السعادة بداخلي !

السلام عليكم ورحمة الله

حبايب قلبي كيفكم من جد وحشتوني بعد غيبة الدراسة ، لكن المرة دي توبة أسيبكم حأرجع تاني لنظامي تدوينتين في الأسبوع أشكر كل شخص فتح التدوينة وقريها أحبكم من القلب وبدون ما أطول عليكم يلا نبدأ ...

طيب من العنوان أكيد قلتو ايش السعادة بداخلي ؟ إيش الحكاية بالزبط ؟ طيب إذا تبغو تعرفو ليش انا اخترت عنوان  التدوينة (السعادة بداخلي)؟؟ في نهاية التدوينة إنتو من لحالكم حتعرفوا ليش ...

السعادة في نظري هيا لحظات جميلة من خلالها الشخص يحس من جوه إنو مبسوط هادي اللحظات الجميلة تجي إما فجأة أو أنا أصنعها بنفسي وأنا من هنا أقلكم إيوة تقدروا تصنعوها بنفسكم مهما كانت الظروف .

إيوة نحنا حنكون مبسوطين ...تعرفوا قد إيش هادي الجملة مهمة والله لو كنتي مؤمنة إنو الله حيخليكي مبسوطة مهما كانت ظروفك حتكوني مبسوطة مجرد إقتناعك بفكرة إنو إيوة أنا أقدر أصنع سعادتي بنفسي عمرك ما حتكوني طفشانة ، حتى لو كنتي محبوسة بين أربعة جدران حتقدري تبسطي نفسك .

شوفو نحنا أكيد بنمر بظروف صعبة علينا وهادا طبيعي أبدا لا تتشاءمي على قدر ربنا خلي أملك بربنا قوي كل ما أبتلى الله عبد من عباده كل ما كان ربنا بيشوف قد إيش حنصبر ؟ وهل حنقدر نصبر أو لأ ؟

أدي نفسك فرصة إنك تزعلي وإنك تبكي لكن بعد كدة أرجعي بكل قوتك وقولي مافي شي ممكن يكسرني وحاولي تمحي الأفكار السيئة الي في حياتك بأفكار إيجابية .

في كتير ناس فقدوا أمهاتهم ،أاولادهم ، أهلهم ، شغلهم هادول إيش حيسوو؟ إلا إنهم يوكلو أمرهم لله ويدعو ربنا في نفس الوقت يكملو حياتهم وما يوقفو أبدا.....قولو الحمدلله مهما كانت ظروفكم قولو الحمدلله في كل وقت وأتذكري إنو أكيد فيه ناس أسوء من حالك وعايشين لإنو إيمانهم بالله قوي وهادا هوا الشي الي يميز المسلم .

طيب ....هل السعادة كل شي ؟؟؟ لأ بالنسبالي مهي كل شي لكن لو دخلنا السعادة في كل شي في حياتنا حتكون حياتنا أحسن وأسهل مابأقلكم حتكون ممتازة لكن بأقول نوعا ما أفضل أديكم مثال :

في مجال العمل أو الدراسة لو إنتي حبيتي عملك وحاولتي تدوري على أشياء تسعدك في عملك  حتى لو كان هادا العمل مو العمل المثالي بالنسبالك حيكون أداءك أحسن مئة مرة من الشخص الي كرهان شغلو ومتشائم طول الوقت نفس الشي في الدراسة لو إنتي عندك مادة منتي طايقتها حاولي تحبيها بأي طريقة كل ما حبيتيها كل ما سار أدائك أحسن وقيسي عليها أي مواقف تانية .

طيب دحين حأقلكم أشياء لو عملتها مزاجي يتغير ١٨٠ درجة :

١-الصلاة وقراءة القرآن أنا أكيد مني كاملة وأكيد أحيانا بأقصر لكن لازم الشخص يرجع لربنا تاني علشان يكون أفضل ويتوفق من عند ربنا .

٢-رضا أمي  وأبويه عني مجرد ماأشوفهم مبسوطين كل شي يروح وأسير مبسوطة الله لا يغير عليهم يارب ولا يغير عليكم يارب.... لا تنامو وأهلكم زعلانين منكم بالزات الأم .

٣-لمن أكون زعلانة أحب أعمل أشياء أحبها أجلس عاليوتيوب ، الجوال ، أقرأ تدوينات بلوقرز أحبهم ، أعمل شوبنق  ، أشتري ميك أب أجلس أمكيج نفسي .

٤-لمن أكون متضايقة دايما آخد شاور أحس إنو كل الافكار السلبيه تنزل مع الموية هههه جربوها والله حتحسوا بفرق .

٥-كلموا شخص قريب منكم انا بالنسبالي صحباتي المقربين دايما ألجألهم لمن أكون متضايقة .

٦-أجرب شي جديد يعني مثلا لو انا ما أعرف أطبخ أروح أتعلم أطبخ أي شي جديد سويه وإنتي حتحسي بسعادة 

وإنجاز .

٧-ألهي نفسك بأي شي نظفي غرفتك مثلا هههه حتى لو كنتي مغصوبة بس إسمك عملتي شي .

٨-لو كان عندك أخو صغير في البيت أو أخت أو أي كائن صغير في البيت أجلسي معاه أو ألعبي معاه وإنتي حتنبسطي صدقيني .

٩-أقرئي عبارات تحفزك وتخلي مودك أحسن تلاقيها كتير في tumblr أو twitter .

١٠-أضحكي ، أبتسمي ترا والله مو مستاهلة الدنيا دي .

السعادة حبايبي تعكس جمالكم كل ما كنتي متفائلة ومبسوطة حتباني أحلى في عيون الناس والناس حتتقرب منك أكتر أنا مثلا أكره الناس المتشائمة أبعد عنهم علطول لإنو بصراحة مني محتاجة ناس سلبية في حياتي وأبعد عالناس إلي ما تعطيني أي قيمة خلوكم دايما مرفوع راسكم مهما سار الفشل مو آخر الدنيا كلنا نقدر نغير المجتمع ونقدر نضيف مافي أحد أحسن منك كوني ملكة نفسك لاتربطي سعادتك بشخص ما يستاهلك ولا تحتقري قدراتك أبدا .

أنا مني مثالية أبدا...عندي أخطاء وبأمر بمشاكل لكن بأحاول أكون إيجابية ، دائما قولو إلي كتبو ربنا حيسير .

وترا أنا مني متفائلة طول الوقت ، لكن بأحاول أنظر للدنيا من منظور تاني قد ما أقدر أبغاكم تكونو مبسوطييين لا تزعلوا 

أضحكوا يلا أشوف هههههه ، خلو الله شعاركم والسعادة روحكم وإنتو حتلاقو ربنا معاكم وحياتكم سارت أسهل ، أكيد عرفتو دحين ليش أخترت العنوان السعادة بداخلي صح .

آخر شي أبغا أقولو إذا حبيتو تدوينتي أو عالأقل طلعتو بفائدة وحده أدعولي محتاجة دعاكم والله أنشروا هادا البوست لأي شخص متضايق أوحاسس نفسو محتاج شي يديلو أمل مرة تانية ، حاولو تنشروها مو عشاني علشان يمكن يكون فيه شخص محتاجها .

الله يسعدكم فين ما كنتو مهما كنتو ربي معاكم حبايبي ولا حيسيبكم .

قولو إلي تبغوه في الكومنت تحت وضيفوني في السوشيال ميديا الروابط في البلوق وأشوفكم إنشاء الله في تدوينة جديدة .

3 comments LIFESTYLE