بسم الله الرحمن الرحيم
كيفكم حباااااايبي و حشتوووني قد البحر من عادتي لمن تسير أشياء كتيرة في حياتي روتيني يتلخبط فمن جد بعدت عن التدوين فترة وما سارت عندي أفكار زي زمان لكن دحين أشتقت و الله و حشتوني و وحشني التدوين و عندي أفكار جديدة لكم يعني إن شاءالله حتجيكم تدوينات كتيييرة الأيام الجية إنتو بس قولولي كيفكم ؟؟؟؟
اليوم حبايبي جيتكم بتدوينة عن مشترياتي الي أشتريتها مؤخرا أغلبها بيوتي برودكت مو ملابس لكن لسة حأشتري أشياء زيادة فأستنوا الجزء الثاني ....
من كتر ما وحشتوني طولت المقدمة ههههه يلا نبدأ :) بالتدوينة !!!
بس قبل ما نبدأ بالمنتجات أبغا أقلكم شيئين أول شي مو كل هادي الأشياء جربتها فمو كل المنتجات حاقلكم رأيي فيها لإني لازم أجربها أول أوكي ؟ و تاني شي حبايبي إنو في حاجات أشتريتها بعد ما صورت هادي الصورة الي تضم كل المشتريات ضفتلكم الحاجات الي أشتريتها بعدين لكن ما حطيتها في الصورة ، صورتهم لحالهم و إنتو بتقرأو التدوينة للنهاية حتشوفوهم .
طيب إللي من زمان كان يقرأ تدويناتي يعرف قد إيش أنا أحب الشامبو الجاف من بيتيست و أتكلمت عنو في تدوينة مقارنة قديمة مع ماركة تانية ، من جد مرررة رهيب هادا الشامبو الجاف أشتريتهم من بوتس الاتنين الي بالكرز ب ٣٢ و الكبير الي في النص ب ٥٠ ريال و
كانو بوتس عاملين عرض واحد و التاني مجانا أو إتنين و الثالث مجانا .
وهنا أشتريت مجموعة الروزماري و هي عبارة عن شامبو و بلسم و ماسك ، الشامبو أشتريتو ب ٢٠ و الماسك ب ٢٠ و الثالث مجانا حسب عرضهم و لسة ما جربتهم .
أشتريت كمان من N7 مناديل تشيل المكياج ، أستخدمتها و لقيتها شي جمييييل مرة ما تحسس الوجه و خفيفة و تشيل كل شي حتى الميك أب الي يكون ووتربروف أو ضد الموية أشتريت وحده و التانية مجانا سعرها كان ب ٧٥ ريال غالية بس بقيمة وحده زي كإنك مشتريا إتنين مرررة تستاهل .
هادا المنتج عبارة عن زي السيروم الثقيل للشعر يتحط قبل الإستشوار أو الفير على شعر جاف ، أعجز وأقلكم إني مررررة أحبو قبل هادا اشتريت واحد و خلص و بعد هادا كمان أشتريت واحد مرررة أحبو ما ألاقيه هنا كتير أشتريتو من الصالون الي قصيت فيلو شعري قبل سنتين و دحين لقيتو في بوتس أكيد أشتريتو بدون ما أفكر يخلي الشعر يلمع و ما ينفش مع الرطوبة يعني الشعر مع الاستشوار أو الفير ما يخرب ، مرررة رهيب وأكيد يحمي الشعر من الحرارة أشتريتو ب ٨٠ ريال من هنا و أونلاين أشتريتو ب ١١ دولار يعني تقريبا ٤٤ ريال .
سكرب FLAKE AWAY أحلى سكرب أستخدمتو لين دحين يقشر و ينعم الجسم و ما يحسسها أبدا و الي تتابعني في السناب تعرف إنو أنا أتحسست قبل فترة من سكرب أشتريتو قبل هادا
عن جد دا السكرب كلمة رهيب قليلة عليه .... أشتريتو من ماركة سوب آند قلوري من بوتس و التاني مجانا ما جربتو لسة لكن فليك أوي رهيييييب سعرو ٧٥ ريال .
