ANTI HAUL!! | منتجات مكياج ما حأشتريها

الأحد، 3 سبتمبر 2017

  بسم الله الرحمن الرحيم  

أهلين بنات إيش عاملين وحشتووووني خلاص الإجازة ما باقي فيها كثير لكن إن شاء الله لازم نحلل كل يوم باقي إن شاء الله ههههه لا أوصيكم حللوها 🤣💘 اليوم جياكم بتدوينة نار وشرار 🔥 التدوينة أول مرة أعملها اتمنى تعجبكم زي ما أنا حبيت أكتبها من كل قلبي 🎀
 فيلا نبدأ بالتدوينة .


قبل ما أبدأ أبغا أقلكم عن فكرة التدوينة ، التدوينة إسمها أنتي هول ❌ يعني إني أتكلم معاكم عن المنتجات الي ما أبغا أشتريها 😞 لأسبابي الخاصة طبعا كل شركة من الشركات لها إسمها ومكانتها وبالعكس أغلب هادي الشركات أنا أحبها ودايما أشتري منهم 😍 لكن هادي المنتجات مارح أشتريها وأكيد في ناس كتير عكسي رح يحبوها 💃🏻ويشتروها فلو تبغو تعرفو ايش المنتجات الي ما حأشتريها خليكم معايا .

  Anastasia Beverly Hills Subculture Palette  


أول منتج مارح أشتريه هوا باليت الآيشادو الجديد من أناستازيا (سب كولتشر باليت) ، الشي الي ما عجبني في الباليت هوا الألوان 🤔 ما أعرف ليش ما عجبتني يغلبها درجات الأخضر وأغلبها مات ، يعني لو زودو شوية الشيمر بدل لونين فقط كان ممكن أعيد النظر فيها. وكمان المشكلة الكبيرة الي شفتها في معظم الريفيوهات والمراجعات عنها إنها تتناثر في نفس الباليت وكمان عالعين بشكل فظيع 🙄😷 عشان كدة شلتها من بالي تماما ما أحس إنها عجبتني أبدا .

  Natasha Denona Sunset Palette  



ناتاشا دينونا من الناس الي مكياجهم دائما له إسمو والريفيوهات عن منتجاتها دائما إيجابية 😌 ، لكن الصراحة صح أنا جدا أحب الألوان الترابية والروز قولد وال وورم تون لكن خلاااااااص طفشت مليون ألف شركة نزلت باليتات وورم تون 😒و ثاني سبب كبيييييير خلاني ما أفكر في الباليت هوا سعرو الغالي جدا ليييش أدفع ٥١٦ ريال تقريبا في باليت آي شادو ، وترا فيه شركات كثير أسعارها رخيصة ومعقولة منزلين باليتات تحتوي على معظم هادي الألوان زي الباليت الجديد من كولور بوب وباليت 35o من مورفي 👌🏽. أنا عارفة إنو ناتاشا دينونا آيشدوهاتها واضحة وحلوة لكن الصراحة ما يسوا أبدا ٥١٦ ريال في باليت ألوانو موجودة في السوق وكثير شركات عملت زيه يعني مافي شي سبيشال في الباليت يخليني أدفع كل دي الفلوس .

  Urban Decay Heat Palette  

أوربان ديكاي من الشركات الي أحبها 😍💘 وأول باليت أشتريه في حياتي كان منهم ، هادا الباليت فظيع وأنا جدا حابة الألوان لكن أبغا أشتري باليت مورفي 35o يحتوي على نفس الألوان تقريبا 😉 فما أبغا باليتات كتير نفس الألوان وزي ما قلتلكم باليت واحد وورم تون يكفي وبم إني حأشتري إن شاء الله من مورفي ما أحتاج دا الباليت .. أرجع وأقول هادا الباليت جميييل وفظيع لكن أنا ما أبغا أكثّر ألوان وورم تون كتير في حقي الكوليكشن .

  kylie Cosmetics | I WANT IT ALL PALETTE  


ما حبيت الألوان بكل بساطة 😅 .... أنا أحب أرواج كايلي وأحب البرقاندي باليت حب فظيع 😍😍😍 لكن في الوقت الحالي أحس كايلي لازم تعمل شي وااااو يعني أنا مستنية إنها تسوي شي أحلى من كدة .

