بسم الله الرحمن الرحيم
* السنة التحضيرية :
هادي السنة من أحلى السنين الي في حياتي لإني أستغليتها أول ما حتدخلي السنة التحضيرية حتكوني تايهة مرررة عادي حاولي إنك تروحي من أول يوم بيدك جدولك وروحي الكلاسات الي عندك فيها محاضرات لو ما عرفتي فين المبنى أسألي لإنو بذات في السنة التحضيرية انتي المسؤولة عن نفسك محد حيقلك تعالي عالمبنى الفلاني ترا عندك محاضرة لازم تعتمدي على نفسك في كل شي حاولي تتكلمي مع البنات الي معاكي في الكلاس لإنو أحيانا البنات ممكن يساعدوكي في أشياء فلا تكوني لحالك وفي نفس الوقت لا تخلي علاقتك مع البنات مرة قوية بحيث إنو لو البنت هادي مشيت من جنبك ولا كإنها عارفتك تحسي إنو الدنيا وقفت عندها ، لا تسيبي أو تطنشي المحاضرات لإنو لو ما حضرتي حتجي المحاضرات الي بعد كدة تلاقي نفسك تايهة ولا إنتي عارفة شي ، لا تستهيني بهادي السنة لإنها هيا السنة الي حتبني مستقبلك كلو ، لكل شي وقتو اللعب لو وقت والدراسة ليها وقت ذاكري أول بأول ما بأقلك كل يوم تعالي ذاكري بس المادة الي تحسيها صعبة شوية ذاكريها يوم بيومو أما المواد التانية ممكن تذاكريها كل نهاية أسبوع النصيحة المهمة الي أبغا أقولها لا تحاولي تقلدي البنات في طريقة المذاكرة في بعضهم ياخدو ملخصات ما يعجبهم مرجع الدكتورة أو الاستاذة لا تقلدي أحد شوفي انتي إيش يريحك وذاكري بطريقتك سيبيكي من كلام البنات وانتبهي على نفسك ، لا تعملي مشاكل لو شفتي بنات غريبين في الشكل او في طريقة الكلام بعدي عنهم ولو شفتي مثلا بنات ضحكوا عليكي أتكلمو عليكي سيبيكي منهم ولا تخليهم يهزوكي خليكي قوية بأدب وإحترام أتبعي كل قوانين الجامعة في اللبس لا تلبسي أي شي ممنوع ، آخر شي أبغا أقلك هوا عيشي حياتك وأنبسطي بكل لحظة طالما إنتي بتذاكري وبتعملي الي عليكي أنبسطي وعيشي كل لحظة في السنة هادي لانها أحلى سنة من جد .
* اختيار التخصص وتحديد الرغبات :
في هادي النقطة إنتي لازم تكوني تعرفي إيش ميولك لااااازززم تعرفي نفسك .. أجلسي مع نفسك وقولي أنا إيش أبغا أكون في المستقبل ؟؟ وحاولي تدوري على الجواب وأكيد حتلاقيه في كتييير بنات يقولوا طيب انا ما عندي ميول ؟ لا عندك بس انتي يمكن ما جلستي مع نفسك جلسة مصارحة وعرفتي نفسك وترا انا زيكم أقول نفس الشي إلين ما عرفت نفسي .
لا تسمعي كلام أحد خدي آراء أهلك لكن في نفس الوقت خلي عندك رأيك في النهاية وأدخلي الشي الي إنتي تبغيه لإنو لو ما دخلتي الشي الي تبغيه حتفضلي طول عمرك ما تحبي شغلك وما عندك شغف إنك تدرسي ، أو إنك بتدرسي بس علشان تمشي وخلاص وهادا الشي أكبر غلط خلي عندك رأيك لا تسمعي كلام الناس خليكي قوية وخلي عندك طموح وحطي فبالك انو كلام الناس فترة ومصيرهم الناس يتلهو في حياتهم وينسوكي علشان كدة كوني ملكة نفسك عندك أحلام وأهداف تشتغلي عليها .
