بسم الله الرحمن الرحيم
كيفكم حبايبي هادي أول تدوينة من وقت ما بدأت الإجازة وحشتوني قد البحر واليوم جيتكم بتدوينة رح أتكلم فيها من قلبي لإنو كان المفروض أنزلها من إبريل بس ما قدرت مع الدراسة والإختبارات و جا الوقت دحين إني أنزلها ... فيلا نبدأ :)
في يوم ٢ إبريل من السنة الي فاتت نزلت أول تدوينة في المدونة ما تتخيلوا قد إيش كنت مبسوطة لمن نزلتها وما كنت متوقعة أحد رح يقرأ مدونتي أبدا. كتير منكم يقول إنتي ليش فتحتي المدونة ؟؟ إللي شاف تدوينة (مين أنا؟) حيفهم أنا بأتكلم عن إيش ، السنة الي فاتت بداية ٢٠١٥ كانت نفسيتي مرة تعبانة كنت أحس إنو ماليا أي فايدة وضايعة صح إني أدرس في الجامعة والحمدلله كلو تمام بس دايما كنت أشوف إنو أنا ماليا فايدة وما كنت واثقة من نفسي أبدا من كل النواحي ما كنت واثقة من نفسي مع إني كنت إنسانة إيجابية مع الناس وصحباتي لكن دايما كنت أشوف إنو فيا شي ناقص لازم أطلعوا وبم إنو حياتي كانت يوتيوب ، جامعة ، نوم ، أكل ، مذاكرة ، كنت يوم من الأيام جالسة عاليوتيوب وشفت فديو لوحدة بلوقر وبعد كدة سرت أدور فديوهات في اليوتيوب عن إيش هوا ال blogging وكيف أفتح مدونة .
بعد كدة أخذت أيام أفكر أفتح مدونة أو لأ ، بعد كدة فتحت مدونة على الووردبريس ومرة حبيتها لكن شفت إنو الووردبريس محدود ولازم بعد كدة تدفعي فلوس عشان تقدري تستفيدي من كل الخدمات الي يقدمها ففكرت في بلوقر وفتحت في بلوقر المدونة الي إنتو فيها دحين ، في البداية كان إسمها غير عن الإسم الحالي بعد كدة غيرتو لإنو ما أعرف أرتحت أكثر لهادا الإسم وبدأت أشتغل على الديزاين البسيط حق المدونة جدا بسيط أنا بس عملت الهيدر والباقي كلو من نفس بلوقر وبدأت كتبت أول تدوينة كانت عن بي بي كريم قارنيه ، صورت التدوينة بجوالي ما كان عندي كاميرا أيامها ، من يومها وأنا كل تدوينة أنزلها من جد أنبسط وأحط كل قلبي عليها وفي كل تدوينة أحاول إنو أطور نفسي أكثر ولساعني بأتعلم واللي جي أكيد رح يكون أحلى .
كنتوا معايا في كل لحظة وفي كل تدوينة أنزلها والله لو وحده بس أستفادت من تدوينة أو قرأت تدوينة وحده من تدويناتي من جد أشكرها كل يوم ألف مرة ، ولكل وحدة كتبتلي كومنت الله يسعدكم أضعاف السعادة الي أديتوني هيا بذات الي كتبولي في تدوينة مين أنا ؟؟ لإني نزلتها في فترة من جد كنت أحتاج نصائحكم ، وهادي النصائح غيرت فيا الكثير وأدتني أمل فظيع الله يسعدكم مليون مرررة .
اليوم أكيد أنا سرت إنسانة غير الإنسانة الي كانت قبل سنة ضايعة ومهي عارفة إيش تبغا ، لإنو معاكم عرفت أنا إيش أبغا وعرفت إنو المدونة هادي أمانة ومسؤولية رح أتحاسب على كل كلمة بأعطيكم هيا سواء كانت نصائح أو ريفيو لمنتج معين كل كلمة أنا مسؤولة عليها عند ربي ومن البداية لمن جيت أعمل المدونة كان هدفي إني أدخل فيكم الأمل وأخلي كل بنت تحس إنها حلوة من جوا ومن برا وإنو مو إنتي لحالك إللي بتحس إنها زعلانة أو متضايقة أو وحيدة أو أيا كان الشعور اللي بتحسي فيه أنا دايما معاكم بكل شي يفيدكم من تدوينات من أخت من صديقة دايما حأحاول أتكلم عن الأشياء اللي إنتو تبغوها، لاتخجلي أبدا إنك تكلميني في السوشيال ميديا أنا هنا عشان أساعدك سواء كان ميك آب أو غير الميك أب لإنو أنا لولا الله ثم إنتو كان أنا لين دحين ضايعة ، إن شاء الله حتستمر المدونة وتكون المحل الي تلاقوا فيه سعادتكم الله يسعدكم كل وحدة دحين جالسة تقرأ أنا أقلّك الله يسعدك ويحميكي لإنو إنتي إن شاءالله في المستقبل حتكوني شي كبير الله يسعدكم حبيباتي مرة تانية .
عندي فكرة لكم كل وحده تقرأ هادي التدوينة تكتب أمنية نفسها تحققها هادي السنة وإن شاءالله السنة الجية نفس هلدا الوقت في رمضان تشوف اذا أتحققت أو لأ ، أو أكتبي شي نفسك تغيريه في نفسك وخلونا نحمس ونشجع بعض :) أحبكم مليون مررررة وإن شاء الله أشوفكم في تدوينة الجية ومع السلامة .
0 التعليقات:
إرسال تعليق