مرحلة إنتقالية في حياتي ؟؟ | COFFEE TALK WITH SHAHAD

  بسم الله الرحمن الرحيم  

بناااااات كيف حالكم إيش عاملين ؟😭 ٥ شهور غبت عنّكم وفي كل يوم في دي ال ٥ الشهور بأفكر فيكم ايش أخباركم ؟؟ إيش مسوّيين ؟؟ كل سنة وإنتو طيبين رمضان كريم💗 ربي يتقبل منّنا صيامنا وقيامنا يارب العالمين 🙏🏼

أكيد حتقولولي ياشهد إيش سار معاكي ليش أختفيتي فين كنتي ؟؟؟ حأجاوب على كل أسئلتكم لإنو عندي كلام كثير أقولو يلا نبدا !!!

ما أعرف ليش وأنا أكتب دي التدوينة عيوني دمعت لإنو من جد الفترة الي فاتت ما كانت سهلة 😭 من الناحية النفسية بالنسبالي السنة الي فاتت ٢٠١٧ على نهايتها بدأت سنة الإمتياز في كلية الصيدلة في ديك الفترة ماكنت حاسة بشي يعني كنت ماشية وعايشة أيامي عادي فجأة مرت السنة وفي يوم ١١ إيبريل  ٢٠١٨💗 كان يوم تخرجي يمكن إنتو دحين تقولو طيب إيش الي يزعل في الموضوع المفروض تفرحي ... طبعا فرحت  الحمدلله على كل شي مية مررة الحمدلله لكن انا حرفيا حسيت نفسي ضاااايعة فترة التخرج

لو ترجعو لتدوينتي الي كانت بإسم (مين أنا) حتفهمو شوية كلامي

 أنا طول عمري أحس إنو في شي فيا غير عن باقي البنات ...  يعني في يوم التخرج أنا كنت لحالي وصحباتي كانو مبسوطين مع أهاليهم مبسوطين بتخرّجهم وعندهم آمال وأحلام يبغوا يحققوها وأهداف يبغوا يوصلولها في الجهة المقابلة أجي أنا اللي حرفيا ما عندي أي هدف نفسي أحققه اصلاً في داك اليوم كنت مبسوطة من برة بين صحباتي لكن من جوة كنت تعبانة😞 من جد لإنو ما عندي الثقة إنو ممكن أحقق الي أحلم فيه المشكلة إنو أنا الآن بعد ٣ أيام حأسير ٢٤ سنة والعمر بيجري وأنا محبوسة في نفس القوقعة💔 الي أنا فيها من و أنا في المتوسط خلااااص أحس تعبت من عدم معرفة نفسي  إيش أبغا😟 عندي خوف فظيييع من المستقبل😭 خايفة من كل شي جديد في حياتي و من كل شيء ممكن يسير في المستقبل لدرجة إنو وقفت أشياء كثير في حياتي كلو عشان ما يحصل شي يزعلني في المستقبل أو أفشل . دايما أحس إنو أنا غير وإنو رح أعمل شي غير ورح أغير شي في الدنيا دي💘 لكن في نفس الوقت مني عارفة إيش هو😭 ما أقلكم قد إيش أهملت صحّتي وجسمي وزني زاد بسبب إني كنت أهرب من الواقع بالأكل ودا الشي مررررة غلط وأكيد في بنات كثير زيي أحس إني مهمومة وترا دا الشي مو جديد يعني أنا في البيت دائما بأكون مع نفسي في غرفتي لإنو ما أحس إنو في أحد فاهمني دائما ليا عالمي الخاص الحمدلله ربي معطيني القوة إني أؤمن بنفسي وإنو حيجي يوم حاحقق فيه الأشياء الي أنا في الوقت الحالي أقول مستحيل تتحقق (طبعا مافي شي مستحيل على الله).

