بسم الله الرحمن الرحيم
طيب اليوم حبايبي جيتكم بتدوينة جديدة من زمان كنت أبغا أنزلها وصورتها أكثر من مرة ، التدوينة حتتكلم عن أرواج تووفيسد ميلتيد مات ليبستيكس بدون ما أطول عليكم وتطفشوا مني يلا نبدأ :)
FIG
هادا اللون من رأيي من أحلى الألوان في المجموعة جدًا جميل وينفع للصباح وللمناسبات ، أنا عن نفسي أحب أحطو لمن أوروح الجامعة مرة أحبو ثباتو بالنسبالي مو مرة ثابت يعني ممكن يجلس ٣ ساعات لو أكلت ممكن يختفي بس أنا عن نفسي ما يفرق معايا لإنو لمن أحط الأرواج دايما أطفش منها فأمسحها ولو أبغا الروج عليا فترة طويلة آخدو معايا في الشنطة يسير أول ما يبدأ يختفي أحط منو ثاني ، لاحظت إنو لو قبل ما أحطو أحدد شفايفي بقلم شفايف وبعد كدة أحطو يفضل فترة أطول .
FIG لون رهيب زي ماقلت من الألوان الي أحس إنو يفرق من بنت لبنت حسب لون البشرة يعني البيضا ممكن يبان عليها نود مايل عالبني أما الحنطيين والسمر يبان عليهم نود مايل عالموف مع شوية بني اللون ما أقدر أوصفو بس هوا يعتبر نود بني على موف اللون عملي وينفع لكل الأوقات .
تقييمي : ٥/٤.٥
VIOLET
نروح لي اللون التاني VIOLET من الألوان الي حبيتها لإنو موف فاقع شوية بس ما أحب أحطو في الجامعة هوا ينفع بس أنا ما حبيتو للجامعة حلو لو مثلا عندك طلعة زي كدة وطبعا كل الكلام الي قلتو على اللون الي قبل تنطبق على هادا اللون .
من العيوب الموجودة في اللونين إنو يقشرو الشفايف لمن تحطيهم بعدها بساعة تبدأ تظهر زي القشور من نفس الروج جدا ما تعجبني اللون يكلكع ويقشر من عند ما الشفايف تتقفل على بعض ان شاءالله يكون وصفي واضح يعني لمن تتكلمو تكون واضحة الا إنكم تمسحوا اللون وترجعو تحطوا من اللون تاني فعشان كدة لازم قبل ما تحطوا اللون قشروا شفايفكم وحطوا مرطب شفايف عشان تهيّؤو شفايفكم للرّوج ومايقشرلكم شفايفكم .
تقييمي : ٥/٤
SWATCHES
وأخيرا حبايبي أتمنى التدوينة تكون عجبتكم وزي دايما لا تنسوا تدوني آرائكم في الكومنت وتضيفوني في السوشيال ميديا لو حابين شكرًا حبايبي وان شاءالله أشوفكم في تدوينة تانية .
0 التعليقات:
إرسال تعليق