كيفكم حباااااايبي من جد مرة متحمسة لأول تدوينة ليا في المدونة
طيب خلونا نبدأ >> اليوم حأتكلم معاكم عن bb cream garnier وبالتحديد الطويل مو الصغير لإنو الصغير صراحةً كان جدًا سيء لو تبغوني أتكلم عنو في تدوينة لحال قولولي >> دحين حاحطلكم صورة الي حاتكلم عنو دحين :)
هادا البيبي كريم وقعت في غرااااامه أولا لانو تغطيتو جدًا طبيعية زيادة على كدة التغطية تقريبًا متوسطة يعني لو حطيتي طبقة وحده ممكن ما يغطي كل العيوب لكن لو زودتي الطبقات تزيد تغطيتو فممكن لو حابة تغطية كاملة تستخدمي كنسيلر بس من جد مرة رائع وخفيف عالبشرة طبعًا زي مو مكتوب عليه هوا للبشرة المختلطة للدهنية فناسبني لإنو أنا بشرتي دهنية لكن في نفس الوقت أتحسَّس من أي شي ما يناسبني . مناسب للإستخدام اليومي يعني لو رايحة جامعة ، دوام ، عزومة صغيرة حيصلحلك أكيد الدرجات لايت و ميديم انا أخدت الميديم مع إنو أفتح بشوية من بشرتي .
أي حاجة زي ما لها مميزات لها عيوب وهادا البيبي كريم له عيوب صغيرة أول شي لمن تفكيه نفس التيوب حقو إلي يطلِّع البرودكت معمول إنو مثلا لو ضغطتي بقوة ممكن ينزل منو كتير أو إنك لمن تجي تفتحيه خصوصا لو إنتي أساسا كنتي موقفاه زي الصورة الأولى حتلاقي أول ماتفكي الغطا كلو سايح حولين التيوب الي يضخ البرودكت على برَّه فلازم تنتبهو بس في دي النقطة وهادي صورة توضحلكم حاولت أشرح قد ما أقدر إن شاءالله تكون وصلت الفكرة :) .
شفتو كيف علشان كدة أنا حاطّه تحتو منديل علشان ماينقِّط ويوسِّخ الدنيا ههه :) >> العيب التاني إنو مافيلو إس بي إف يعني ما يحمي من الشمس بس عادي تقدري قبل ما تحطيه تستخدمي أي كريم مرطب يكون فيلو إس بي إف .تلاقوه في السبرماركت او الصيدليات والسعر في حدود التلاتين ريال مني متأكدة مرة من السعر لكن ما حيوصل الأربعين ريال أكيد .في النهاية حابة أقلكم مررررة شكرا لكل الي تعبت وقرأت البوست وكمان لازم تعرفو أي منتج حأتكلم عنو حيكون عن تجربتي الشخصية بكل مصداقية من الأسبوع الجي إن شاءالله حأكتب تدوينتين وحيمشي الموضوع كدة علطول إن شاءالله إذا ربَّنا أراد آتمنى أكون ما طولت عليكم وكنت خفيفة أكتبولي إقتراحاتكم وأسئلتكم في الكومنت وضيفوني عالسوشيال ميديا لو تبغو تتعرفو عليا أكتر وإن شاء الله حأرد على كل وحده فيكم مع السلامة حبايبي .
0 التعليقات:
إرسال تعليق