بسم الله الرحمن الرحيم
السلام عليكم بنات كيف حالكم 👋🏼 إيش عاملين قولولي ؟؟؟ أنا اليوم قلت لازم أكتبلكم تدوينة كوفي توك ☕️
واليوم الموضوع من جد أثر فيا بشكل مرة كبير والشي الي خلاني أعمل دي التدوينة هوا أكيد إني الين يومكم دا دايما يجي في بالي سؤال هل أنا كفاية ولا لا ؟؟ هل رح أنجح في الموضوع الفلاني أو لا ؟؟ 🤔
فخولنا مع بعض نتكلم في دا الموضوع شوية يلا نبدأ 😍 !!!
هل في يوم حسيتو إنو إنتو منتو كفاية أو قود إينوف إنو تنجحو في حياتكم مثلا 🤔 ؟؟؟
كم مرة شفنا شخصية مشهورة وقلنا جواتنا إنو نحنا محنا كفاية إنو نكلمهم أو نحتك بيهم 😞 ؟؟؟
نجلس بعد كدة نقارن أنا مني جميلة زي دي الشخصية ، أنا مني ذكية زي دي الشخصية ، أنا مني واثقة من نفسي كفاية زي دي الشخصية ونجلس في دي الدوامة الي بدل ما تبنينا من جوا بالعكس تهدمنامع الأسف 😷 .
السوشيال ميديا مثلا سار مليان بالأكاونتات الي زي كدة تماما نشوف شخصية مشهورة 💁🏻 بكم متابع نقول خلاص دي الشخصية أحسن مننا مع إنو هادي الشخصية ما أنشهرت الا من متابعينها يعني منّي ومنك يعني نحنا الي شهرناها وترا أغلبهم بعد كدة ما يعرفو يتعاملو مع هادي الشهرة [ الكلام هادا مو لكل الحسابات في حسابات من جد ترفع الراس لإنو أصحابها محترمين ومتواضعين ] .
أو نلاقي شخصية جالسة تصور في السناب سفراتها و مشترياتها من ماركات و خرجات و طلعات ودا شي أبدا مو عيب بس أحيانا لازم نفكر نحنا إيش بننزل أو في المتابع لمن يشوف ايش رح يفكر في دي الشخصية الي نزلت دي السنابات ؟؟ أكيد رح يصدق إنو هادي الشخصية أحسن منو أعلى منو وإنو ما تكتمل سعادتو الا لمن يحقق الي هما فيه [ مع إنو أغلب دول الناس بيحطو دي السنابات او الصور٢٤ ساعة صدقوني من باب الفشخرة في كتير ناس بيخرجو ويسافرو ويصورو المعقول للمشاهد أو المتابع ] كل شي يزيد على المتابع أو المشاهد إما حيتأثر إما حتأثر عليه سلبي أو إيجابي ، كم مرة شفنا شخص مهندس أو دكتور وقلنا [ أنا مني كفاية أكون ناجحة و ليا قيمة زيو 🤔 ] ؟؟؟
أنا أشوف إنو نحنا هادي الأيام بنقلل من نفسنا ونحنا محنا داريين مو بس في السوشيال ميديا بالعكس سارت تأثر علينا في العمل أو في الحياة الإجتماعية بين أهلنا وصحباتنا والناس الي حوليننا بصورة عامة .
الإنسان لازم يعطي قيمة لنفسو أولا 💘 علشان الناس تحترمو وتعرف قيمتو بالمقابل .
