بسم الله الرحمن الرحيم
كيفكم حبايبي وحشتوني 💕 قد البحر أنا جدا مبسوطة إني رجعتلكم بهادي التدوينة بالتحديد لإني حرفيا الفترة الي فاتت ولازلت بأمر بمرحلة إحباط وحزن تخص طموحي وأهدافي الي نفسي أوصلها لكن مني عارفة من فين أبدأ ؟ هادا طبعا موضوع ثاني حكلمكم فيه فتدوينة منفصلة.. مصاحب لهادا كلو يبدأ الإحباط والحزن 😩 وأحيانا أحس إنو مهما سويت ما بأوصل للي أبغاه وأبدأ أزعل وبدل ما أشجع نفسي أحبط نفسي أكثر وهذا أكبر غلط🙅🏻♀️.
طبعا كل ما أحس إني بدأت أدخل في هادي المرحلة ! على طول 🏃🏻♀️ فيه كم شيء أسويه يخرّجني من مود الكآبة والحزن وأكيد كل واحد مننا بيمر بسيناريو مختلف عني وحزنه مختلف عني كل واحد مننا له قصته ولكن أنا بأقلكم المرحلة الي بأمر بيها حاليا وكيف حأخرّج نفسي منها😃 .. إن شاء الله هادي الخطوات البسيطة تغير مودكم ولو ١٪ وأكيد صدقوني مافي مشكله الا ولها حل والشيء الي مانقدر نحله نوكله على الله وربي ما حيخيّب ظننا به ان شاء الله يلا نبدأ 💪🏼 ...
١- أتقرب من الله 😍
كثير مننا بينسى إنه يتقرب من الله أكثر وإنه يشكي لله همومه يمكن أحيانا بنقصر أو بنتهاون وهادا حال الإنسان لكن صدقوني لمن تتقربوا لله تحسوا كدة إنو مهما سار الله معاكم ومهما كانت همومك كبيرة في رب حيدبّر وييسّر أموركم .. التقرب لله يكون بالصلاة طبعا وبقراءة القرآن بالصدقة والدعاء دااااااائما أدعوا الله 🤲🏼 بكل شيء تبغوه وبكل صغيرة وكبيرة في حياتكم مثلا إذا فقدتوا شخص قريب منكم لاسمح الله ومابيدكم شيء تسووه أستغفروا الله وأدعوا للشخص الي فقدتوه لإنه بكدة إنتوا بتريحوه عند ربي دائما الدعاء مهم وحال الإنسان ضعيف ومهما شغلتنا الحياة مالنا الا الله كل الناس الي حولنا ممكن يجي يوم ويروحوا ويختفوا من حياتنا لكن إيش الي يبقى؟ وجه الله الكريم .. أنا بأنصح نفسي هادا الكلام قبل ما أنصحكم وأقلكم أغتنموا الفرصة الدنيا قصيرة أتقرّبوا لله بأي شكل من الأشكال وكلموه لإنه هو وحده الي عالم بلي في قلوبكم الله ييسر أموركم يارب❤️ .
٢- أقضّي وقت مع أهلي 💕
أهلي أحس معاهم بالأمان الله يحفظهم ويحفظلكم أهاليكم يارب، لمن أكون مهمومة تعبانة أو متضايقة من أي موضوع دائما وأبدا أروح لأهلي💕 أقعد معاهم أتكلم معاهم حتى لو ما أشتكيتلّهم همّي جلوسي معاهم وإني قضّيت بعض الوقت معاهم هادي بحد ذاتها تخليني مبسوووطة وتحسسني إنو الدنيا حلوة ومافي شي حيزعلني 🥹 لإنهم معايا بعد الله.
نحنا يمكن أحيانا ننشغل بالجوال والسوشيال ميديا عن إننا نقعد مع أهلنا وأنا أولكم مع إنه صدّقوني كل لحظة تقضوها مع أهلكم بذّات الأم والأب حتخليكم قريبين منهم أكثر 🥰 .. لاتخلوا أمور الدنيا تلهيكم عنّهم لإنه حيجي يوم تتمنوا الدقيقة ترجع و تقعدوا معاهم لو ثانية وحده.
٣- آكل أكلة لذيذة أنا أحبها 😋
الأكل من الأشياء الي يطلعني من مودي الكئيب الي أنا فيه وأتوقع في كثير زيي لمن يحسوا نفسهم زعلانين يروحوا للأكل هههه أنا من دول الناس الي أحب أكافيء نفسي لمن أكون زعلانة بشيء لذيذ يخرجني من مود الكئابة .. وغالبا أحب أطبخ بنفسي أشوف نفسي في إيش وأروح أطبخ الشي الي نفسي فيه هههه 🍝... أحيانا للأمانة تكون نفسي مصدوووودة عن الأكل لإنو أكون من جد زعلانة وما نفسي لشي فأروح للخطوة الرابعة.