* تنظيم الوقت / وطريقة المذاكرة :
تنظيم الوقت من الأشياء الي مرة مهمة ولااازم تركزوا معايا ، كل وحدة فينا تختلف عن التانية من ناحية الطرق الي تريحها في تنظيم وقتها بس لازم تكتبي إنتي الأشياء الي تبغي تسويها في يومك من قبل يعني ما تجي اليوم تكتبي إنتي إيش تبغي تسوي لإنو حتلاقي نفسك كتبتيها من هنا ولا عملتي شي من الي كتبتيه حاولي تكتبي إنتي ايش تبغي تسوي في يومك من قبل يعني فالنفرض أنا عندي أشياء كتيرة أبغا أسويها بكرة مثلا عندي مذاكرة ، أسوي أشياء معينة للجامعة ، أخرج مع أختي ، موعد دكتور ، قراءة كتاب ، أعمل رياضة ، وقيسو إنتو عاد كل وحدة فينا إيش تبغا تسوي بكرة في هادي الحالة أنا ما أقدر أسوي كل هادي الأشياء بدون ما أكتبها حسب الأولويات ومستحيل حأقدر أعمل كل دي الأشياء لو كتبتها في نفس اليوم الي أبغا أعملهم فيه لازم أكتبها قبلها بيوم عالأقل و بكده إنتي أول ما حتصحي الصباح حتتحمسي تشوفي إنتي إيش كاتبه سواء كان في جوالك فيه تطبيقات كتير لتنظيم الوقت أو مثلا بلانر الي هوا دفتر مخصص لتنظيم الوقت فبمجرد ما تقري إنتي إيش مخططة من قبل من لحالك حتتحمسي تنجزي وتعملي الخطط والأهداف الي تبغي تعمليها في يومك .
في ناس ما يحبو يكتبوا يحبو يخططوا بعقلهم هما إيش يبغو يعملوا أنا من هادا النوع لكن حسيت إنو أنا أحيانا أنسى الأشياء الي كنت أبغا أسويها علشان كدة أنا أفضل الأجندة أو البلانر لتنظيم الوقت .
بنات حبايبي والله أنا السنة الي فاتت حسيت بقيمة الوقت لإنو كنت أضيعو في كلام فاضي أنا أبدا ما أحط العيب في المجتمع أو في المدرسة أو الجامعة و أقول هما ما علمونا كيف ننظم وقتنا أنا أحط العيب فينا نحنا لإنو نحنا إلي لازم نتعلم ما نضيع وقتنا في الفاضي والمليان أعملي الأشياء الضرورية عليكي وبعدين فكري في الجوال والإنترنت والإنستقرام وسناب شات حاولي تحطي حد للتكنولوجيا والجوال لإنو من جد نحنا وصلنا لمرحلة الإدمان هادا ونحنا لسة صغار كيف الجيل الجديد إيش حيسير فيهم لمن يوصلو لعمر المراهقة أو يدخلو الجامعة لو ما علمناهم من بدري إنو كل شي له حد حنتعب في حياتنا مرة كتير خلو دائما دراستكم هيا أول شي لا تبدو الجوال على مذاكرتك لإنو جوالك ما حيفيدك في الإختبار لمن ما تعرفي تحلي ، هادي نصيحة مني حبيباتي لإنو من جد أنا زيكم أحيانا أتوه في عالم الإنترنت وسناب شات والخ لكن شفت إنو حياتي سارت ضايعة مني عارفة كيف أرتب وقتي مني عارفة أخلي وقت لشغلي وللجامعة وللدراسة ووقت لنفسي كمان ، فلمن تفكري فيها تقولي طيب أنا ليش ما أشتغل على نفسي وأنتبه على مستقبلي وطموحي بدل ما أضيع كل وقتي على أشياء مالها داعي دايما أتذكري إنو إنتي الي حتبني مستقبلك وإنتي الي حتوصليلو لا تستني أحد معين يبنيلك هوا لإنو ما حتلاقي أحد يساعدك إلا إنتي وهادي هيا الحياة نبدأ بالمدرسة نجيب معدل عالي علشان نفرح اهلنا لكن أول شي علشان انتو تدخلوا التخصص الي تبغوه بدون ما تحتاجوا مساعدات خارجية ولمن تدخلوا التخصص في الجامعة لازم تجيبوا معدل عالي وتفهموا علشان تلاقوا شغل وتقدروا تعتمدوا على نفسكم وما تحتاجوا أحد .
