بسم الله الرحمن الرحيم
كيفكم حباااايبي السلام عليكم إيش عاملين قولولي ؟؟ الفترة الي فاتت غبت عليكم مع اختباراتي والحمدلله خلصت واليوم إن شاء الله جياكم بتدوينة بعيدة عن الميك أب حتكون عن ....... ؟؟؟ الطبخ حأعملكم وصفة الباستا حقتي كل أهلي يحبوها مني مع إنها مرررة سهلة بدون ما أطول عليكم يلااااا بسرررعة حضروا ورقة وقلم لإنو حبدأ ^^ !!
المقادير
- مكرونة
- دجاج صدور
- كريمة خفق
- بصلة وسط
- أربع فصوص ثوم
- مرقة ماجي قليلة الملح
- فلفل رومي
- مشروم
ـ ملح
ـ فلفل أسود
ـ كمون
ـ كركم
ـ بهارات الأوريغانو
- بهارات ايطالية
- جبنة موزيريلا
الطريقة
أول شي قطعوا كل شي الدجاج (مكعبات صغيرة) ، الفلفل الرومي ، البصل والثوم ممكن تقطعوهم بس أنا أحبهم مفرومين في الفرامة .
بعد كدة تجيبو طاوة تكون شوية غويطة عشان الخلطة و عشان بعدين حنحط المكرونة مع الخلطة بعد ما تتسلق ، و جيبو قدر تسلُقوا فيه المكرونة ... السلق يكون بإنكم تحطوا في القدر موية وزيت وشوية ملح عشان ما تعجن المكرونة .
طيب في نفس وقت ما بتكونوا تسلقوا المكرونة جيبو الطاوة حطوا فيها زيت الين ما يحمى بعدين حطوا البصل والثوم على نار عالية الين ما يصير لون البصل ذهبي بعد كدة حطو الدجاج شوفو الدجاج لازم تصبروا عليه إلين ما يستوي الأكل عموماً يحتاج إنكم تخلوه عالنار عشان يستوي .... بعد ما يبدأ يستوي الدجاج حطوا الفلفل الرومي ومرجة ماجي والمشروم وقلبوهم كلهم مع بعض .
بعد كدة جيبو البهارات الفلفل الاسود وشوية ملح انتبهوا تكثروا ملح لانو مرجة ماجي فيها ملح ، الكمون ، الكركم ، البهارات الايطالية ، و بهارات الأوريغانو حطوهم عالخلطة حوالي ملعقة شاي صغيرة المقدار لو ما تعرفوا بالنظر، لكن البهارات الإيطالية والأوريغانو حطوا قد ما تبغوا .
بعد كدة خلوهم على نار هادية وغطوا عليهم في هادا الوقت شوفوا المكرونة المفروض تكون أستوت صفّوا المكرونة على جنب وبعد كدة حطوا عالطاوة حقتنا الكريمة و جبنة الموزيريلا و علطول حطوا المكرونة وقفلوا النار بعد كدة قلبوا المكرونة مع الخلطة و تقدروا تزودوا كريمة عادي و النار مطفية بعد ما توصلو للكمية الي تبغوها من الكريمة غطوا الطاوة وهيا تتسبك على نار العين نفسها لإنها حتكون حامية أساسا من قبل و بس بالعافية ليش قلتلكم قفلوا النار بسرعة عشان ما ابغا الكريمة تثقل عليا لا تحطوا الكريمة إلا و إنتو متأكدين إنو النار هادية و إنو المكرونة جاهزة جنبكم عشان أول ما تحطوا الكريمة تحطوا المكرونة سريع وتقفلوا النار بكدة تكون الكريمة سايلة وما تكون ثقيلة بس بعد كدة قدموها وخلاص بالعافية على قلبكم حبايبي الوصفة مرة سهلة وأكيد مين مايحب الباستا .
طيب حبايبي بكدة نكون وصلنا لنهاية التدوينة أتمنى إنكم تكونوا فهمتوا عليا لإنو كنت بأتكلم بالعامية حسيت إنو لو أتكلمت بالفصحة ما حأعرف أوصّل المعلومة فيارب تكون سهلة وخفيفة عليكم حبايبي أدوني آرائكم تحت في الكومنت وضيفوني في السوشيال ميديا لو حابين تلاقوا الروابط في صفحة المدونة الرئيسية ومع السلامة .
0 التعليقات:
إرسال تعليق