RIVIEW | GARNIER FACE WASH PRODUCT !!!!

  بسم الله الرحمن الرحيم  

السلام عليكم حبايبي إيش أخباركم بمعنى الكلمة وحشتوني اليوم جياكم بتدوينة خفيفة عن رأيي لبعض من منتجات غارنيه

للعناية بالبشرة يلا نبدأ :)

  DAILY GEL WASH  

طيب أول غسول حأتكلم عنو هوا هادا الغسول من مجموعة PURE ACTIVE وهوا عبارة عن غسول يومي من مميزاتو بالنسبالي إنو خفيف عالبشرة جدًا ما يجفف البشرة بس أنا عن نفسي دائما أي غسول أستخدمو لازم أرطب بعدو وجهي ، ما حسيت بفرق كبير في بشرتي بعد ما استخدمتو سرلي ترا فترة طويلة أستخدمو بس ما أحط كتير عشان كدة لساعو مليان لكن في نفس الوقت كغسول يومي يعتبر جدا جميل ما يحسّس البشرة وهادي خاصية دايمًا تكون مو موجودة في أي غسول كنت أستخدمو من قبل ، زي مثلا نيتروجينا عندهم غسول القريب فروت حسّسلي بشرتي جدًا وعملّي تصبغات وحساسية مع إنو كنت أشوف مدح كبير عليه لكن طلع ما يستاهل و لمّن جرّبت منتجات غارنيه من جد حبيتها لإنها ناسبت بشرتي ... هادا الغسول للبشرة الدهنية وأنا بشرتي دهنية لكن في نفس الوقت تتحسّس بسرعة من أقل شي رح أتكلملكم عن غسول تاني من غارنيه جدًا رهيب في تدوينة لحالها لإنو هاداك الغسول عالج لي التصبّغات الي جاتني من غسول نيتروجينا لازم أتكلملكم عنو في تدوينة لحالها ... عموما هادا الغسول جميل للإستخدام اليومي وخفيف ورخيص سعرو ما يعدي ٥٠ ريال تقيمي للمنتج : ٥/٣.٥

  DAILY GEL SCRUB  

طيب نجي للمقشر اليومي من نفس المجموعة الغسول ما أستخدموا الا مرة وحدة في الأسبوع هوا صح مكتوب إنو مقشر يومي لكن حتى لو كان يومي رح يتعّب البشرة ويدمّرها أي مقشّر سواء كان خفيف أو ثقيل لا تستخدميه إلا مرة أو مرتين فقط في الأسبوع ... بالنسبة لي دا الغسول يعتبر غسول عادي ما حسيت بفرق ، لكن برضو يعتبر مقشر خفيف لا حبيتو مرة و لا كرهتو الغسول العادي الي قبل أكيد حأرجع أشتريه لكن المقشر حأخلص الي عندي وحأجرب ماركات تانية وأشوف ناسبوني أو لأ لإنو هادا المقشر زي ماقلتلكم كان عادي جدًا مع إني بأستخدمو من فترة لكن الشي الحلو إنو ما حسّسلي بشرتي وهادي الخاصية لقيتها في أغلب منتجات غارنيه ، برضو رخيص ما يتعدا ٥٠ ريال تلاقوهم الإتنين في أي سبرماركت وأي صيدلية تقيمي للمنتج : ٥/٢.٥

وبس حبايبي هادي كانت تدوينة اليوم إلي أبغا أقولو أخيرًا إنو منتجات البشرة والعناية بالذات ممكن تناسبني لكن ما تناسبك زي ما قلتلكم على نيتروجينا أغلب الناس يمدحوه لكن عن نفسي أبدًا ما ناسبني فجرّبوا بنفسكم كل شي قبل ما تشترو وجربوا على نفسكم لإنو ممكن يناسبكم وممكن لأ ولازم أكيد تكوني عارفة نوع بشرتك هادا شي ضروري أكيد سواء كان للميك اب أو العناية .

أتمنى تكونوا أستمتعتوا لاتنسوا تضيفوني في السوشيال ميديا موجودة الروابط في الصفحة الرئيسية للمدونة وأدوني رأيكم تحت في الكومنت مع إقتراحاتكم لتدوينات جديدة تبغوها أحبكم ومع السلامة .

1 comment CARE PRODUCT