٤- أكافئ نفسي 🎁
غالبا لمن أكون زعلانة أحاول أكافئ نفسي بأبسط الأمور الي أحبها مثلا أروح أشتري كوب قهوة ☕️ من مكان أنا أحبه أو أروح الصيدلية أشتري سيروم جديد لبشرتي أو حتى أشتري لنفسي وردة🌷 أي شيء بسيط يحسسني إني مبسوطة وطبعا لو عندي شوية فلوس ممكن أروح أشتري ميك أب هههههه المهم إني أكافئ نفسي بأي شكل من الأشكال على قد ميزانيتي .
٥- أدوّر على هواية جديدة أكتشف فيها نفسي 📷
أنا من النوع الي أطفش وأمِل بسرعة وأحب أغير وأجرب أشياء جديدة وفي نفس الوقت أنا عندي الإكتئاب يجيني لمن أكون فااااضية عشان كدة دائما الفراغ يجيب الهم والكئابة لازم تشغلوا وقتكم بأي شي بوظيفة مثلا أو لو مالقيتوا الوظيفة شوفولكم هواية جديدة أتعلموها أنا أحب التصوير وأحب أحط مكياج 💄 لنفسي أحسه فن ويطلّع إحساس شهد الفنانة ههههه حاليا أنا طايحة على فكرة اني أتعلم كيف اصوّر الفيديوهات وأمنتجها واليوتيوب مليااااان 😃 كمان بأتعلم أعزف على آلة الكاليمبا وكمان على القيتار الصغير اليوكاليلي لإني أحب الموسيقى 🎼 جدا ونفسي كمان أتعلم بيانو ... الشيء الي تحبوه خذوا فيه دورات شوفوا عليه فيديوهات عاليوتيوب وأتعلموا.. التعليم بيجي حتى لو ما عندكم فلوس اليوتيوب مليان فيديوهات تعليمية زي ماقلتلكم، مو لازم يكون عندك شهادة عشان تتقني مهارة معينة ... المهارات والهوايات هي الي تخليكم مميزين💡مو الشهادة فقط ... الشهادة مهمة لكن لو ما عززنا مهاراتنا سواء كان في مجال تخصصنا أو في مجال مختلف تماما عن مجال تخصصنا ما حيكون في إختلاف بيننا ولا ابداع. خلّوا عندكم مهارة أو هواية تلجؤولها بعد يوم طويل من الشغل والتعب شيء إنتو تبغوا تتعلموه من قلب وممكن تضيعوا ساعات فيه الله يوفقكم ويحققلكم أمانيكم يارب 🙏🏼 .
٦- أخرج أي مكان برا البيت 🚘
أنا يمكن آخر الحلول عندي إنو أطلع برا البيت لإني بيتوتية درجة أولى وما أحب أختلط بالناس🫣 يجيبولي توتر هههه ولا أحب المولات أبدا أحب لمن أطفش أروح أجيب قهوة من مكان قريب من بيتي بالسيارة 😃☕️، أحب مثلا أروح البحر 🌊 وألفه بالسيارة يعني أحب أي خرجة تكون داخل السيارة وما أحب أطوّل كثير برة البيت حدي ساعة ساعتين وأرجع لإني أحب أجواء البيت مرة .. تعرفوا الأيام الوحيدة الي مستحيل تلاقوني فيها في البيت هي الأيام الي فيها غيوم ومطر😍 اعشقهم وتلاقوني لااازم أخرج بالسيارة ولو ٥ دقايق أقعد أتأمل جمال الغيووووم والمطر وأكون في كااااامل سعادتي .. الشاهد من الموضوع إنو لو إنتي تحبي الخروجات والمولات والطلعات عادي غيري وأطلعي ولو إنتي زيي خرجات السيارة تكفيكي كمان عادي أهم شي تسوي الي يريحك لكن بين فترة وفترة الواحد يحتاج يغير جو شوية.