في كمان فرشتين وحده من ريل تكنيك ب ٨٥ ريال و التانية من فينتيج كوزماتيك ب ٧٠ ريال
و بكدة نكون خلصنا مشتريات بوتس .
من فكتوريا سيكريت أشتريت هادا العطر من زمان أشتريت منو نفس الريحة و خلصت كنت مرررة أحب الريحة مع إنو ثباتها مو مرة ثابت لانو بخاخ للجسم يعني خفيف لكن الريحة تجنن مرررة حلوة مرررة أي أحد يشم الريحة يشتريها
المهم فبعدين رحت فكتوريا سيكريت وأشتريت منو ٣ صورت ٢ بس من حبي فيه اشتريت كتير سعرو ٨٠ ريال الواحد و اسمو AQUA KISS .
المهم فبعدين رحت فكتوريا سيكريت وأشتريت منو ٣ صورت ٢ بس من حبي فيه اشتريت كتير سعرو ٨٠ ريال الواحد و اسمو AQUA KISS .
فاونديشن إنفيلابل المات أشتريتو من محل ما أداني فاتورة لكن عموما الفاونديشن حطيت منو كل أيام العيد حلو و ما يحتاج تثبتيه بباودر و مطفي و سهل في الدمج أعتقد إنو للبشرة الدهنية و أنا عشان كدة أشتريتو ، و من نفس المحل أشتريت رموش أرديل إسمها ناتشورال تلاقوها في أول صورة لإني أستخدمتها ماقدرت أصورها لحالها وكمان أشتريت معاها غرا duo .
هنا كمان أشتريت من نفس المحل الي ما أداني فاتورة روج مات من لايم كرايم مرررة حلو موف على نود ثباتو لاحظت إنو مو زي باقية الالوان الي أشتريتها من لايم كرايم زمان ، هادا اللون ثباتو مو مرة قوي يعني يتمسح مع الأكل مثلا بس اللون جميل جدا إسمو FADED .
أرواج نيكس المات سوفت كريم أشتريتها من سنتربوينت و صورتلكم أسماء الدرجات بالأرقام عشان تكون واضحة لكم الصراحة أحلى لون اللون العنابي الغامق مرة جميل أما اللونين التانيين رح أتكلملكم عنهم في الإنستقرام لإنو عندي كلام كتير عنهم سعر الواحد ٣٢ ريال .
كمان من أشياء الميك أب من سنتربوينت أشتريت برايمر أنفيلابل الماتيفاينق
بصراحة أنا لسة ما أستخدمتو فما أقدر أكتبلكم رأيي الا لمن أجربو أكيد .. سعرو حبايبي ٩١ ريال .
بصراحة أنا لسة ما أستخدمتو فما أقدر أكتبلكم رأيي الا لمن أجربو أكيد .. سعرو حبايبي ٩١ ريال .
أشتريت كمان من سنتربوينت منظمات واحد ينظملي يومي زي التودوليست الي هيا الكليب بورد والمنظم التاني نفس الشي بس بشكل مرتب أكثر يحتوي على خانات معينة ، الكليب بورد ب ٣٩ ريال و المنظم التاني ٣٤ ريال و أخيرا أشتريت ميدالية تنفع للمفاتيح وينفع تعلقيها في أي شي تاني سعرها ٢٩ ريال .
**********
و بكدة حبايبي تكون خلصت التدوينة لا تنسوا تحمسوني وتكتبولي تحت في الكومنت رأيكم وأنا حارد على كل وحدة فيكم و قولولي كمان إيش تبغوني أكتبلكم التدوينة الجيا ؟؟؟ مرة أحبكم و شكرا على قراءتكم و مع السلامة في تدوينة جديدة إن شاءالله .
مشترياتك حمستني أطلع أتسوق:( تتهني فيهم يارب
ردحذفياقلبي إنتي ان شاءالله تطلعي وتجيبي أحلى منها ياعسل شكرا :)
حذف