  KKW Crème Contour & Highlight Kit  





ما أعرف ليش بس أحس كيم كارداشيان غارت من أختها كايلي وكان شكلها زي دا الإيموجي 😒 ... وقالت لاااازم أعملي براند ميك أب خاص بيا ههههه 🤣 المهم لو لقيت شي منها عدل كان ممكن أفكر أشتري من عندها 🤔 بس لين دحين منتجاتها ما تستاهل الفلوس أبدا ، بذّات هادا الكونتور ستيك زي كإنها بتقول للناس ترا الي حيشتري المنتج دا من دحين أقلو ترا فلوسك جاتني وإنت خد دا البرودكت الرخيييييص الي ما يسوا ٣٠ ريال 👊🏽 ... أول ما شفتو ذكرني علطول بمكياجي الي كنت أشتريه وأنا صغيرة من تويز آر اس 😹🤣💔 من جد إيش دا كإنو لعبة والكونتور يجي في كيس بلاستيك مرررررة رخيص وترا ما كلّفها ولا شي زي كإني جبت المنتج ورميتو في كيس نايلون ملون وأديتو الناس بالمبلغ الفلاني بالله دا مو سرقة وحرام 🖤... كمان كمية الكونتور نفسها زي مهو واضح في الصورة الثالثة مررررة الكمية قليلة يعني الصراحة بالكثير مرة مرتين وحيخلص البرودكت معايا 😟 أنا عن نفسي مني عارفة إيش أقول بس الكونتور ستيك هادا من جد حرااااام فيه الفلوس سرقة عيني عينك الشي الوحيد الي سوتو عدل هوا إنها عملت درجات متنوعة لأكثر من بشرة .... أتمنى إنها تنزل شي من جد يسوى وله القيمة وأنا كلّي أمل في اليوم اللي كيم تنزّل فيه شي يفتح النفس .

  Huda Beauty's 3D Highlighting Palette  


فكرة الثري دي هايلايترمن هدى بيوتي جديدة ودا شي أنا أحترمو😊 لكن ما أحس إنو ضاف شي جديد حتى نفس الهايلايتر عادي جدا 😅 يعني مو الهايلايتر الي في نظري واو ما أعرف لكن حسيت فكرة الثري دي تلخبط شوية مع إنها جديدة المهم أنا ما حبيت الفكرة ولا حأشتريه .

🌸🌸🌸🌸🌸🌸🌸🌸🌸🌸


وبكدة حبيباتي أكون وصلت لآخر التدوينة قوليلي رأيكم في التدوينة وإذا عندكم أفكار تدوينات تبغوني أنزلكم هيا قولولي 😍💘 
ومرة تانية أرجع أقول أنا أحترم كل الشركات الي ذكرتها لكن دي المنتجات ما أفضّل إني أشتريها وأكيد فيه غيري حبّها وأشتراها ... شكرررررا مرة تانية وأشوفكم في التدوينة الجديدة ومع السلامة 👋🏼 .


هناك 8 تعليقات:

  1. اغلب الاشياء اتفق معاه فيك في الرأي و حبيت الدوينه

    ردحذف
    الردود
    1. 💘 الله يسعدك حبيبتي أفنان يارب شكرا على التعليق الحلو

      حذف
  2. حبيت فكره التدوينه ، عشان تخلي البنات تعيد النظر قبل ماترمي فلوسها في شيء ، بالذات المبتدئات بالميك اب ممكن يكونوا متحمسين ويشتروا شيء ويخسروا فلوسهم ، فبوستك يخلي البنت تعيد النظر في ايش تحط فلوسها 😻👏🏻👏🏻 ، واكيد كل بنت ولها نظرتها الخاصه 👍🏻❤.

    ردحذف
    الردود
    1. 💘💘 جووود حبيبتي أنا من جد مبسوطة إنو التدوينة عجبتك شكرا من كل قلبي

      حذف
  3. فكرة التدوينة مره جميلة ، حبيت باليت اربن ديكاي بس زي ما قلتي مورفي يكفي
    شكرا لك♥️

    ردحذف
    الردود
    1. 😊💘 حبيبتي إنتي الله يسعدك على التعليق العسل شكررررررا

      حذف
  4. أتفق معاكي في كل كلمة...

    ردحذف