تعالوا خلونا ندردش مع بعض ! | COFFEE TALK

  بسم الله الرحمن الرحيم  

السلام عليكم بنات إيش أخباركم كل سنة وإنتو بألف خير وبصحة وسلامة غبت عنّكم فترة أنا عارفة سامحوني وإن شاءالله في تدوينة اليوم رح نتكلم مع بعض ورح أقلكم ليش غبت عن التدوين الفترة إلي فاتت ؟؟ وإنطباعي عن سنة ٢٠١٧ ؟؟ وكيف حابة تكون السنة الجديدة ٢٠١٨ إن شاءالله ؟؟  فيلا خلونا نبدأ جيبو مشروبكم المفضّل وتعالو بسرررعة لإنو 

أنا من جد مرّة متحمسة أتكلم معاكم 🎀

خلّونا نبدأ بأول سؤال أنا ليش غبت عن التدوين الفترة الي فاتت ؟؟ السنة الي فاتت كانت من مخطّطاتي إني أبغا أشتغل على مدونتي أكثر وإنها تكبر أكثر وكنت أبغا مدونتي توصل للصورة الي أنا متصوراها حطيت آمال كثير فكنت أكتب

 التدوينات وأحط على نفسي ضغط إنو أبغا كل تدوينة تنزل بيرفيكت مافيها غلط مع إني كنت أغلط 😟 لكن من جد كنت أبغا كل تدوينة تكون كاملة من حيث التصوير والكتابة وكل شي فكنت أفكر كثييييير ، صح إنّي في بداية الشهور كنت أنزل تدوينات لكن وصلت لمرحلة ما سارت عندي أفكار أبدًا زعلت 😞 وقتها مرة كتير إنو كيف أنا مني قادرة ألاقي أفكار وفي نفس الوقت صح إنو أنا بيوتي بلوقر لكن مو كل الوقت رح أتكلم عن ميك أب وأصلا ما أقدر أشتري كل جديد لإنو الصراحة عشان تكوني مواكبة كل جديد دا الشي يتطلب منك ميزانية كبيرة عشان تقدري تشتري أول بأول وأنا ما أشتري ميك أب دائما عشان أكون معاكم صريحة وحتى لو أشتريت ميك أب ما أحب أتكلم عن المنتج الفلاني لين ما أجلس أجربو فترة صح إني أحب الميك أب والبيوتي والعناية لكن أنا ما أقدر أصنف نفسي إني بيوتي بلوقر فقط أنا أشتري ميك أب وأحب الميك أب لكن في نفس الوقت أحب أتكلم معاكم في أي موضوع أحسو يفيدكم 💘 أي شي في قلبي أحب أقولو .الضغط الي حطيتو على نفسي خلاني أوصل لمرحلة مني عارفة إنتو إيش تبغوني أعطيكم في المدونة تبغو ميك أب أكثر تبغو مواضيع عامة أكثر إيش تبغو ما كنت عارفة .

قررت وقتها آخذ بريك فترة أرجع أكتب فيها أفكار جديدة للمدونة تعجبكم وتخليكم دائما مبسوطين 😊 للآن أنا محتاجة مساعدتكم في هاذا الموضوع 🙏🏼 أبغاكم تدوني طلباتكم تبغوني عن إيش أكتبلكم ؟؟ إيش تبغوني أعطيكم ؟؟ قولولي كل الي تبغوه من جد مدونتي ما حتستمر الّا بيكم بنات أنا هنا عشان أبغا أفيدكم وفي النهاية أنا إنسانة عندي مشاكل زي مشاكلكم بالضبط وبنت زيّكم عشان كدة دائما أحب أتكلم في المواضيع الي تحصلّنا كبنات لإنو من جد أحيانا تكوني تبغي أحد يتكلم معاكي ويفهمك ويكون زيك و من عمرك عشان كدة باقلكم قولولي ايش المواضيع الي تبغوني أتكلم فيها كثير وما تطفشو مني فيها ؟؟ مستنيا آرائكم بنات لإنكم من جد مهمين عندي😍🌸 ... بالنسبة للتدوينات رح أنزل إن شاء الله تدوينتين كل أسبوع 💙 يوم الإثنين والجمعة متحمسة جدّا للسنة الجديدة يارب حأشتغل فيها أكثر على نفسي وعلى المدونة بدون ما أضغط على نفسي .