في مرة قرأت قصة إنو [ رجال قال لمرأة كان يبغا يتزوجها وخايف يقلها فلمن قلها : أنا خايف إنو أقلك لإنو أنا شايف إنو انتي أحسن مني قالتلو إنت حكمت على نفسك بدون حتى ما أعرفك إنت رفضت نفسك بدون ما تديني فرصة أحكم ] دي القصة أول ما سمعتها أثرت فيا إنو كيف نحنا من جد بنقلل من نفسنا ونحكم على نفسا مع إننا نستاهل أكثر ونستاهل إنو نكون مبسوطين لإنو طالما نحنا مع الله مافي شي مستحيل 🌸 . عمرو الفلوس أو العلم أو الشهرة ما كانت مقياس في كثيييير ناس عندهم فلوس ومشاهير أول ما راحت منهم الفلوس اكتأبو ودخلو في حالة > كلو علشان ربطو سعادتهم بالمال الي عمره ما حيجبلهم السعادة ولإنو عمرو ما كانت المادة كفيلة بإنو تخلينا نحس إنو نحنا كفاية ونفس الكلام بالنسبة للمشاهير في كثير منهم الي أنحرف 😞 والي أنتحر كلو علشان ما عرفو يتعاملو مع الشهرة وفكرو إنو دي الشهرة حتخليهم سعيدين وفي النتيجة هما كانو أكثر الناس المكتئبين 💔.
أنا زيكم زمان كنت أشوف نفسي إنو ليش أنا مني زي فلانة مع إنو الحمدلله 🙏🏼 عندي كل شي لكن أحيانا أشياء بسيطة زي كدة بنشوفها حوليننا تخلينا نقلل من نفسنا ومن إحترامنا لنفسنا ، كل يوم أحارب إنو أحب نفسي زي ما أنا وما أربط سعادتي الا بنفسي لا بجمال ولا بمال ولا بشهرة حتى لو كانو موجودين دايما أقول يارب لا تخلي في قلبي ذرة تعلق بدي الأشياء ، حلو الإنسان إنو يحسن من وضعوا ويحب نفسو زي ما هوا علشان يقدر يستمتع ويعيش حياتو وينبسط لكن لا تخلو المال الزايد او الشهرة الزايدة أو الجمال الزايد أو العلم الزايد يخليكم تنسو [مين إنتو] .
دايما قولو في نفسكم الشخصية الفلانية الناجحة هادي كيف وصلت ؟؟؟ 🤔 للشي الي هيا عليه اليوم ، أكيد الشخصية دي أشتغلت على نفسها أكيد حاربت و خسرت مرة ومرتين وثلاثة الين ما وصلت حاولو تطورو من نفسكم لكن أبدا لا ترفعو من قيمة شخص أعلى من نفسكم تبغي تكوني دكتورة حتكوني تبغي تكوني حلوة مع إنو مافي أحد وحش حتكوني تبغي تكون مثلا دراستك أو ظيفتك أحسن حتسير إن شاء الله إذا ربي كتبلك شي حتلاقيه
وربي ما حيعطيكي شي الا وهوا كاتبو لكي 💘.
أشتغلو على نفسكم حسّنو من نفسكم حبو نفسكم عشان نفسكم مو عشان أحد أنا ما سرت أحس بقيمة دا الكلام إلا دحين لا تنسو ذاتكم أبدا مهما سرتو ولا تعلو من شأن شخص عن نفسكم 🎀
لإنو كلنا واحد ربنا ما فرق عبد عن التاني الا بالتقوى .
الظاهرة هادي أنا أشوفها تسير عند البنات أكثر من الأولاد مع إنو حتى الأولاد تسير معاهم .
أخر شي مرة تانية أبغاكم تحبو نفسكم وأبدا ما تغركم المظاهر الي بتشوفوها حولينكم ، وتوثقوا بقدراتكم وإنو تقدرو توصلو للشيء الي تبغوه مهما كان ومهما كانت ظروفكم إذا ربي معاكم 🙏🏼لا تخافو من شي أتمنى انّكم تكونو مسحتو جملة أنا مني كفاية ❌ من بالكم وتغيروها بإني أنا أقدر أسوي المستحيل مهما كان طالما الله معايا .
