بسم الله الرحمن الرحيم
كيفكم وحشتوني جدا 💓 من زمان ماجيت هنا في المدوّنة وأتكلمت معاكم 😃من جد أحس هنا كأني قريبة منكم أكثر ولمن الحمدلله سار عندي قرّاء وسرتوا تشاركوني أفكاركم سرت جدا ممتنة وجودكم في حياتي اليوم بدأت في مشروع صغير بيني ويبين نفسي أبغا أشارك كم موضوعه ف يلا نبدأ💁🏻♀️ ..
الفترة الي فاتت يعني تقريبا كل السنة الي مرت علينا غبت عليكم 😭 وأنا كنت في نفسية سيئة وكنت حاسة إني حرفيا فقدت شغفي و كل شيء كان يجبلي السعادة سرت أشوفه مايعنيلي أي شي وللآن للأمانة احيانا أمر بهذه المرحلة و دائما أحس انو أنا أبغا أقدملكم أكثر وعندي الشغف لشيء أكبر بس مني عارفة إيش هو كل الي أعرفه إني أبغا أتقرب منكم أكثر سواء كان في المدونة أو السوشيال ميديا لإنه هنا بعيدا عن ضغوطات الحياة هنا أنا دائما الاقي نفسي 💕وعلشان كدة فكرت أنو أنا لازم أعمل
قناة على اليوتيوب إسمها THATBEAUTYANGEL وهي المشروع الصغير والجديد إلي أبغاكم تكونوا جزء منه القناة عبارة عن قناة بيوتي ولايف ستايل أبغا أجرب كل شي فيها من توتوريالات ميك أب لمفضلات لفلوقات وغيره 🤩 أبغاها تكون مساحة إضافية للمدونة أشارك كم فيها كل ما أحب وتكون زي المتنفس لنا آخر اليوم تفتحوا قناتي وترتاحوا من كل الضغوطات .
بعد ما فقدت شغفي الفترة الي فاتت ودخلت في حالة سيئة 🙃 قلت لأ أنا لازم أحاول أخرج من الحالة الي أنا فيها ولازم أرجع أعمل الأشياء الي أنا أحبها مثل التصوير والميك أب وصناعة المحتوى 🥹 بصورة عامة كان دايما اليوتيوب في بالي من ٢٠١٥ وكنت دائما أحطّم نفسي إنو ياشهد في قنوات كثير عاليوتيوب يعني إنتي فين حتلاقي نفسك بينهم هل مثلا حتنجحي ؟؟ هل قناتك حتنجح ؟؟ هل الناس حيتقبّلوكي والا لأ ؟؟😔 السوشيال ميديا على قد ما إنها حلوة على قد ما إنها مكان جدا توكسيك وخطر لكن بالرغم من هذه الأفكار السلبية الي كانت تجيني الا إنه كان عندي أمل بالله💓 وإنه أنا ماسويت المدونة والسوشيال ميديا الا لهدف ولأكون قريبة منكم عندي أهداف كثير أتمنى أحققها يوم من الأيام . اليوم أنا رغم خوفي من الخطوة الأولى الا إني جدا مبسوطة إني أخذتها وتغلبت على الخوف وفتحت قناتي على اليوتيوب ونزلت أول فيديو فعلي في قناتي لإني قبل نزلت كم فيديو لكن ما كانوا بالمستوى الي أنا أبغاه الآن نزلت أخيرا أول فيديو 💪🏼أنا راضية عنه وأبغاكم تشوفوه وتشاركوني رايكم هناك تحت الفيديو وتشتركوا في قناتي وتدعموني وان شاء الله نكوّن أحلى عيلة وتكون القناة مكان جميل يجمعنا كل أسبوع إن شاءالله حأنزلكم فيديو جديد.
هذا رابط قناتي 👇🏼عاليوتيوب أبسطوني وأشتركوا فيها حأكون جدااا مبسوطة 🥹💓
بالنهاية حابة اقلكم أنو المدونة ما حيتغيّر عليها أي شي وحأفضل أنزلكم فيها تدوينات وكل شيء تحبوه 🤩💓من الكوفي توك المفضلات ومراجعات للميك اب ما حيتغير عليكم شي ان شاء الله ..
وحابة اقلكم نصيحة إذا فبالكم تبغوا تبدؤا بفكرة أو مشروع أو أي شي من هذا القبيل لا تسمعوا لافكاركم السلبية 🙅🏻♀️ ولا تسمعوا للي حولكم يحبطكم أبدؤا ولا تفكروا وإن شاء الله ربي حيكتبلكم النجاح 💪🏼 لإنه كان إيمانكم بالله قوي .. ومهما كانت الحياة صعبة أو مريتوا بظروف أحبطتكم وكانت ثقيلة عليكم إلا ما ربي كاتبكم الأفضل 💓 إن شاءالله ربي يكتبلك السعادة فين ما كنتوا .. وبس أتمنى تدعموني في قناتي🥹💓 وإن شاء الله كل ما ينزل فيديو حأنزلكم تدوينة تذكيرية هنا أتمنالهم يوم سعييييد ويارب ربي يوفقكم وأنا مبسوطة إني رجعتلكم بعد أنقطاع طويل أشوفكم إن شاء الله في تدوينة جديدة .
0 التعليقات:
إرسال تعليق