كده دايما فكروا دائما خلو الدراسة رقم واحد بعدين كلو يجي خلي فيه اتزان في حياتك مو كلها لعب ولا كلها دراسة نظمي وقتك وإنتي حتلاقي حياتك سارت أسهل .
* طريقة المذاكرة :
طيب نجي للشي المهم هنا هوا إنو نحنا نظمنا وقتنا لكن لقينا إنو لمن جينا نذاكر محنا عارفين الطريقة الصح للمذاكرة أنا حاقلكم طريقتي وبعدين حاجبلكم طرق تانية كمان ، أول شي لمن أجي أزاكر لازم تكون معايا موية لإنو أنا أحب لمن أذاكر أتكلم بصوتي لإنو في الجامعة تخصصي أغلبو حفظ بس حتى لمن كنت في المدرسة في الرياضيات وكدة كانت عندي سبورة صغيرة أكتب عليها القوانين وأحل عليها وكمان كنت أتكلم بصوت عالي هههه ولين دحين أنا كدة وعندي كمان عادة إنو ما أقدر أحفظ إلا لمن أمشي وهادا الشي برضو أتعودت عليه من الزمان لمن أتكلم بصوتي أحس إنو المعلومة بأسمعها فتثبت صح إني بطيئة في المذاكرة لكن المعلومة تثبت والمشي ما أعرف أحس إنو لو قعدت حأنام علطول أو أمسك الجوال فأمشي ويكون الكتاب معايا، مواد الفهم ورقة وقلم أو سبورة إيوة سبورة !!!! ترا والله جدا رائعة في المذاكرة ، وطبعا لازم أكون في مكان هادي أنا أرتاح أكثر في غرفتي أو لو كنت في الجامعة دايما أذاكر في المكتبة مرة هادية وتنفع للمذاكرة دايما أروحها مرة أحبها لو طفشتي روحي أمشي برة في الحوش وخدي كتابك معاكي كلي شي فيلو سكر علشان تاخدي طاقة روحي البلكونة الي في البيت شوفي الناس لو كنتي في الجامعة أجلسي في الساحة برة شوفي الناس زي كدة لمن تذاكري لا تفكري إنو إنتي بتذاكري علشان علامات فكري إنو أنا هادي المادة بأقراها علشان أستفيد وإنتي حتحسي بفرق في مذاكرتك .
دايما حطي في بالك هادي العبارة
وأبدا لا تأجلي عمل اليوم لبكرة مو بس في المذاكرة في كل شي يخص حياتك
* صور مرة حتفيدكم :
- LAURDIY
https://www.youtube.com/watch?v=LTZonruJ_z4
- ALISHA MARIE
https://www.youtube.com/watch?v=szyM2gecxwU
ومن هنا أقلكم حبايبي إنشاءالله ربي يوفقكم في السنة الجديدة إنشاءالله تكونوا دايما الأفضل لا تنسوا حبايبي تضيفوني في كل السوشيال ميديا الروابط في المدونة يارب تكونوا أستفدتوا ولا تحرموني من تعليقاتكم الجميلة تحت في الكومنت أشوفكم حبايبي في تدوينة جديدة ومع السلامة .
0 التعليقات:
إرسال تعليق