🌸🌸🌸🌸🌸🌸🌸🌸🌸🌸🌸
دايما أختار هادي المواضيع إنو أتكلم فيها لإنها مهمة وتأثر في الإنسان وأغلب هادي المواضيع مريت بيها 😉 وحتى لو ما مريت بيها أكيد أكون شايفاها حواليني أنا أشوفكم أخواتي من جد بنات كل كلمة باقلكم هيا خارجة من قلبي لإنو ياما كنت أشوف نفسي ما أستحق أكون مبسوطة في حياتي من لاشيء 💔 مع إني دايما أحس إنو ربي معايا ودايما أقول الحمدلله 🙏🏼 إنو أهلي معايا لإنو من جد هما أهم شي عندي في دي الدنيا الباقي كلو يروح ويجي مافي أحلى من القناعة والسعادة الي تجي من جوا 😊 حبو نفسكم مليون مرة لإنو من جد دا شي مرة مهم تشتغلو عليه من جواتكم
أشوفكم حبيباتي في التدوينة الجية ومع السلامة 👋🏼 .
موضوعك جميل جميل ، تقدير الذات ورفع الإستحقاق هم البوابه ، كل شيء تطمحي له بتوصلي ، مافي أحد أحسن من أحد في شيء ، كلنا نستحق النجاح طالماً سعينا ، أهم شيء إن نركز على هدفنا ونسعى له ونرفع إستحقاقنا ، بأن نقول لنفسنا إحنا مستحق النجاح وربي كريم علينا ولكل أُمرىء ما سعى ، ف إذا كنت أشتغل على مجال التأثير بالناس فعلياً بآكون مؤثره طالماً إني مركزه على هالشيء وأنا أبيه من داخلي عشان أنا حابته والقلب النظيف هو أهم شيء ، ياما أحتكيت بناس حاولت تنشهر وصار لها مكانه ونشوفهم يلمعوا ولما تقربي تكتشفي إنها أبد مو أخلاق وتحسد الي يحاولوا إنهم يشتغلوا على أنفسهم يعني تبي إحتكار الشيء عليها ، على العكس مفروض النجاح للكل وللكل رزقه 😻❤👏🏻👏🏻 ، وتخيل كذا المجتمع كله ناجح وكلنا نأثر بالنجاح والسعاده على بعض تخيلي جمال المجتمع كيف بيصير .
ردحذفربنا يوفق الجميع 🌹🌹.
شكراً .
🌸 حبيبتي أنا الي مبسوطة إنو التدوينة عجبتك كلامك جمييييل ياجود
حذفموضوع قريب على قلبي لان وقت البلوغ كنت اشوف نفسي شاذة عن البنات ليش هم يعرفون يتمكيجون و انا ما اعرف ليش هم ستايلهم حلو و انا عادي و كنت احزن على نفسي و كل هذا بسبب ان قارنت نفسي ب فيهم و بعدين لما دخلت الجامعة تعلمت ان اثق بنفسي و بشكلي و افتخر فيه لان اذا ما حبيت نفسي اولا مين راح يحبني
ردحذفوأنا كمان زيك أيام ما كنت صغيرة كنت دايما أقارن نفسي بصحباتي ليش هما يلبسو كدة وانا لا ههههه الين ما كبرت وفهمت إنو كل واحد له ستايلو الخاص مو لازم أكون زيهم أهم شي أكون راضية عن نفسي
حذفموضوع جميل كالعاده اثر فيني بشكل كبييييير اول مادخلت الجامعه كانو فيه بنات يصادقونك على حسب العائله وعلى حسب الشكل وكمان على حسب كم متابع عندك انتي مشهوره ولا لا كان يجي ببالى سؤال ياربي ليش ماني مشهوره بالانستا مثلهم بس فعلا مثل
ردحذفماقلتي كلهم مايعرفو يتعاملو مع هذي الشهره
(أشتغلو على نفسكم حسّنو من نفسكم حبو نفسكم عشان نفسكم مو عشان أحد)
اثرت فيني بشكل كبيييير مره كبير
شكرا ياحلوتي I LOVE YOU
😍 حبيبتي نووووورا الله يسعدك ياااارب
حذفمن عيوني رح أعمل تدوينة خاصة لهادا التاق 💘 شكرا حبببببببيبتي هاجر أنا أتشرف إني كنت من المدونات المفضلة عندك
ردحذف