نصيحة مني حطوها حلق في أدانيكم👂🏼 لا تفقدوا الأمل من نفسكم لا تخلوا أحد ينتقص منكم أو يحبطكم مهما كان🙏🏼 ولا تجلسوا كدة ضايعين يعني البنات أو الأولاد الي دحين في الثانوي أبدؤوا أبحثوا عن نفسكم من دحين أكتبوا أهدافكم وأعرفوا إنتو إيش تبغوا💙  أنا ما حسيت بأهمية دا الكلام مع إني دائما كنت أسمعه وما أهتم❌ كنت أقول مع الأيام رح أعرف أنا ايش أبغا والأيام عدّت وما لقيت نفسي الا وأنا متخرجة لكن ماعندي أي هدف للمستقبل😞 بكل بساطة لإني أساسا خايفة من المستقبل خايفة من الفشل خايفة من المجازفة خايفة من إنو يجي شخص في المستقبل يشوفني ضعيفة أو يستصغرني فاهمين عليا ؟ نفسي من جد أكون قوية💗 إتجاه ذاتي أرسم حياتي بطريقتي وتكون ليا أهداف وأحلام أوصلّها ودا هوّ الي أنا أبغاكم توصلولو لإنو كل أحد مننا من حقو يحلم ويحس إنو طاير في السما إنو ناجح وقِدر يوصل لحلمه لو إنتَ او إنتي كنتو أقوياء الكل حيشوفكم بدي الصورة✨.

الآن في المرحلة هادي من عمري بأدعي ربي ياااارب🙏🏼 يهديني للطريق الصح وأحقق كل أحلامي بدون ما أخاف من المستقبل يارب ربي يكتبلي ويكتبلكم كل الي فيه الخير و كل شي حلو🌸 نفسي أكون ملياااانة نجاحات نفسي أهتم بنفسي أكثر وأكون كلّي حيوية وحب للحياة💙 ... لا تتخلوا عن أحلامكم أجروا وراها دايما مافي أحلى من رضى الذات لو ما كنتو واثقين من نفسكم هنا تجي المشكلة✨ انا عمري ما كنت واثقة من نفسي في نفس الوقت مافي أحد حيساعدني غير نفسي أنا الي لازم أخرج من الي أنا فيه وأحاول أشوف حلول وأبحث عن ذاتي لإنو أنا الآن في أجمل مراحل حياتي لو ما أستغليتها كفاية  ال ٢٣ سنة الي مرو بدون ما أستغلهم ... ما أبغا يسير عمري في ٦٠ و أنا في محلي أبغا لمن يكون عمري ٦٠ عيالي ينبسطو إنو هادي هيا أمهم 😭💘 ويفتخروا فيا أبغا أكون قوية و مثال حلو لهم يارب تكونوا فاهمينني .

كل غرضي من دي التدوينة إني أقلكم إنو حتى في أصعب أوقاتكم خلو عندكم أمل ولو بسيط من المستقبل  دائما في نور مستخبي لنا✨ أشتغلو على نفسكم من دحين مهما كان عمركم لا تستنوا عمر معيّن عشان تبدؤوا.

القرار الوحيد والهدف الوحيد الي حطيتو في بالي وأشتغلت عليه هوا إني أكون مدوّنة 🌸🙏🏼 وأفتح مدونة أوصّل كلامي لكم وأكون مصدر سعادة وإلهام 😭💗 لأحد منكم نفرح مع بعض ونزعل مع بعض ونحكي تجاربنا الحلوة والوحشة مع بعض أنقلكم حبي للميك أب ولأي مجال في الحياة أنا من جد مبسوطة فيكم وفخورة إنو عندي المدونة الي عمري ما رح أستغني عنها حنتطور أنا وإنتو مع بعض لإنكم أحلى شي في حياتي😍

الآن أنا في مرحلة إنتقالية مرحلة حتفتح عيني على أشياء كثير ماأعرف إيش المستقبل مخبيلي لكن من كل قلبي أتمنى إنو ربي يكون مخبيلي مقادير خير ياااارب أدعولي ... أحبكم جمييييييعا لاتنسوا نفسكم أشتغلوا على نفسكم وربي معاكم طالما إنتو معاه يارب ربي يكتبلكم نفر نفر السعادة الأبدية يارب وآسفة مرة تانية إنو غبت عنكم أنا الآن رجعت أخدت فترة راحة نفسية شوية مع نفسي .. 

أحبكم قد البحر على تعليقاتكم وكلامك الرهيب الي يجنن شكرا لكم من القلب كونوا دايما مبسوطين😍🌸 ويارب أشوفكم جميعا محققين كل أحلامكم ههههه خلصت دموعي😭 في دي التدوينة هههههه يلا حبايبي أشوفكم في التدوينة الجيا إن شاء الله 

لاتنسو تضيفوني على الإنستقرام رح أعملكم ميك أب لوكس كتييير في الأيام الجيا تماااام لا تنسو العيد قرب بالخير فأبغا أعملكم أفكار ميك أب عيون وكدة حركااات ههههه يلا حبايبي باااااي💋

.

.

INSTAGRAM : https://www.instagram.com/thatbeautyangel

2 comments COFFEE TALK