بسم الله الرحمن الرحيم
السلام عليكم حبايبي كيف حالكم وحشتوني واليوم التدوينة غييييير😃 .. من زمان ما وريتكم إيش أشتريت لإني غالبا أنسى أصور لكن هذه المرة ما نسيتكم اليوم إن شاء الله حأوريكم إيش أشتريت من بوتيكات 💘 طبعا كل الطلبية أشتريتها بفلوسي مو إعلان يلا نبدأ ..
الفترة هذه بوتيكات عاملين تخفيضات وكل المشاهير يتكلموا عن هذه التخفيضات ... ف يوم من الأيام قلت ياشهد أدخلي بوتيكات وشوفي إيش عندهم وأنا نادرًا صراحة أدخل بوتيكات وأشتري ... لقيتهم صح عاملين تخفيضات 👌🏽 وأنا من زمان كان نفسي في منتجات شعر من بوتيكات نفسي أشتريها ولكن دايما ألاقيها سولد أوت ... المهم أغرتني التخفيضات ومالقيت نفسي إلا وأنا مشتريّا أكثر من منتج بدل ما أشتري منتج واحد 🤣 بس أشتريتهم والحمدلله أغلب الأغراض ما ندمت عليها متحمسة أوريكم كل شي يلا خلوني أوريكم بدل ما أنا جالسة أتكلم كثير .
١- منتجات الشعر من AHUHU
منتجات الشعر من أهوهو من زمان كنت أبغا أشتريها على مدح الفنانة بثينة الرئيسي 💘 وكل ما أدخل بوتيكها الاقي منتجات الشعر هذه بالذات سولد أوت ..و لكن المرة دي الحمدلله لقيتهم موجودين
المنتج الي على اليمين عبارة عن سيروم يقوي الشعرة ويمنع شيخوختها سعره بعد التخفيض ١٥٦ ريال سعودي والمنتج الي عاليسار عبارة عن تونيك فيه كفايين يعطي تعبئة للشعر ويقلل من التساقط سعره بعد التخفيض ١٦٥ ريال سعودي الماركة ألمانية كل منتجاتهم عضوية وطبيعية .
انا للأمانة أول مرة أجرّب المنتجات لكن انا أحب أسمع كلام بثينة الرئيسي في الشعر لإنه ماشاء الله شعرها حلو و ما تصبغه كثير و صحي فأسمع كلامها فأشتريت المنتجات على مدحها إن شاء الله حأجرب المنتجات من ٣-٦ شهور أعطيكم رايي فيها .
٢- عطر أحلام الشامسي لامور
عطر أحلام الشامسي لامور 💗💗💗 من الأشياء الي ماندمت إني أشتريتها يجنن صادق من قال انه أحلام ملكة 👑 .. مني عارفة أمدحلكم الباكيجينغ الفخم والا الريحة الحلوة والا إيش والا إيش🤩 .. العطر دا ريحته بودرة على مسك فخم مو أي مسك ينفع للصباح فيه تتشة فخامة وينفع كمان للمساء أنا أموت على المسك أي شي مسك أشتريه ... العطر حبيته جدا يفوز وبجداره وترا ثابت كمان لو خلطتوه مع عطور ثانية حيصير الثبات أقوى حجمه كبير وسعره حلو 💖 السعر بعد التخفيض ١٧٥ ريال سعودي .
٣- عطور أساطير ال SOFT COLLECTION
السوفت كوليكشن من أساطير عبارة عن عطر للشعر وزيت للجسم مع شمعة 💙 ريحتهم عبارة عن مسك وفانيليا وخشب الصندل والياسمين الريحة خفيفة وحلوة للصباح ولو تلاحظوا برضه فيه مسك ... سعر الكوليكشن بعد التخفيض ٢٥٣ ريال سعودي .
٤- عطور باربي كوليكشن GOOD VIBES X FARAH
عطور فرح الهادي كوليكشن قود فايبز الباربي ثيم .. الصراحة الباكيج حلو وكيوت لكن العطور جدا عادية 😶 وما حأرجع أشتريها للأمانة مرة ثانية هذه مو أول مرة أشتري من عطورها وكل مرة أقول لاتتكلمي ياشهد بم إنه ما عجبتك العطور خلاص مافي داعي تتكلمي و لكن هذه المرة بم إني صوّرت لازم أقول رايي بصراحة بعيدا عن العواطف ربي حيحاسبني على كلامي معاكم دا رايي الشخصي أنا أحب فرح الهادي وأتابعها وأحب كل شي تسويه 🤩💘 وأحسها من المشاهير القريبين من متابعينهم ... لكن أنا كمشتري أشتريت منتج لازم أقول ريي بصدق كل ما أجي أجرب عطورها ما أدري إيش المشكلة بس ما أحس كواليتي العطور عالية الجودة 😔 حتى مع الوقت عطورها تتغير ريحتها مع إنه عادي أنا بأخزن عطوري على التسريحة في مكان بارد بعيد عن الشمس ومع ذلك عطورها مع مرور الوقت تتغير ريحتها هل المشكلة من التعليب أو من جودة العطور نفسها ما أعرف 😔 طبعا أنا بأتكلم عن تجربتي مع عطورها بشكل عام .. مرة ثانية هادا رايي الشخصي أشتريت الكوليكشن عشان أدعم فرح وانا أحبها جدا وأتمنالها التوفيق وبالعكس لو حسّنت من الجودة أنا أول شخص حأشتري من عطورها كنت أبغا أعطي عطورها فرصة ثانية لكن ما حأرجع أشتري من العطور مرة ثانية وزنا كديني مجربة قبل كدة أكثر من كوليكشن كلهم نفس المشكلة بالنسبالي... عموما هذا الكوليكشن المفروض انه الريحة تكون سويت وكدة يعطيكم أجواء عالم باربي سعر الكوليكشن بعد التخفيض ١٦٤ ريال سعودي يجي عبارة عن عطرين وعطر ثالث زيتي .
٥- MEGA BOTTLE MUG FROM PUFF
دا الموق أشتريه لقهوتي الصباحية للدوام لكن لمن وصلني أنتبهت إنو اسم الموق ميجا بوتيل يعني حيكون الحجم كبير حجم الموق ماشاء الله ٥٠٠ مل و لكن تجنن الجودة 👌🏽💘 واللون وكل شي كان نفسي الحجم يكون أصغر أكيد لكن عادي I CAN WORK WITH IT سعرها بعد التخفيض ٨١ ريال سعودي وبس والله هذه كانت مشترياتي من بوتيكات 😃 قولولي إنتو إيش أشتريتوا من بوتيكات قبل كدة وإيش الي عجبكم من عندهم ولاتنسوا تتابعوني على اليوتيوب والإنستاقرام
رابط قناة اليوتيوب :
شكرا لكم حبايبي ومع السلامة .
0 التعليقات:
إرسال تعليق