سنة ٢٠١٧ كانت من السّنين الصّعبة عليا أنا شخصيّا يعني حسيت نفسي إني تايهة فيها مني عارفة إيش أبغا كنت عارفة إنو التوهان دا حيسبّبلي مشكلة وما حيخليني أنجز ودا الي سار سِبت نفسي تايهة وما جلست مع نفسي بشكل جدي وقلت لا ياشهد إنتي لازم توقفي مع نفسك وقفة جديّة عملت العكس 🙃 ومن جد السنة كلها مرت بدون ما أنجز فيها شي 😒 صحّتي أهملتها وأهملت نفسي وعلى آخر السنة بدأ دا الموضوع ينعكس على نفسيتي وتفكيري كانت من السنين الصعبة عليا نفسيّا ولكن على آخر كم يوم فيها حسيت إنو إن شاء الله ٢٠١٨ حتكون غير أنا من البنات الي ما أحط لنفسي أهداف ولا أحب أخطّط لحياتي ودا الشي غلط من وجهة نظري ، كنت دائما أقول الي ربي كاتبو حيسير هادا الكلام صح لكن كمان ربي قال إنو نحنا لازم ناخذ بالأسباب ونشتغل على نفسنا وأكيد حنلاقي نتائج مع الوقت والإستمرارية .

 دي السنة إن شاءالله ٢٠١٨ أبغا أوثق بقدراتي أكثر لإنو أنا عارفة إنو أقدر أتغير للأحسن وزي ما قلتلكم أنا إنسانة وعندي مشاكل وأخطاء أبغا أغيرها أو عالأقل أشيلها من بالي وأكمل طريقي لقدام وما أرجع للوراء .. من جد بنات خلونا نشتغل على سنتنا وعلى كل سنيننا الجية مع بعض نهتم بنفسنا أولا علشان نقدر نسعد ونرضي الي حوليننا لازم نحقق الأحلام الي في بالنا وما نخليها بس حلم وإنما واقع نعيشو 

دائما كنت أشوف البنات الي نجحو ووصلو وأقول طيب كيف وصلوا علشان من جد في شي جواتي يقلي إنو أنا هنا لشيء أكبر من إني أدرس وآخذ شهادة وأشتغل ، تمام أتوظفت وخلصت دراسة طيب وبعدين أنا إيش سويت لنفسي شيء يسعدني أنا فقط يخليني أروح لعالمي الخاص .. كل وحدة فيكم بنات كل وحدة دحين جالسة تقرا كلامي لا تستني أحد يسعدك الدنيا جدا قصيرة لازم تشوفي نفسك وسعادتك لاتستني أيّا من كان يسعدك لإنو إنتي بس بعد الله الي يعرف نفسك حاولي تطوري نفسك من الآن خلي حياتك فيها أمل كل يوم تصحي عشان تطوريه وتشتغلي عليه أدرسي وأتخرجي وأتوظفي لكن كمان سوي شي إنتي تحبيه طوريه وأشتغلي عليه ، أنا أشوفكم أخواتي وأكلمكم زي ما إنتو شايفين بدون تكلّف ورسمية لإنو أبغا كلامي يوصل للكل زي ما هوا خارج من قلبي .

الشي الحلو إن شاء الله إنو السنة دي رح تكون سنة تخرجي 🙏🏼 من الجامعة الحمدلله يارب يعدي كل شي على خير

آخر شي حابة أقولو لكل بنت هوا إنو إنتي تقدري توصلي للهدف الي تبغيه مهما كان لا تقللي من نفسك أنا دائما أقلل من نفسي لكن لأ لازم كلنا نبين لنفسنا إنو نقدر نوصل خلو دي السنة غييييير وكل السنين الجيا غيييييير إنتو الي لونو حياتكم زي ما تبغو وربي إن شاء الله معاكم أحبكم كلكم وإن شاءالله أشوفكم من نجاح لنجاح .

لاتنسوا تكتبولي تحت في الكومنت إيش تبغوني أنزلكم تدوينات مرررة ضروري 

أشوفكم في التدوينة الجية ومع السلامة😉💙.

INSTAGRAM : https://www.instagram.com/thatbeautyangel

TWITTER : https://twitter.com/thatbeautyangel

8 comments COFFEE TALK