شدّتني هده الباليت وان شاء الله حأرجع أشتري أغراض من كولور بوب قريبا المهم سعر الباليت لحالها ٣٥ دولار وسعر الباليت مع مجموعة فرش للعين ب ٧٤ دولار امريكي .
11- kylie cosmetics
بالنسبة لكايلي كوزماتيكس حتنزّل tinted butter balm مرطب شفايف له لون حينزل يوم ١٤ جون .
12- farmacy strawberry shortcake clean
شركة فارماسي حينزلوا زبدة لإزالة الميك أب طبعا المفروض إنها تشيل كل الميك الي عالبشرة وتخلّي البشرة بعد كدة مترطبة وناعمة الصراحة الصور خلتني أبغا أشتريها من طعامتها هههههه .
وبس والله إن شاء الله كل بين فترة حأنزّلكم جديد الميك اب أول بأول أتمنى تكون التدوينة عجبتكم ومع السلامة .
0 التعليقات:
إرسال تعليق