٧- الطبخ 👩🏻🍳
عن نفسي الطبخ يطلّع كل الطاقة السلبية ☺️ الي عندي و يجي حسب المود أحب لمن أجي أطبخ أسوي أجواء وأقفل عليا المطبخ وأقعد مع نفسي عشان من جد تطلع الأكلة لذيذة أنا أحب أطبخ وأهلي يحبوا أكلي 💕 ما أخفي عليكم إنو أحيانا تكون مثلا الطبخة أول مرة أسويها فما تطلع زي ما أمي تسويها لكن مرة على مرة أضبط الأكلة وتطلع عال العال 💪🏼 ...أبدا لاتقولوا مانعرف نطبخ أرجعوا لليوتيوب كل شي فيه أنا أشوف إنو البنت لاااااازم تعرف تطبخ حتى لو الأساسيات عشان لو جاعت تقدر تخارج نفسها هههههه .. يعني مو معقولة كل يوم حنشتري ديليفاري لازم نعرف نطبخ .. احس أغلبية البنات ساروا يشوفوا إنو الطبخ شيء مو مهم أو يربطوها بإنه شيء مو إلزامي .. أنا أشوف انه ممكن يكون الطبخ مو الزامي كل يوم و لكن لازم على البنت إنها تطبخ الأساسيات وحتى الولد على فكرة لازم يكون يعرف يطبخ الأشياء الأساسية ..رسالتي لكل بنت ماتعرف تطبخ جرّبي تطبخي لنفسك مو لأحد تاني وسوي الأشياء البسيطة السهلة صدقيني لمن تسوي أكلة وتكون لذيذة حتحسي بإنجااااز ومرة على مرة بالممارسة حتتعلمي.
٨- الرياضة
جاتني فترة كانت الرياضة عندي إدمان لكن قطعت من سنين والشيء لمن تقطعيه تحسي علشان ترجعي له ياخد وقت لكن مو مستحيل أكيد .. الرياضة 💪🏼 من الأشياء الي نفسي أرجع أحبها من قلب تاني وترا أنا بحاول لإنه لازم أنحف بس أنا هادي المرة ما أبغا آعملها علشان الوزن فقط أبغا أعملها وأحترفها لنفسي ☺️ وأنا مؤمنه إنه الرياضة في يوم من الأيام حتسير هواية ليا الرياضة من جد تطلّع كل الزعل والغضب والطاقة السلبية من الجسم هادا غير انه تحسوا إنو جسمكم صحي وبيتحرك من جد شعور رهيب أشتقت أرجع للرياضة تاني . جربوا الرياضة لمن تكونوا زعلانين وصدقوني حيتغير مودكم ١٨٠ درجة ولاتنسوا وإنتوا بتعملوا رياضة أشربوا موية كتير.
٩- اليوتيوب
اليوتيوب من الأساسيات في يومي أحب أتفرّج على الأشياء الي أنا مهتمة فيها 💕 زي مثلا المكياج دائما أشوف آخر أخبار الجمال من البيوتي يوتيوبرز الي أتابعهم ، أشوف فلوقات وأحب أتعلم زي ما قلتلكم هوايات جديدة عن طريق اليوتيوب .. اليوتيوب أنا أشوفه كنز دائما أتعلم منه شيء جديد. حاولوا إنو تستفيدوا من اليوتيوب قد ماتقدروا وطبعا أختاروا القنوات الي تفيدكم في المجال الي إنتو مهتمين فيه يعني مثلا لو إنتوا مهتمين بالصبخ تابعوا قنوات طبخ ولو مهتمين بالكتب والقراءة تابعوا قنوات تعمل مراجعات وتقيم الكتب وهكذا اليوتيوب بحر استخدموه صح وفي النهاية كل أحد وذوقه بإختيار القنوات الي تستهويه .. عندي
تدوينة كاملة ببعض القنوات الي تعجبني وكمان ممكن تشوفوا قناتي في اليوتيوب 👈🏼 إضغط هنا 👉🏼
ان شاء الله تعجبكم قناتي .
١٠- التصوير والمكياج أو الميك أب
المكياج من أكثر الأشياء الي تبسطني واللي أحب أطلّع مواهبي فيها أحب دايما أشوف أخبار عالم البيوتي والجمال😃 وأتابع كثير بيوتي بلوقرز أجانب وخليجيات وسعوديات 💕 أحب الميك أب وأحب أكتشف أكثر في هادا المجال أحب أصوّر لوكات ميك أب عالانستقرام لو مهتمين حسابي THATBEAUTYANGEL
نفس الفكرة مع التصوير….
التصوير يخليني أقدر أوصّل حبي للمكياج والبيوتي لكم بشكل أكبر والتصوير موضوع كبير وبحر
أنا ما أشوف نفسي من المحترفين ولكن أحب أتعلم أكثر في هادا المجال .
في النهاية حابة أقلكم أبدا لاتخلّوا الزعل يسيطر عليكم وعلى نجاحاتكم وخلّوا العقبات الي بتسرلنا في حياتنا دافع لنا إنو نقوم ونكمل 💕 ونوصل للمراتب والأحلام والأهداف الي رسمناها لنفسنا كلنا بنمر بحزن وزعل لكن دائما لاتنسوا توكّلوا أموركم على الله وهو أكيد عالم بالنفوس والأحوال أتمنى أيامكم تكون كلها سعادة وفرح وحب ولا تنسوا تستغلوا كل لحظة مع اهلكم بالذات الأم والاب أحبكم مع السلامة 👋🏼.
0 التعليقات:
إرسال تعليق